ZOHCIO ULAW SAYA RUNG KAW DIRHMUN PEI A RAK TTHAT BIK KO HI

Zophei, Lautu le Mara nih Hodah mee an pek te lai? Atu kum cu Thantlang peng Zophei, Lautu le Mara ah MP a cuh dingmi ruah loin Independent zongin an rak chuak ko. MP an tuanbia le an rak tuan balmi thil hna zoh ti hna u si. Thantlang peng dih lak Mee khotu hi minung 33231 an si. Thantlang chaklei, Zophei, Lautu le Mara tiah No. 2 hmunhma an si.

An dih lakin Mee pe khotu minung 16000 leng an si tiah Thantlang commission nih cazin in an langhter. Zophei 8000 hrawng, Lautu 4000 hrawng le Mara 3500 leng hrawng si dawh an si. CNLD in Pyine No.2 ah Saya Rung Kaw a zuam lai. Saya Rung Kaw cu Lautu Milu an tam biknak Hnaring khuami a si. NGO ah riantuan in Lautu, Mara le Zophei caah tial a tuahmi a tam ngai cang. Cun Hnaring pawng Lautu mipi tampi nih mee an pek lai.

USDP in Pyine No.2 ah Dr Hmuh Thang a zuam lai. A nih hi 1990 ah NLD nih an rak hlen mi a si. NLD nih an hlen hnu ah USDP ah a um. Zophei, Lautu, Mara dam lo ruangah rak fuh penh a si caah mi theih hngalh a ngei tukmi le mipi nih nupa can ah bochanmi pakhat a si. An harset lio an rak fuh penhmi a si caah a dawtnak kha mipi nih an philh piak lai lo. 2015 lio zongah Pyine No.2 in a tlingmi a si caah mipi an lungah a um ngaimi a si.

NLD in Pyine No.2 Ni Sui Lian a zuam lai. A nih hi 2015 ah NLD in Amyota ah a tlingmi a si. Cucaah MP a tuan chungah Lautu, Mara, Zophei caah rian felfai tein a tuanmi nusal tha pakhat a si.Mara tam deuh cu NLD ah dir an i timh rih ko ti a si. Atu tiangah Dr. Hmuh Thang le Ni Sui Lian nih Phaisa a dik lo ningin an hman le an hal hna timi theih a um bal rih lo. Bochan tlak an si.

Independent in Salai Lung Thli Tum a zuam ve lai. Salai Lung Thli Tum cu Ram dang phaisa kuatnak a tuahmi a si. Kawlram cozah sin ah Phaisa kuatnak Register a tuah lomi a si caah Cozah sin ah Tax zong a pe lomi a si. Cun Lautu, Mara le Zophei nih Hmawngtlang khuataw lam cawhnak dingah Cozah sin an rak halmi cu Hmawngtlang lei tangin ca a rak tial tawntu a si. A fawinak cun Lautu, Mara le Zophei nupa a rak doh ngaitu pakhat a si.

Cucaah Lautu, Mara, Zophei (Leitak,Zabung,Khuabung,Hlamphei, le Ngalang) nih an zulhmi lampi cu cozah nih tuah piak kho hna hlah seh law Hmawngtlang an duh ningin si ko seh a titu a si caah Lautu, Zophei, Mara nih cun Mee an pe tuk lai lo tiah ruah khawh a si. Lautu le Mara nih cun an pek awk hrim a si lo. Lam an zulh komi tha hlah seh law, harnak tong hna seh ti a duhtu a si caah Lautu le Mara hrim nih cun Mee an pek awk a si lo.

Lung Thli Tum MP a tling si cun khuakhat le khuakhat rem lonak a chuak lai. Cun Amah hrim cozah tax a pelomi a si caah thil dik le fel tein a tuan ngam mi a si lai lo. Cucaah Zophei nih Lung Thli Tum mee an pek zongah Lautu le Mara nih cun an pee ti lai lo a fiang ko. Ni Sui Lian, Dr, Hmuh Thang le Saya Rung Kaw mee pek ding lawng a tang cang.

Ni Sui Lian caah a poinak cu Daw Suh Thantlang a tlawn lio ah Mara tlang caah Hlei le Lam a rak pekmi hna kha Pu Zo Bawi nih a dangah thil piak dingin a tuah an ti. Cucaah Mara tlang nih NLD hi an uar tuk ti lo kho men mi a si. A donghnak lei ah Lung Thli Tum, Ni Sui Lian le Dr Hmuh Thang cu Zophei chungah Mee an i then a hau te lai.

Zophei milu 8000 hrawngah minung pakhat nih 3000 leng hrawnglawng an ngah khawh cang lai. Lautu nih Saya Rung Kaw mee an pek ve a si cun 4000 cunghrawng nih cun an pek te lai. Cucaah Dr. Hmuh Thang le Ni Sui Lian cu Lautu le Mara tlangah Agent thami an ngeih a hau. Cun Saya Rung Kaw cu Lautu le Mara tlang tam deuh nih an dir pi kho men mi a si. Credit: Mai DCS