ZUU HI LAITLANG AH A PALANG SILOIN A ZUU LAWLAW A CHUAH KO LO?

Zuu hi “Laitlang in thilchuak cu Zuu Palang lawng a si kan ti tawn. A ziah ‘A Zuu’ lawlaw a si ko lo?” Supermarket he ai pehtlai mi rian a si bang rianttuan i kai thawh paoh ah Supermarket ka phaknak hi kum li nga a si cang. US ram state 50 chung ah State tam nawn ah ka phan i ka khuaruah a ka harter ngai tawn tu cu state kip nih anmah state chung chuak thilri tha an i pek cio ning khi a si.

Aanhring thok in zuu tiang local chuak khi dawr a tam-U nih an ngei I a dang tein an zuar hna. A manh zong an manh ngai cio.Rian a tlawm caan ahcun ka phaknak dawr hi ka hel i an zuarmi thil (products) pawl ka zoh tawn hna. Cu I ka hmuhmi cu supermarket pakhat chung ah khin company a zaza nih an chuah mi, ramkip le Miphun kip nih an sermi dinei le din ding pawl an zuar khi a si.

Khi pawl pakhat hnu pakhat in ka zoh pah hna in ka ruah tawnmi cu Laimi nih kan din, kan ei mi chung ah zei pawl khi dah hi bantuk dawr (US theng ah si loin Kawlram zong ah) ah tuah le zuar awk a ttha ve hnga ti khi a si. Keimah i ka ruah khawh tawk chung ah phun hnih thum te khi a um. Cu lak ah ai tel mi cu ‘Zuu’ hi a si.

Biar-kaih he lawng kan rak tlonlen lio in kanmah tein kan rak I ser khawhmi lakah ai telmi cu ‘Zuu’ hi a rak si. Kan van tthancho deuh hnu zong ah Laimi nih mah kutke in, mah ram chung in, mah thiamnak in rumnak i kan rak hman hmasa bik pawl lak zong ah Zuu zuar le chuan kha ai tel lai dah. Kawlrawn in kuat (import) hau tuk lo in rak chuan khawh mi, rak zuar khawh mi lak ah a rak manbik a rak hlawk bik mi lak ah ‘zuu’ chuan le zuar kha a rak i tel hrim hrim lai dah.

Biaknak lei in zuu zuar khap a rak si hlan a luancia kum 30 hrawng ahcun a sangkip le a khuakip nawn ah zuu chuang le zuu zuar kha an rak um. Kawlram in rak kuat mi zuu si loin mahte in rak chuan mi deuh an rak si fawn. An chim tawn ka theih mi ah(a hman le hman lo cu ka thei lo) Lai zuu (a hlei in zufa) in zutama a rak simi kha ngandam lo in tuan ah an rak um lem lo, ti a si. Hawi nakin an ngan hmanh a rak dam, a timi zong an um.

Supermarket i kai chawh i Zuu, Wine le Beer an zuarnak ka phak I ‘Sake (Japanese zufa), Sojo(Korea zu) telh in Irish le Scott hrawng in a chuak mi ka hmuh hna ahkhin Laimi nih aho hmanh nih chimh huaha loin Kan rak thiammi lak ah ‘Zuu’ ser le chuan ai tel kha a ka theihter ve tawn.Kan rak hngakchiat lio I tlangval pawl sin in kan rak theih tawn mi cu ‘Anih nu zufa/zureu nakin anih nu ta khi a thaw deuh,’ ti khi a si.

Kha nih a rak langhter tawn mi cu Laimi nih Zuu zong a phunphun in kan rak chuan thiam ve ko ti khi a si.Cu i ka lung I a chuak tawn mi cu Laimi nih vawleicung mi vialte nih an din duh mi thil lakah a ser kan rak thiam vemi Zuu zong hi sipuaizi (commercials) ca lawlaw in kan tuah ve ko hnga lo, ti khi a si. A chiatnak lawng si loin a tthatnak le a hlawknak lei in hei cuanh ve khi.

Laimi nih Zu chuan kan doh tuk ruang i kan ngol hnu in Kawlrawn in zu tthalo phun tampi a phan. Zu chia a tam tuk caah mino tete tampi tuan tuk ah an nunnak zong a liam. A man an faak i a din kan ngol hlei lo caah Miphun dang tu nih an hung i rumnak fawn.Laitlang in thilchuak cu Zuu Palang lawng a si, kan ti tawn. A ziah ‘A Zuu’ lawlaw a si ko lo, ti khi ka ruat.

Cozah, biaknak le Mipi zong nih Zuu kan zoh ning hi zohtthan in a din le a zuar ning tu ah phunglam reprai deuh ser i Laimi nih a ser kan thiam hmasa bik mi lak ah ai tel zong khi ruat in a huam mi le a thiam mi hna caah sipuaizi ca lei in cuanh piak I Kawlram pumpi le vawleipi zong nih din awk ttha lawlaw ding in ser khawhnak lam hna hei kawl ve lawlaw hna seh law Lairam ca zong ah a tthatnak tu chuahpi deuh ve ko hnga lo maw, ti khi ka ruat tawn. Credit: Mang Hram Kung