SALAI BAWI LIAN MANG: CA NAN TIMI HI HOLH HME ARAK SI KO HI

Let there be peace. NCA and political dialogue is an important path to a new constitution based on democracy and federalism. “Ca nan timi hi Holh hme arak si ko hi” CNF le CNA hi miphun minchal in dothlennak a tuah mi a si caah minung kan tling ngaingai. Pengkip, hmun kip in kan ra. Misual zong kan ra, mittha zong kan ra, mi fim zong kan ra, a molh pah mi zong kan ra ve tthiamtthiam.

Kum 30 chung kan dothlen nak ah hin kan ton mi thil zong hi atlawm ve ti lo. Harnak, ngaihchiatnak le lungfah nak kan ton mi zong chimrel cawklo asi bantuk in a cancan ah cun nihchuak asi mi thil kan ton mi tete zong a um ve tthiamthiam.CNF kum 30 renglo a dir khawh nak ding ah a dirkamh tu cu Chin mipi kan si. Ttihphan nak lak ah in khat ar pakhat in maw, asi lo ah facang tthuamkhat in maw, phaisa fanghnihkhat in maw tiah Chinmi aho poh hi CNF dothlen nak ah zeiti maw in kan itel dih.

Chan nih akalpi ningin thil sining a vun ithlen bantuk in CNF adirh tthoh tu dirhmun zong a vun ithleng ve. 2003-4 hnu hrawng khan CNF biatak te in a dirkamh tucu ramkip I aphan mi Chin miphun pawl hi kan hungsi. Ram kip I a phan mi Chinmi hna nih CNF dothlennak ningcang deuh te in kan kilhkamh khawh nak ding ah Chinland Club cu vun dirh asi. Atu ah cun ramchung zongah duhsah te in Chinland Club adir khawh nak ding ah mipi, biaknak, zatlang bu in kan izuam cuahmah lio asi.

Chinland Club hi CNF adir nak ah abiapi bikmi club a si. Chin miphun nih club tiin kan ser mi zong ah a hmasabik asi men ko lai. Kei nih cun Chin miphun chung ah club timi min ai bunh mi hi ka thei bal hna lo. Club timi cu ruahnak, lungput le uarmi, huamzawng ai khat mi hna nih dirh asi tawn. Benabia ah Dance club, golf club, arts club ti tantuk in. Ka theih mi club vialte ah Chinland Club hi rianpical cem a ttuan mi kan si lai tiah ka ruah.

Zeica tiah miphun dothlennak ah kan sikhawh chung ka ruahnak, ka thazaang in ka ttuan I har le fe in ka hmuh mi phaisa in miphun dothlennak(National Revolution) ka dirkamh lai atimi club kan si caah asi. Mah bantuk club cu Chinland Club dah tilo a dang ka thei balllo.Kum tampi miphun dothlennak ah a tel mi CNF/CNA kan pu le pawl nih hin dothlennak chung in an hmuhton mi capo meilah pakhat cio tal cu an ineih dih ngawt.

An chimcia mi hi an nolh than lengmang tawn. Voizeizah an hei nolh zong ah khin kan hei ni lengmang ve tthiam ko. Zeica tiah a tak in an ton mi an chim mi asi caah nih a chuak khun. Nunnak thinsen, thlan le sining vialte pekchanh bu in rian a ttuan mi hna nih an chimmi bia, capo hmanh khi, hmual a nei.Voikhat cu Pu Hnin nih aton balmi capo pakhat aka chimh. Thantlang in Ca Thun timi pa CNA ah a rak lut.

Training avun kai ah khan training saza te le a hawi le nih ca a thiam lomi asi kha an hngalh. Asi na in training cu hawidih zah te a dih ve. Ralkap ttuan ah khan ramtang deuh I um asi tik ah a hawi le nih ca rel awk an neih chun tete an rel mi a hmuh tik ah ca rel kha a duh tuk ve. Hawi he bia an vun iel I cu ka ca ah hme cu ka rel cu an vun ti ah khin cun a lo bak. Zei ca tiah carel a thiam ve lo tik ah ca rel a thiam mi nih ka rel an ti ah cun a el kho ti hna lo.

