CNLD LE CNF HRUAITU HNA MOSES BANGIN KAN HRUAI ULAW KAN DIRPI RIH UH

Moses bantuk in kan hruai ulaw kan dir pi rih ko uh CNF/A le CNLD hruaitu hna. Isreal miphun kha Izipt ram ah kum tampi salah an rak tang, sihmenhsehlaw Pathian nih Izipt sal si ter peng a duh hna lo. Ram a pek mi hna kanaan ramcoter kha a si. Pathian nih Moses hmangin a pek mi hna kanaan ram lei ah Isreal miphun cu a hruai hna.

Thetse ram car an phak ah Izipt ralkap nih an rak doi than hna Isreal mipi nih a theih tik ah kan thi dih lai an ti Moses cungah an phunzai Izipt ram i rak thih hmenh kha a tha deuh an ti. Exodus 16, 3 Bawipa nih Izipt ramah khan rak kan that lawlaw sehlaw kan duh deuh hnga. Izipt ram ah khan cun sa um hram ah kan tthu i kan duh zat in rawl kan ei.

Sihmenhsehlaw a tu cu hi ramcar chungah hin nan kan chuahpi i rawltam in kan thi dih cang lai an ti. Isreal mipi zong nih Izipt sal si i rawlthaw ei kha le Izipt ram ah thih an duh deuh kum tampi sal an si cang caah sal lungput an ngai cang. Cu ve bantuk in kan nih Chinmi zong kan si ve. Kan thinlungah sal sinak lungput kan ngai. Mah ruangah Kawl sal si peng, kawl cozah tang um peng kan duh rih.

Sihmenhsehlaw cucu Pathian nih a kan duh piak mi a si lo. Chinmi a kan hruaitu CNF/A le CNLD hruaitu cungah Isreal mi bantuk in kan au khuang ve. Sihmenhsehlaw na lungdong hin hlah uh Moses zong nih lungdong loin a hruai hna i a mah chan ah Pathian nih a pekmi kanaan ram an co lo nain Joshua chan ah cun kanaan ram an co ko. Chinmi zong nan mah chan ah kan duhmi mahte khuakhan lairelnak kan hmuh khawh lo zongah nan tu fa chan ah cun kan hmu ko lai.

Moses bantuk in kan hruai rih ko uh. Pathian nih miphun pakhat in ser mi kan si bantuk in ram zong a ngai mi miphun kan si.Pathian nih kanaan ram co nak dingah Izipt mi a hmang hna lo an mah Isreal miphun Moses kha a hman ko. Kan nih Chin mi zong Mah te khuakhan lairelnak kan hmuhnak dingah kan chin miphun kan Chin minung kha an hman ko hna lai. Zeitik hmenh ah kawlnu kawlpa kha a hmang bal lai lo. By JB Cung.

Be the first to comment

Leave a Reply

Your email address will not be published.


*