MAH CABIA CU HMULTHI ZONG ALING DIH, TUK A SUM TAKTAK

Relnuam, Zunglei rian herh ah Laizo timi khua ah khualtlawn ka thawh. Thantlang in nikhat kal bak si tiah an chim ceih ka theih bel, hnaciat thang nawn in ka chuah i ka chawi, Laizo Khua cu ka kal bel lonak a si caah khua ka phanh hmasa nak poh kha Laizo Khua kalnak lam si maw? Tiah ka van hal pah thluahmah hna, cuti cun ka khuallam cu ka peh i zaanlei suimilam 5:30 pm tluk ahkhin ka va phan.

Laizo khua cu khual dawt an thiam tuk i tlun lei khi ka huam ti lo. Zaan riah an van ka tuah piak i ka ei, ka khim in ka rian ka thawk colh lai tiah ka tim nan ka khuallam a hlat pah caah ka cei cer i tuan in ka it, ka it sin in thi thlep in zinglei tiang ka hngilh. Ka mitkut a vuai i khua a van ceu sin in ka tho colh, Coffee an ka tuah piak i ka ding dih in ka rian cu ka van thawk.

Ka rian a tam pah caah chun suimilam 11 am tluk ah ka dih. Thai thawh an ka tuah piak i khua upa pathum he bia lungduh ruah pah in kan ei, ka khim sin in a kir ding ka si caah ka thil ka tim colh, suimilam ka van zoh i 12 pm a si cang,ka cycle ah ka thil cu ka tem i khua mi zei maw zat he kut kan i tleih hnu ah ka thawh. Lam caan sau nawn ka kal hnu ah khin Tupi pakhat ka phan.

Suimilam ka van zoh i 5 pm a si cang, ka ningtih pah bu in “Tupi” chung cu ka van luh saa,vaa aw nih ka ningtih an zualter. Tlawmpal ka van kal ah khin ka hmai lamkuai ah minung pahnih an liam kha ka hmuh, mah ka van hmuh hna in ka ningtih A van i zia deuh, an sin cu ka van phan lamthlang lei hoih in an pahnih in an dir i an ka zoh lo, an hmai ah lambi te pakhat a zuang mi a um.

Kawi zeidah nan ti? Khua zeidah nan si tiah ka van hal hna i kaa khat hmanh an ka leh lo, ka khuaruah a hartuk i ka holh hi an thei lo le ma si hnga tiah khua ka ruat. Cu lio ahcun an dir nak kam ah cycle ke tum nak ka hmuh, ka cycle ke cu ka van zoh i a hmai lei ke a dor pah caah ka va kal i kawi nan cycle ke tum nak ka van i hlan ta lai hih ka van ti hna bia kaakhat hmanh an ka leh lo i keimah te in ka lak i ka van tum, ka khuaruah hartuk cang.

Ka thin hna a phang pah, Khah si le kawi kei ka khuallam a hlat caah duhsah in ka rak in kal tak hna lai, mangtha uhlaw tiah ka van ti hna i ka kal, tlawmpal ka kal ahkhin Tupi cu ka chuak. Ka hmai ah khual dinh nak dawr pakhat ka hmuh, ka rawl a tam pah caah ka van i din ve. Dawr hngaktu nu cu ka van auh i Chinset puaikhat ka van cah.

Tisa ka van i thlet i ka din pah khin khua ka ruat , atu nai mi pahnih kha zeitin dah an si hnga ka bia kaakhat hmanh an ka leh hnga lo ka ti i ruah lo le ruah lo khi ka ruat, cu lio ahcun ka sir lei ah pu tar pa pakhat lungrawk nawn i a thu mi kha ka hmuh, a sin ahcun ka van i thial ve, ka pu a ngeih chia mi,anuam lo mi na lo ko ee, na thil ton mi naka chim kho hnga maw? tiah ka van hal, cu vial ahcun putar pa cu a tap colh, tlawmpal um ahkhin ka fa naite ahkhan mah ka zawn na van pal mi Tupi ah khan ka fapa le pahnih thing an at i thingtum an leh nak ah thing nih a denh hna i an pahnih in an thi tiah a van ka chimh.

Ka pu kan tuarpi tuk ti hmanh chim kho lo in ka ningtih tuk ah ka thi hrulh, tuzaan lei ka hmuh mi hna pahnih kha mithla pei an rak si ko kha tiah khua ka ruat colh, tlawmpal ah ka hmailei ka van zoh cu dawr kaa ah an pahnih ten an dir i an ka zoh, ka ningtih tuk ah ka lu arbawm tia ah ai chuak colh, ka hmul zong an i ling dih. Keimah le keimah thaa ka van i pe pasal ayiah mithla hna cu ka tih la ka van ti vial khin an kan hnih i direct in hnu lei ah ka tlu colh, ka lu nih tang a van phanh i ,lung i ka sut bak khin ka thang. By:Popstar Tling

Be the first to comment

Leave a Reply

Your email address will not be published.


*