USDP LE NLD NIH ZEIHMANH AN I THEIHTER BAK LO HIH ZOH KO UH

Mah biahalnak ah Salai Ceu Bik Thawng nih lehnak atuahmi ah hin thilsining tampi alang ko. Vun zohcio ulaw biahalnak ah CNLD nih Miphun Covo Lakthan Dingah 2008 Constitution remh hmasa hau nan ti maw? tiah Dr Tluang Za Thang nih biahalnak atuah. Salai Ceu Bik Thawng nih lehnak pahnih bantuk in atuah i, apakhatnak lehnak atuah mi cu Kan miphun covo khuakhirh than nakding caah 2008 Phunghrampi remh hmasa a haumi a um i remh hau loin ngah khawhmi zong tampi a um ve ko.

Kan chim cia bantuk in kan miphun mahte-khuakhannak (self-determination) caah a herhmi federal phung tling ngah nakding ahcun 2008 Phunghrampi cu remh hrimhrim cu a hau. Cu Phunghrampi remhnak cabuai ah Chin party kan itel lo sual ding belte phan awk a um. Nai ah NLD hruainak Hluttaw ah Phunghrampi remhnak cabuai ah tlangcung party dang an itel dih nain Chin party kan bau khah.

NLD nih an remh duhmi dal 114 chungah tlangcungmi kan covo/duhmi pakhathmanh ai tel lo i atu an Manifesto policy 150 zongah pakhat hmanh aa tello tikah anmah lawngin a ngah lo cumu. Pahnihnak ah Phunghrampi remh hau loin tlangcungmi kan covo lak than khawhmi, tuah khawhmi tampi an um ve ko. Voi tampi hihi kan chim cangmi a si ko. Tck,,

Chin Miphun Ni (CND) zung khar ni ah ser ding, Chin State ramri an kan enmi pawl khuakhirh than ding, Chin Act upadi fehter than i Chin nunphung (customary) vialte kilven ding, Kan biakinn pawl biaknak laisen ngah dih ding, Kokek thilmansung ngunkhuai thenphawtnak covo ngah ding, Nuhrin holh in cacawnnak (Mother Tongue Based Education System), Hi hna pawl hi Phunghrampi remh hau loin le ralkap tihtanh loin tuah khawh dihmi an si.

Cucu NLD le USDP cozah an tuan chungah pakhat hmanh an kan tuahpiak (duh) lo. Cu nih an lungput a langhter ko. Cun pi-ne ah teinak a hmumi party kha Vuancichoh pek i cozah serter zong kha poh-mah (261) remh hau loin teinak a hmumi cozah nih nawlpek khawh a si ko. Cucu miphun federal covo a si cumu. NLD cozah nih Rakhine ram ah teinak a hmumi ANP party kha cozah tlaihter khawh a si ko nain a pe duh lo.

Tutan cu pine (state) 7 ning tein tlangcung party nih teinak kan hmuh lai i Kawl Party nih federal miphun covo pe loin an kan um ngam/kho lai maw kan test hna lai cu. Tlangcungmi covo pek khawh tuk asi ko nain, pe duh lo riangmang in azeipoh ralkap le Phunghrampi puh (scapegoat) dih hi Kawl Party zia a si. Salai Ceu Bik nih fianternak atuahmi hi vun zoh ulaw Phunghremh hau bak loin tuah khawh dingmi an tuah lomi hi zeitindah nang na ruah.

Be the first to comment

Leave a Reply

Your email address will not be published.


*