US KHUASA PU MANG CHAWN NIH CAAN CHIA AH KAN UMNAK KONG ACHIM

Caan chia ah kan um. Atu kan nikhua hi caan chia a si caah, caan ṭha nan hmuhmi paohpaoh kha tha tein hman i zuam u. (Efesa 5:16) tiah Paul nih a rak chim mi hi nihin kan vawlei dirhmun zoh tik ah cun caan chia ti lawng hmanh si lo in caan chiah taktak ah kan um ti ding a si. A ruang tampi lak ah pakhat te ka hun langhter lai. Kan theih cio bantuk in, January 06, 2021 ah Capitol ah buainak a um ruang ah, vawlei cung ah ralkap thawngbik a ngeimi USA i ral-bawi-zik (Commander-in-chief) a si mi,

President Donald Trump nih a tu hi Washington DC ah ralkap (National Guard) 15,000 (Thonghleinga) nak tlawm lo a chiah hna i Capitol zong cu an kulh dih cang ti a si.Micheu nih cun President Trump nih martial law a chuah khawh men, an ti. Mi cheu nih martial law a chuah kho lai lo; January 20, 2020 i inauguration day caah timtuah mi a si, an ti ve. Cu kong cu kei ka chim duh mi a si lo. Ka chim duh mi cu hihi a si.

Vawlei cung ah democracy pa bik a si mi USA hmanh ah martial law kong tiang chim le rel a hong si mi hi cu kan vawlei pi hi caan chia taktak ah kan um ti cu a fiang taktak mi a si. (II Timote 3:1-9) hi rel te.Cu a si caah, Bawi Khrih ah ka dawt mi ka u le ka nau, Bible nih a kan cawnpiak bantuk in ni hmanung bik ni ah cun zawtfah tlangrai a phunphun (COVID-19) an chuak lai; harnak a phunphun a chuak lai; raldohnak thawng zong kan theih lai.

Sihmanhsehlaw zumtu taktak nih cun kan ṭih ding cu a si lo; ralring te le timhcia te tu in kan um ding a si.Zumtu taktak nih cun puul le rai, misual le acozah ṭha lo, le zeibantuk harnak le buaibainak hmanh hi kan tih ding a si lo. Bible nih a kan cawnpiak bantuk in taksa lawng a that kho mi hi cu kan ṭih ding a si lo; taksa zong a that kho i thlarau zong Hell ah a thla khotu Jehovah Pathian lawnglawng hi kan tih ding a si. Careltu vialte Thiang thlarau nih fiannak inpe hna sehlaw, Bawipa kan Pathian nih thluachuahnak inpe ko hna seh. Amen.Ka lawm, Isaac Duhtling pa (Mang Chawn) Indianapolis,USA

Relchih:Laitlang din lonak, eihmuarnak, le ziknawhnak kongah buai ngam hna uh sih, US thimnak bantuk in. Atu tan, US ram thimnak ruangah fak piin Laimi (Chinmi) kan buaibai le kan i ceih lulhnak in ka lungah a hung chuakmi cu Kawlram uknak tthalo le Laitlang i din lonak, eihmuarnak, le ziknawhnak a tambik a sinak kong zongah pastor te, evangelists le hruaitu dang vialte nih fak piin rak doh in rak au ve uh sih law zeitluk in dah a tthat hnga i tthangcho nak zong tampi a chuahpi cang hnga tihi ka ruat. Mah lioah cun Facebook a rak um rih lo ruang zongah a si ko lai. Silole kan ralchiat ruangah le kan ttihnak ruangah a si ko lai.

Kawlram uknak cu democracy uknak a si lo ruang zongah a si ko lai. Asinan tuni ah Kawlram uknak cu a ttha cang i democracy uknak kan hmang cang ko nan kan mino pawl le kan pastor pawl le evangelist zongnih din lonak kong, eihmuarnak kong, le ziknawhnak kong, le I thleidannak kong pawl cu kan chim ngam hlei lo/kan phuang ngam hlei lo/kan ttial ngam hlei lo. Din lonak, eihmuarnak, le ziknawhnak a tuahtu pawl kha hmaitonh bak in kan ti ngam hna lo hmanh ah phungchimnak in maw siloah cattialnak in maw silole video ti bantuk tal in maw, Laitlang i din lonak, eihmuarnak, le ziknawhnak kong cu kan chim awk le kan ttial ngam awk a si ka ti.

