VAN BAWI LIAN BIACHIM CU A PASAL BAK KO, UAR A UM BAK

Nihin bia a kan chimpiaktu Salai Van Bawi Lian biachuak. (CNLD Candidate). Kum 70 chung hrem a tuar mi Chin miphun lungrual tein tho cang usih. Nihin hi tho cang usih, kan ram kan vawlei kan miphun nih atu theng ah nangmah le keimah hi a kan herh. Nihin hi Pyidaungsu ni a si bantuk in Pyidaungsu a sertu, a ngeitu miphun kan si. Kan pu kan pa hna ni Federal caah, Democracy caah nihin hi minsen an rak thut ni a si.

Cu ca ah nihin i nangmah le keimah kan aumi hi a sawhsawh a si lo, kum 74 chung kan rak tuarnak, kan rak innak pawl nihin hi ka au than mi a si.Lamzawhnak ah a ra mi ka ule ka nau, ka miphun hawi hna kan dihlak hnu thul loin hmai kan nor chin hna lai. Ral tha tein kan doh lai, kan doh mi hi zeidah a si ti kan i fiang cikcek cang. Nihin hi a bu kan i do lo, party kan i do lo, pumpak kan i do lo kan ram nih a huap bik mi RALKAP uknak kan doh mi a si.

A minung in kan i hua lo, ralkap kan in hua hna lo, palek kan in hua hna lo.Ralkap le palek vialte mipi nih cawmmi nan si ca ah mipi kan tanpi uh, kan dirpi uh. Kan pu kan pa hna nih nihin hi Federal Democracy kan ngah khawh nakhnga minsen an thut ni a si i, khakha a rannak in rak kan pe hram uh, kan pe cang uh. Nan tlaih mi, nan hrem mi vialte hna rak kan thlahpiak cang uh.Zeidang chim loin nihin hrim ah rak kan thlahpiak dih uh.

Cu lawng si loin Cozah riantuan vialte hna nan lungre thei hrim hlah uh.Nanmah hi kan ram ca ah a biapi cemmi nan si ca ah CDM cawlcanghnak ahhin i tel ding in kan sawm hna. Kan ram hi atu nanmah kut cung ah a ummi a si i, nan i tel ahcun atu kan doh mi hi kan tei hrimhrim lai. Nan rian hi nan hmuh than te hrimhrim lai.Cu a si ca ah, nihin i kan tuah mi, kan aumi hi hnu ah kir hna hlah usih, kutsih in hmai ah fong chin rih ko hna usih. Laknak: Hakha Campaign For Justice.

Zasang Cinzah:Mipi dohtu tapung, Min Aung Hlaing nih a sermi “State Administration Council (SAC)” ah itel dingin a sawmmi hna a cohlangtu paoh cu Min Aung Hlaing tuahsernak thape tu le dirhkamhtu an si hna. An sawm hmasami cu ni 8 a ttuan ah a nunnak a dih. Atu Pu Ngun San Aung an von sawm tthan i a cohlang hna tiah thawng theih a si. Chungkhar naihniamh le hawikom hna nih biatak tein rak thloh ulaw a ttha tuk lai.

Ralkap nih 1962 in an kan uk cang i, kan vuai cikcik. Kan ram cu vawlei cung sifakbik ram ah an caanter. Atu Min Aung Hlaing nih a von chap hawi rih. Feb 2, 2021 ah a von sermi, State Administration Council (SAC) hi a nung thai sual lai timi phan a um tuk. A sernak in ni 9 a kal cang i, Civil Disobedience Movement ruang ah a kal kho huaha ti lo. Hitluk in Kawlram mizapi nih SAC nung kal kho lo dingin CDM an tuah hnawh lio ah ralkap lei ttang in ralkap tha pek cu a si thiam hrim lo.

Ziah amah duhthimnak pei a si cu, a ti tawk nan um men lai. Asinain miphun le ram, society hi minung pakhat duhthimnak lawng in a kal thiammi a si lo.Minung pakhat-hnih nih an palh ruang ah miphun ningpi in harnak ton khawh a si. Pu Ngun San Aung le hawidang zeimaw nih ralkap tha an pek ruang ah, an miphun hawi dang vialte, Civil Disobedience Movement an tuahmi santlai lo a si ding hi a pam tuk. Cucaah, rak thloh sawh ko u. Credit: Zasang Cinzah

Be the first to comment

Leave a Reply

Your email address will not be published.


*