Ca an rel mi a hmuh ah khin a hngar tuk hna I a uar tuk fawn hna. Ca rel ve cu a duh tuk. Asina in thiam lo cang ah cun ca cu relkhawh asi lo. Ca Thun nih cun a hawi le CNA ralkap pawl kha ca hi hong ka chim ve u, ca rel thiam ka duh ve tiah a hauh hna. E tiah a hawi le nih cun ca cu lungsau te in an chimh. Ca Thun zong cu lungtak te cun ca cu A-B-C-D tiin a vun cawng. A hnu ah cun ca rel cu a vun thiam.

Carel a vun thiam I ca cu a vun rel ciammam le a lau bak in a lau ko ti asi. “ Ka dua le hna ca nan ti mi hi holh pei a rak si ko hi” ati ti asi. Chin politics kong, Burma ram politics kong, Federal ram sernak kong, Constitution remhnak kong an chim tawn ah khin pu Hnin nih a chimmi “ Kadua le Ca nantimi hi holh hme a rak si ko hi” timi bia cu ka lung ah a chuak tawn.Zeica tiah Political party pawl le politician pawl nih an mah power an neih nak ca ding I mipi an soilem hna tik ah kanmah party hi Federal a chuah pi tuding party kan si, kanmah party hi self determination a chuahpi kho tu ding kan si, kan mah party hi constitution remh nak a tuah kho tu ding kan si ti hi a phunphun an chim tawn.

Cun kan mah party a kan ttanh mi hi Chin miphun a daw mi an si hei ti hrawng zong khi an chim pah. Asi na in mah hna political party pawl an rak isem hlan pi kum 30 renglo lio ah miphun politics Federalism le self tertermination a rak au pi tu, Burma ram ah miphun tlukruannak a hreng kho tu Ramuk phung constitution a um ahau ati tu cu CNF asi. Cun constitution remh nak ding or a thar ttial tthan nak ding zong ah a thlur lai ah suttung bantuk in a dir mi cu CNF asi.

Zei political party hmanh nih 2008 constitution hi thlen an timh na in an thleng kho lo. Cucu kan hna theih lawng silo in kan mithmuh, kan hmaika ah a cang cuahmah mi asi. NLD majority cozah, parliament zong ah an mah mitam u, cozah zong ah anmah tlaihmi, hmanh nih an thleng kho lo. Zei caah? Zeibantuk parliament le cozah hmanh nih thlen khawh lo ding in rak ttial mi constitution asi. Ralkap kha rampi rorel nak nawl sangbik a pe mi constitution asi. Democracy hei ti tung I ralkap I nawlneih nak sangbik hei tlaih zong cu vawlei cung ah a um ballomi phung asi.

Constitution thlen khawh nak lam le federalism le self determination hmuh nak ding cu a lam pakhat lawnglawng a um. Mah cu atu CNF nih kawl cozah he an I el cuahmah mi ram/rem daihnak lam hi asi. Zei caah dah mah ti cun kan chim khawh? Ram/rem daihnak minsen kan thut mi bia hram domh nak hrim ah pei “Atu Ram daihnak le political biaruah nak I adongchuak he ai rual in Democracy Federal ram kan ser lai” tiah kan ti cu.

Ram daihnak lam hi a fawi maw, cabuai cung ah style ngai in tthut I hman ithlak lawng khi maw asi tiah cun SI NEMMAM HLAH. A fawi lo. Thil ttha zeitik hmanh ah afawi ballo. Asi na in mah hi lam lawng hi constitution thlen khawh nak lam. Kan ram min zong a thleng kho te ding lam asi. Atu NCA hna tlak nak ning in constitution khi kan ttial tthan asi ah cun kan ram min hmanh khi FEDERAL DEMOCRATIC REPUBLIC OF.. Asi lo ah FEDERAL REPUBLIC OF UNION OF ….Ti phun khin a kal te ding asi. Cucu constitution cauk phaw le achung ah ai tial te ding asi hnga.

