TULIO ZAWTNAK HI ZUMH A HAR NGAI CANG. LUNGHRINH THLUAHMAH A SI

Conoravirus (Covid-19) hi zumh a har ngai cang. Tuluk umtu hi lunghrinh thluahmah a si. Hi tluk lawmmam i Conoravirus a karh khawh ning hi khuaruahhar lei a si cang. US lawng ah tuni tiang ah case 64,563 bak a um cang i, cu lakah minung 908 an thi cang. Italy ah case 74,386 bak a phan cang i, 7,503 bak an thi cang fawn.

Spain ram ah covid-19 case 47,611 lakah minung 3,445 bak nih an thihpi cang. A rak chuahnak tak tak Tuluk ram nakin Spain ram ah a thi mi minung an tam deuh cang. Ram dang dang zong Covid-19 in a zawmi heh tiah an ichap thluahmah rih.Vawleicung pumpaluk ah hi zawtnak Covid-19 a ngeimi minung 462,562 bak an phan manh. Hi zawtnak hi ichonh a fawi tuk ca zong cu a si ko lai.

Asinain a thla deng a si cang i, tlawmpal tal cu a zor deuh hrim awk cu a si lo maw? US cozah le ram dang dang cozah hna zong nih heh tiah mipi ivennak phun phun, lock down, le khualtlawn- khamnak (travel ban) phun phun in an izuam ttualmal ve ko nain tuchun ni tiang a karh thluahmah, minung an thi chuahmah. A karh ning zoh ah a thilthup in a karhtertu terrorist agent phun maw an um hnga?

Khuaruahhar ngai a si mi pakhat cu British singpahrang chungkhar (royal family) in Charles, Prince of Wales tiang hmanh, tuni khan hi zawtnak a ngei tiah hmuh a si than. Khuaruahhaar a si nak cu ziah venhimnak, ralrinnak le security tha tuk a ngei tiah ruahmi tiang nih hi zawtnak hi an ngeih ve khawh. Khuaruah a har ko. Australia State pakhat NSW lawng hmanh ah Case 1029 a phan. Australia ram pumpi zong ah case 2423 bak a phan cang.

Culak ah Tuluk nih a dawt tukmi kawlram ahcun case 3 lawng hmuh ding a um rih. Cu hmah cu leng lei in a rak lutmi (imported case) lawng a si rih. Ram minung ichonhnak (Local transmission) um rih lo. Khap khat lei cun thawngpang tha cu a si ko. Tuluk le Kawlram hi aa daw tukmi inn pa te an si caah maw si hnga? Tuluk le kawlram cu naihniam te a ummi le fawi tein chuah-luh khawh asi ti a si fawn.

Hi tluk Covid-19 buai lio ah kawl ralkap nih a ram chung bak ah ikahnak a peh cuahmah rih hoi. Kan Laitlang Paletwa bak ah ikahnak a um. Tutan Covid-19 kong ah hin kawlram cu a hnga a ngam tuk tiah a titu hna zong an um.Trump nih Covid-19 tiah au lo in ‘Chinese Virus’ tiah voi 2 bak ka palh lo cun a hman cang. Chinese Virus timi biafang hi aa dawh lo tak tak. WHO nih Covid-19 hi a rak chuahnak Tuluk ram a si caah, Tuluk mipi (Stigmatize) thangchiat an si nak hnga lo min a bunhmi zong zei ah a rel lo.

Chinese virus ti bak in Trump nih hin a hman chih ko. Hihi teh Trump le a party pawl nih hin an rak theih ziar maw si hnga? A thlithup tal cun dothlatnak (investigation) an ngei hrim lai.Tuluk ram ahcun Covid-19 a karh ti lo, mipi lengchuah an i thok pah cang. Tuluk tu nih lenglei ram tu a thilri le sibawi tiang a kuat cang hna. Tuluk hi ziah mah tluk rang hin a hna ngam khawh.

Tuluk Communist uknak nih a ram mipi a reh (control) khawh tuk caah a va si zong ah. A voi hnihnak Covid 19 (Second wave) an timi tal hi a ttih hnga lo maw? A hna a ngam tuk cang. Tunai news nih a langhter lebang ahcun Italy nih Covid-19 damlo thlopnak thilri billion dollar man bak Tuluk a cawk tiah ti a si hoi. Tuluk nih $ tam tak tak a hmuh lai. Tuluk hi Lung a hring thluahmah ko.Credit:Peka Hlondo