KHOIKA DAH DR. SASA LE DR PETER NGUN ZA CUNG NAN UM?

Where Are You Dr. Sasa & Dr. Peter? Hi ca ka ṭial tikah ka hua lai ucih. Anmah pahnih ka hua hna lo. A dang zong kan hua hna lo. Nan ka huat sual zong ah kan hua hna lailo. Kan upat mi Dr. Sasa le Dr. Peter Ngun Za Cung an tlau. Dr. Sasa hi January 20 tiang Facebook a cathlah kan hmuh. Dr. Peter hi December 27 tiang a cathlah kan hmuh.Thimnak lio ah nang maw kei tiin zuamcawh a rak si. Kan mah le kanmah heh tiah kan i do, kan i al.

February 1 in nihin ni 9 tiang an mui kan hmu hna lo. Ca zong an tar lo. An tlau. Kan herh ngaingai ko hna. November 8 ah rong phuntling kan si mi kha nihin ah cun rong phun khat kan si cang ee tiah rak kan chimhpiak te hna u. Kan mipi zong ralkap cozah dohnak ah CDC le lamzawh hun hruai hna sehlaw pei kan lungrualnak a kauh chinchin lai cu! An hruai ngam lo hmanh ah a forh tal van kan forh ve hna seh.

Ahohmanh kan him lo. Himnak hmun kawl ahcun khoika hmun hmanh a him lo. Himnak ram le vawlei kan ser hrimhrim a herh. Nan miphun, nan ram nan dawt taktak ko ahcun; hung chuak uh! MP pawl.zong chuak u, Candidates hlun pawl zong chuak ve uh! Khoi ah dah nan um. Kan ram ca ah, kan ram ca ah, kan miphun ca ah ee kan ti mi kha a tu caan hi a si ve. Zaanlei nineem ah Pathian nih Eden dum a len lio bang, Thlennak pakhat nih a kan len lio te a si. Adam bang kan i thuh sual ahcun techin fapar tiang an lo lai. Khah! I thawh uh. Lungrual caan cu a tu hi a si. Khoika Ah Nan Um? By. Salai Ṭial Hram Ling

Relchih: Ralkap Uknak Kan Duhlo Tiah A Aumi Chungin Thantlang Pastor Cheukhat An I Tel I An Chimmi. Thangtlang minung zong tuni 9,2,2020. A voihnihnak Ralkap nih uknak ningcang loin an lakmi duh lonak cu an aupi than. Thantlang um MP fel kan i ngeihmi kum 70 minung Pu Bawi Khing zong kan hmuh khawh i a telpi ve hna, hi tluk upa, lamkal hmanh ai harhmi nih mah thil a tuahmi cu upatlo awk thalo.

Thantlang MP ai cuh i teinak hmumi le Upa cheukhat an mui hmuh khawh lomi ah mipi vuivai a tam ngai. Tuni an au khuan lio ah lamlaklawh in upa tampi zong an i chap i an mui hmuh khawh an si caah upat an tlak ngaingai.Tutan duh lonak langhtermi ah pastor cheukhat an mui kan hmuh hna lawng siloin an au vemi hmuh tikah upat an phu.

An chimmi cu hiti kan tuahmi hi biaknak ca lawng siloin kan ram cahrim ah kan ti khawhtawk thatnak ding cu kan i zuam awk si an ti. Kan i telmi hi kan lungdiriam tuk tiah an chim. Rammi kan si i ram caah a tha tiah kan ruahmi cu mizei tiloin kan tuah awk kan rian si ko tiah an chimmi hi a dik tukmi a si. Credit:TTPN

Be the first to comment

Leave a Reply

Your email address will not be published.


*