TULUK NIH ZAWTNAK HMANGIN VAWLEI PI DOLH A TIMH CANG

Chinna Nih Covic-19 In Vawlei Chawlehnak Dolh A Timh:Mao Zedong nih a rak chimmi biaroling pakhat cu” vawleicung pumpi ah harnak a tlun ahcun mah cu caan tha bik a si” a rak ti. Tuluk pawl hi an tuanbia hrimhrim ah human rights, freedom te hna a um tuk lo. An tuanbia ah a tam bikmi cu chawleh thalnak lawngte a si. Tuluk pawl nih an thiam bikmi cu chawleh thalnak a si. Khoika ram, khoika hmun an phaknak poah ah chawleh thalnak ah tluk ding an rak si lo. An nunphung zong a si.

Coroanavirus a chuah hlan deuh ah Hong Kong ah Tuluk cozah dohdalnak faak taktak in a hung chuak. US le nithlak lei ram nih faak taktak in Tuluk cozah cu human righs kongah an mawhchiat. Tuluk ram vialte ah Hong Kong meici a tlan lai ti hi Tuluk communist party nih an phan bikmi a si caah ralkap thazang hmang in an phil dih hna. Mah lio caan ah US le Tuluk zong chawleh thalnak ah biatak tein an i rengh lio caan a si.

Mah phun hnih buainak nih Tuluk communist party hruaitu hna thinlung ah US le nithlak lei ram pawl zeitindah teirul kan cham hna lai timi hi timh ciammam tein ruat cang hna sehlaw a dawh bik.Caan tlawmpal a rauh ah Tuluk ram Wuham khua i, Biological lab pakhat in Coronavirus hi zuhter hna sehlaw a dawh bik. Wuhan khua i coronavirus zawtnak a thoptu, doctor pa, Whistleblower tuahtu doctor pa cu Tuluk cozah nih a ka a phih colh.

Wuhan khua i Coronavirus thlopnak sizung cu zarh khat tluk ah an sak dih. Tuluk ram khuadang ah virus pet kho lo dingah an kharkhumh colh hna. Zawtnak zeitluk in fah, a zual timi le zawtnak zeitluk in chonh a fawi timi an chim duh lo. US cozah bawmh zong an duh lo. Timh ciamman tein an tuahmi si dawh bik a si ko.

Caan tlawmpal a rauh ah vawleicung ram kip ah Coronavirus cu a puah bak in a puak. Europe ram vialte an zaw. Italy, France, Germany, Netherlands Turkey le Spain ko an zual. US a kan phak ve i, minung chahnak New York khuapi khuaci an mui. Mah lio caan ah Tuluk ram ahcun zawtnak kian hram a thawk colh i, Tuluk ram i sehzung le chawleh thalnak vialte rianrang tein an thawk than colh.

Coronavirus nih a denmi Europe ram, France, Germany, Netherlands Turkey le Spain ram vialte ah a herhmi thilri vialte cu Tuluk nih a herh zet in a kuat khawh hna. Coronavirus zawtnak nih hin Tuluk sipuazi hi faak taktak in a turmen lai ti cu al awk um lo a si cang. Mah lio ah US cozah nih biatak tein Tuluk a dir-onh khawh lo ve lo ahcun hmailei US le nitlak lei ram pawl caah ruahchannak a tlawm ngaingai ti a si.

Tuluk ram i Coronavirus a chuah thawk in ramdang nih thil an cahmi hna hi 35.7asinain atu ahcun 52.0 ah a kai than tiah Tuluk cozah nih nizan ah an thanh.US cozah nih Coronavirus in a hlihphuah zau a hau. Shutdown tuah le Lockdown tuah a sauh tuk ahcun US caah tihnung ngaingai mi a si. Mizaw pa sautuk a kuah ahcun fawi tein a fekfuan khawh lo bantuk khi a si Tuluk nih US sipuazi thlaknak hi caan tha laak zau in faak tuk in sipuazi lei ah a lonh sual ahcun sipuazi in Tuluk kuttang um kan fawi te.

Mah zawn lawng a ruatmi, minung zalonnak le duhthimnak zei a rel lomi Tuluk kutang i kan thlak lonak dingah US cozah le CDC nih coronavirus guideline a tuahmi vialte hi kan dihlak in kan zulh khawh ahcun Coronavirus hi kan tei hrimhrim lai i, Tuluk sipuazi kuttang tlaknak in kan luat hrimhrim lai. Minung pakat cio kan biapi. Nangmah damnak nih midang damnak le US damnak chuahpi hram seh.Credit:Salai Lairam Thang