KHAH FIANG CICEK IN A CHIM KO CANG HIH NLD NIH COZAH AN SER KHO LAI MAW

Tlangcungmi Tel Loin NLD Nih Cozah A Ser Kho Lai Maw? Kawlram chungah hin Pitu Hluttaw le Amyota Hluttaw fonh in cozah ser a si. Pitu Hluttaw 440, Amyota Hluttaw 224. Fonh = 664, 2008 phunghrampi ningin Ralkap thlahmi Pitu hluttaw 110, Amyota hluttaw 56. dihlak 166 = 25% 664 – 166 = 498, Kawlram chungah Myone 330 a um. Ralkap nih MP thutdan 166 a lak cang caah Myone 330 in a cuhmi MP vialte covo cu hi 498 hmun lawng a si.

Hi MP hmun 498 ah hmun 333 hmuh lawngah 664 ah 51%, a si lai i cozah ser khawh ding a si. Tlacungmi (7 States) in Pakhatnak Chin state ah Myone (9) a um caah Pitu 9, Amyota hluttw 12, Pahnihnak. Kachin state ah Myone (18) a um caah Pitu 18 Amyota 12, Pathumnak. Karen state ah Myone (7) a um caah Pitu 7. Amyota 12. Palinak. Kayah state ah Myone (7) a um caah Pitu 7. Amyota 12, Panganak. Mon state ah Myone (10) a um caah Pitu 10 Amyota 12.

Paruknak. Rakhaing state ah Myone (17) a um caah Pitu 17 Amyota 12,Pasarihnak. Shan state ah Myone (21) a um caah Pitu 21, Amyota 12, Pitu dihlak 89 le Amyota dihlak 84, fonh = 173. Tlangcungmi (7 states) Pitu hluttaw le Amyota hluttaw dihlak (173) an si. MP dihlak ah (173) kan lak ahcun
498 – 173 = 325. Tlangcungmi (7 states) tel loin rawnmi in a chuakmi MP thutdan hi 325 a si.

Cozah ser khawh dingah a herhmi thutdan 333 a si ahcun rawnmi in thutdan zeizat dah a herh kan zoh ta lai. 333 – 325 = 8. Rawnmi lawngin cozah ser khawh dingah Tlangcungmi MP thutdan (8) lawngte a herh.2015 thimnak ah NLD nih Pitu hmun ah 86% Amyota hmun ah 67% in teinak a hmuh.State (7) in Pitu 54. Amyota 48, dihlak (102) teinak a hmuh. Kawlrampi dihlak hmuhmi MP 390 a si.

NLD hmuhmi rawnmi MP 390 – 102 = 288. 2015 lioah NLD nih a hmuhmi rawnmi MP thutdan cu hmun 288 a si. 333 – 288 = 45, Tlangcungmi MP thutdan 45 he fonh in cozah ser a si. NLD cozah nih kum khat kum hnih a vun kalpi ah Tlangcung miphun hruaitu pawl nih NLD hi kan duh ningin ram hruai a timh lo, Federal kong zong a chuakpi duh lo an ti i anmah miphun party tanh hram an thawk cio.

2020 thimnak ah cun tlangcungmi kan um ti lo caah NLD nih cozah a peh kho ti lai lo, party dang he alliance a kan tuah te lai tiin ruahchannak a ngeimi zong an um ve.Thenkhat nih 2020 thimnak ah NLD nih a tling kho ti lai lo caah kannih pawl kan ifonh lai i cozah kan ser lai tiin atu in tonnak a ngei lengmangmi party tampi zong an um.

2015 in nihin tiang NLD cozah hruainak le riantuannak vialte mipi hmaiah a lang dih.NLD cozah hlanah mipi caah thil țha pakhat hmanh an hmuh bal lo caah 2020 thimnak zong NLD pek than ding timi mipi lungthin ah a um rih ko. State kip Reporter pawl interview an tuahmi ah hmuh lengmang a si. Miphun hruaitu pawl nih cun NLD hruainak cu a țha lo kanmah tein khuakhang lairelnak a um khawh nakhnga kan miphun party min in kan cawlcang a hau an ti ko nain an mipi nih an zumh hlei lo, NLD cozah nakin uar deuh dingmi party le hruaitu hi an hmuh rih lo.

Miphun party nih state ah teinak a hmuh zongah centre cozah cu NLD cozah a si than ko lai caah miphun party nih teinak a hmuh zong san a tlai lo timi an hngalh dih cang.Party tampi an dirh cio i thimnak zong an lut cio lai nain MP hmun teinak cu tlawmte lawng a si lai.2015 lioah tlangcungmi NLD MP hmun 102 teinak a hmuhmi zat a hmuh ti lo zongah 2020 thimnak ah NLD nih Pitu le Amyota Hluttaw hmun tamdeuh cu a hmuh țhiamțhiam ko lai caah Alliance tuah loin NLD nih cozah a ser khawhnak lam tampi a um ko. Catialtu:Laiki Chozah