Cucaah Chinland Club member pawl nih kan dirhmun hi fiangte in kan itheih I political party pawl dir hmun zong fiangte in kan theih a hau. CNF cu party le power politics a tuah mi asi lo. National politics a tuah mi asi. National politics nih cun MP sawhsawh, cozah sawhsawh khi ai tinh mi asi lo. National politics a hlawh atlin ah cun constitution thar zong a ttial khawh, ramri thar zong a suai khawh, ram thar zong a chauh pi khawh.

A cheukhat political party pawl nih cun CNF hi an mah power ngah nak caah a phunphun in an kan hman ko lai. An kan duh lo can ah an kan soi lai I an kan duh can ah an kan kawmh ko lai. An duh poh va tuah in va chim ve ko hna she. Abiapi mi asilo. Mi cheukhat nih cun CNF hi an mah an duh mi poh duh ve hna she law an huat mi poh hua ve hna she tiah an mah duhning poh in a um ding ah a ruat mi zong an um theu tawn.

Cu bantuk ruahnak cu a tenau tuk mi ruahnak asi. Miphunn minchal in DOTLA taktak in bia achim mi le dothlennak a tuah cu cu CNF lawnglawng asi. Atu ah thawng itheih chan asi bantuk in Kawl ralkap le Kawl cozah an lungput le an ruah ning zong kan hmuh, kan theih. Nizan tihni I Kawl ralkap bawizik a biachim kha zoh ko ulaw zeitluk indah a hruh le a ning hngal ticu kan mithmuh, kan hna theih asi ko khah. Tlangcung hriamtlai phu le political party pawl I an ruah ning le an sining, an quality zong kan hmuh kan theih.

CNF hruaitu pawl I an ruahning le an sining quality zong kan hmuh, kan theih. CNF/CNA nih hin kan ram I a sang bik tlang zong kan kai I a thuk bik horkuang zong kan ke in kan hrawn dih cikcek. Vawlei cung khualipi hmun pical asi mi vialte zong ah CHIN min le CHIN miphun kong hi chimrel khawh nak poh ah Washington DC, New York, London, Ottawa, Brussels, Oslo, Stockholm, Canberra, Tokyo etc etc ah kan chim, kan rel. Rangoon le Naypidaw zong ah kan kam hlei lo.

Atu lio Kawl politics I hmaisuang ai timi pawl hna nih democracy an rak au pi hlan ah Rangoon University campus, Mandalay University campus ah democracy cu Chin minih kan rak aupi ve mi asi. A donghnak taktak ah cun Ca Thun nih ka duale ca nan ti mi hi holh pei a rak si ko hi ati phun khan, Federal e, Constitutions remh e, self determination e ti I an au mi vialte khi a dongh nak ah cun CNF nih a thlurpi ah dir in a tuah cuahmah mi lawngte asi.

CNF nih a kalpi mi lam hi National politics asi caah phunghram thar, ram min thar, ramri thar a chuahpi kho tu le miphun a chanhchuah kho tuding lam asi. “ Kadua le hna, ca nan timi hi holh hme a rak si ko hi” timi bia bang, federal e, phunghram remh e an iti sek ko zong ah atu lio thil sining ah cun CNF nih akal pimi political chonhbiaknak dah tilo lam dang ka hmu lo. Note: Mah hi Chinland Club pawl bia kan iruah nak ah ka ttial cangmi asi. FB hawi le pawl ka vun inhrawmh ve hna. Credit: Salai Bawi Lian Mang

Be the first to comment

Leave a Reply

Your email address will not be published.


*