US ram cu democracy uknak in kum 250 nawn an i hruai cang ruangah duh tawk in kan chim ngam, kan ttial ngam, kan soisel ngam hna i kan buaibai ngam. Cuve bantuk in atu tan thimnak kongah hehtiah a buaimi, Laimi kan zapi tein, Laitlang le Kawlram i din lonak, eihmuarnak, i ruan lonak, thleidannak, le ziknawhnak kong vialte khi buaipi ngam ve uh sih law zeitluk in dah a tthat hnga ka ti. Biaknak lei hruaitu pawl an rian hrimhrim zong a si. Campaign le crusade cu atu le atu kan tuah lengmang ko nan Kawlram chungah din lonak, eihmuarnak, le ziknawhnak a tambik nak state cu Laitlang (Chin state) a si.

Dinnak tuah ding kong kan i cawnpiak ti lo. Eihmuar lo ding kan i cawnpiak ngam tilo. Zik i nawh lo ding kan i cawnpiak ngam ti fawn lo. Cu vialte cu biaknak lei hruaitu pawl rian a si. Bible chungah profet vialte nih mah kongcu biatak tein an rak dohmi a si. Biakam thar chung zongah Johan cu din lonak kong a chim ruangah Herod siangpahrang nih a thah. Dinnak kong, eihmuar lo ding, le zik i nawh lo ding cu Khrihfa a si lomi ram pawl le miphun zong nih biatak tein an I cawnpiakmi le an dirpi mi a si. Mah ruangah miphun thangcho le ram thangcho ah an I chuah ve hna. Khrihfa a simi nih cun tam chinchin in din lonak, eihmuarnak, ziknawhnak, thleidannak, le I ruan lonak vialte cu kan doh awk a si.

Laitlang cu Kawlram chungah a thathu bik le rian a ttuan lobik state a si an ti, hlathlaitu pawl nih. Aphichuak cu a sifak bik state kan si ve ko Kawlram chungah. Din lonak, eihmuarnak, le ziknawhnak lawng i bochan cang ahcun rianttuan zong kan huam tilo cu mu. Mah te i zuamnak lungthin zong kan nei kho ti lo. Kan teima ti lo. Rianttuan huam ding le teimak nun neih ding in i cawnpiak zonghi pastor le evangelist te rian a si. Bawi Zisuh nih a timi cu ka pa cu a zungzal in rian a ttuan a ti. Paul zongnih a timi cu nan caah thilrit phurtu ka sinak hnga lo nan sin ka um lioah hehtiah rian ka ttuan a ti.

Bible dangah a ti rihmi cu a ttuan lomi cu ei hlah seh ti si hoi. Curuang ah a thathumi le rianttuan a huam lomi cu Khrihfa ttha le a piangthar mi zong a si kho lai lo tikhawh a si. Din lonak cu Laitlang ah a tamtuk ruangah sianginn kan kai zongah ca zoh kan huam tilo i ca i fir ding lawng kan i bochan. Atu cu cafir a ngah ti lo. Curuang ah Laitlang cu Kawlram chungah tanghra awng cazin a chiabik a si peng rih ko. Ca zoh huam lo cun zeitin dah kan awng khawh fom hnga. Atutan US ram thimnak ruangah a buaimi kan za tein Laitlang i din lonak, eihmuarnak, ziknawhnak, i ruan lonak, le thleidannak vialte khi hehtiah buaipi cang hna uh sih.

Democracy uknak a si cang ko i nan ral zong a tthat deuh awk a si cang ka ti.Facebook le social media dang san an tlaih ning le an tthathnem ning zong kan I fiang cang ko I a hmang zia thiam ve cang hna uh sih, kan Lairam le kan Lai miphun caah. Crusade le campaign kan tuahtik ah le sermon (phungchim) kan neih tik zongah din lonak kong, eihmuarnak kong, le ziknawhnak kong vialte biatak tein i cawnpiak cang hna uh sih law chimrel in ttial cang hna uh sih. Credit: Van Tum

Be the first to comment

Leave a Reply

Your email address will not be published.


*