DR. SUI HINGZ: KAWL HI AN RAK ZER NGAI, KAWL ZER LE ZAWNG ZER AN TI BANG

Kawl hi an rak zer ngai. “Kawl zer le zawng zer“ ti bang. Mitlet thiam mi an lo. Myanmar Investment Law (MIL) a rak ser lio ah State cozah pawl Nawlngeihnak covo kan pek hna a ti nain zei tin dah a mer dih than ti ahcun i Chapter VI, section 24 (h) ah State and Region pawl kha 5 million tiang ramleng investment permit peknak nawl le covo -Nawl ngeihnak thencheuhnak (Kawl in cun လုပ်ပိုင်ခွင့်- Mirang in cun a fawinak in allocate power) an pek ti in upadi an ser.

Asinain zeitin dah an mer than dih ti ahcun investment luhter tik ah investment permit le endorsement ti in phun hnih in a then i permit timi cu investment a duhmi paoh kha MIL upadi ning in Myanmar Investment Commission (MIC) nih maw State le Region Investment Commission, tcn.. ah Chin State Investment Commission (CSIC) tbt, Yangon Region Investment Commission (YRIC) tbt nih pek a si. Endorsement tu hi cu MIC (main) lawng nih peknak nawl a ngei.

Endorsement cu MIL i Chapter XII le Chapter XVII chung i Section 75, 77 and 78 of the ngunkhuai pawl -income tax, commercial tax le Customs Duty tbt pawl luat a duh paoh nih cun MIC ah sawk siseh an ti tik ah ramchung ramleng investment a bik in foreign direct investment paohpaoh nih cun endorsement in tax le duty luat cu an duh dih tik ah MIC lawng ah an sawk.

Cozah vawlei hman an duh zong ah cozah factory le enterprise pawl hlan le cawk an duh zong ah MIC ah sawk a hau. USD 5 million tiang investment a si zong ah State ah sawk ti lo in MIC lawng ah ngunkhuai luat duh ah sawk a si i State pawl i Investment Commission cu an active lo ngai. An cawlcaang bel lo i hodah member a si hmanh an i thei lo.

Chief Minister pawl hi mah le State le Region i Investment Commission hotu an si. Investment le trade policy te hna upadi te hna theih setsai lo in expert zong chiah lo in an form i ramchung ramleng investment pawl zong an lem thiam hna lo. A taktak ahcun Zone 1, 2, 3 ti in then a si i zone 1 kan si i kum 7 chung (incentives phun khat a si mi) ngunkhuai na luat lai ti lawng chim an thiam. Kum 7 cu chim lo kum 15, 20 a pek hna hmanh ah an ra lai lo.

Ti, mei, lam tbt a thangcho lo. Cu nak cun vawlei ciinthlaknak le satil zuatkhalnak ah vawlei free in kum zeizat kan in pek/hlanh hna lai ti bantuk pawl le Regulatory framework tha te in kan i ser piak hna lai tbt in lem deuh hna seh law a va tha deuh tuk hnga.Cozah a zernak cu Decentralize ka tuah ti phun i State le region pawl Nawlngeihnak kan cheuh hna ti phun i upadi cu aa i tuahter nain Endorsement nan duh ahcun ka sin ah central ah ra uh a ti than i State le Region pawl cu kan thluak a kan merh dih.

Endorsement hoi hna hi sullam a um lo bak a si. Power Centralize a duh caah power play a tuahmi a si. Ramchung ramleng investment permit $5 million tiang peknak nawl kan ngei ti lawng an i theih i a ho hmanh nih kan sin ah an rak sawk taktak lai lo ti hi an i theih hnga dik maw? State Cozah kha investment na pek khawh tiah upadi cu a ser nain khat lei kam ah incentive pawl a si mi tax na thumh kho lo tbt le Vawlei na hlan kho lo tbt te hna hi cu federal he aa ral kah taktak mi a si.

Ramkulh, ramthen cozah pawl zong nih a bik in State cozah pawl nih zei an i theih lo, tender ah an i za men. A ngai ngai ahcun Ramkulh palimen (State Parliament) ah mei lak in ceih hnu ah Nawlngeihnak pawl kha central cozah ah cabinet ah maw hluttaw ah maw MIL amendment hi hal ding a si. Mah pengtlang i vawlei le achung um thil (resources) hmanh mah te in tawlrelnak nawl ngeih lo hi cu a va poi ko. Chin State cozah cu Chin mipi le Chin ram caah a dir awk a si.

Central cozah (baho) nih zeitin dah an kan nek le an kan deh timi kan i theih lo.Hmailei ah Federal an kan pek hmanh ah nawlngeihnak covo hi kan kut cung ah a um taktak maw ti hi tha tak in zoh lo ahcun khatlei kap in a rak kan temtawn/hren than lai. Nan ruahnak le hmuh ning comment cio ah a tha lai. Credit: Sui Hingz