CNLD HI CHIM MIPI NIH DIRH MI PARTY AN SI LO. THATEIN REL HMASA

CNLD Hi Chin National Party (Mipi Nih Dirhmi) An Si Lo, Cucaah Chin Mipi Nih Chin National Party Kan Dirh A Herh.Kan tlangtar nan vun rel tikah micheu cu nan lau ngai men lai. Nain micheu nih a vun fiang colh kho zong nan um ko lai. Zeiruang ah dah hi tlangtar hi ka van ithawh tinak kha a tanglei ahhin langhter in ttial khawh kan van izuam lai.

Atu Chin State ah hram a bunhmi Chin National League For Democracy (CNLD) Chinram a ummi party pathum ifonh in an dirhmi party a si ko nain Chin Mipi nih kan dirhmi party an si lo. Khua, Tlang, Peng le Chinram huap in palai thlah in dirhmi party an si lo. An min ah Chin an iti sawh caah a si. Chin aitel caah Chin National Party a si tinak zong a si lo. Kawlpa zong nih a party min ahcun Chin zong a telh khawh men ko.

A biapi mi cu Chinram chung um le ramleng ummi Chinmi vialte nih kan lungtlin i kan dirhmi an si lo. Pumpak pakhatkhat nih NGO bantuk in a dirh i rianttuan a hawile or an caah a ttha dingmi minung kha ai sawm hna i an dirhmi a si. Amah nih Chin Mipi aiawh an i ti men lai nain Chin Mipi caah kan aiawh kan ti kho hna lo. A ruang cu CNLD party chung cawlcanghnak le khuakhan lairelnak le biachahnak ah Chin Mipi zeihmanh kan i thlak kho lo.

Kan duhmi chimrelnak lam zong a um lo. Cucaah Chin Mipi nih dirhmi Chin National party a si kho lo. Cu tikah Candidate thim caan a phak tik zong ah mipi nih kan duhmi candidate zong kan chim kho lo. A ngeitu, a dirhtu kha pumpak pahnih khat an si caah, anmah duhning in party zong an kalpi. Cucaah thimnak a hung naih tikah an party chungah candidate hmun an hung icuh, pakhat le pakhat kar ah hmuhthiamlonak a chuak.

Lunghrinhnak a chuak, tthutdan tha an duhnak ah anmah party chungah politics chia a lut. A hlankan in a dirhtu hna nih thutdan ttha an ichiah ti bantuk tiang thawngpang a leng. Cu thawngpang cu mipi nih van theih cio a si tikah CNLD cungah lunghrinnak, lungtlinlonak, zumhlonak tiang a chuahter. Cucaah Salai Lungthlitum nih “Chin National League For Democracy (CNLD)” nih democracy an aupi nain anmah party chung tu ahcun Democracy a um lo, Communist, dictator system an hman” tiah a tthuat hna.

Hi bia hi ruah tikah a dikmi a si. Thutdan ttha deuh an i ham zong cu mawhphurh awk an ttha ve lo. Anmah pumpak nih an dirhmi a si, party caah an dih heu mi zong a tam deuh kho. Kha vial in CNLD kong cu siseh rih sehlaw nanmah nih hei tuaktan cio te ko uh.Chin Mipi Dirhmi Chin National Party A Um A Herh: A cunglei ah kan chim cang bang in a tu ah CHIN min a keng/pumi hi Chin mipi aiawhtu, Chin mipi duhnak le khuakhan lairelnak in a kalmi party a si lo caah kan vote tik zong ah kanmah duhnak in an kal kho hlei lai lo.

Cucaah Chin Mipi nih kan aiawh in cozah a kan tlaihpiaktu, Centre cozah sin kan duhmi an kan chimpiaktu, a kan halpiaktu, kan duhmi thlennak a nawr ngamtu le Chin mipi nih zapi hnatlak in khuakhan lairelnak in a kalmi party pakhat cu kan ngeih hrimhrim a herh. Cu party dirhnak ahcun Khrihfabu or a si lo ah CBCUSA, CYO, pumpak an si zong ah Chin Mipi vialte kha meeting auh i ceihpi ding.

Khua pakhat in palai pakhat cio kha, Tlang or Peng (myone) ah auh i cu ahcun ttuanvo latu buu ser, cu hna cu Chin huap ah kalter. Chin Huap in ceih i a ttha an timi, Min le biachahnak pawl kha hman ding si ko. Nan van fiang kho dek maw? A fian deuhnak a lam tampi careltu nih nan theih ko lai. Ka chim duhmi cu Khua, Tlang, Peng le CHIN huap in palai an um hna lai i cu hna nihcun biachahnak an hei tuah cio hnga.

Cu Party or Buu cu mipi nih an hna a tlak i an fehter a si ahcun a herhmi cu rianttuannak, a herhmi cu mipi chung ah kholh or Khrihfabu zong nih zeimawzat bawmh, ramleng organization le CBCUSA ti bantuk zong nih bomh. Thimnak a rak phanh tik zong ah Chin mipi nih kan duh cio mi kan chuahpi hna lai. Khua,Tlang, Peng le Chin huap in kan chuahpi hna lai i mitam u nih an duh bikmi kha candidate caah an va si hnga.

A fiangmi cu candidate ca kha CHIN mipi nih kan thim hna lai caah, cu pa, cu nu nihcun kan duhning in rian an ttuan deuh hrimhrim lai. Cun Chinmi vialte nih vote pek dih awk zong a ttha cang. Rian an thok tikah mipi nih thimmi, mipi aiawh in thlahmi an si lai caah kan duh, kan herhmi, an kan chimpiak lai, dirkamhtu a ngeih tikah a ral a ttha lai, mipi hmai a zah hna lai i chonhbiak tiang a fawi lai.

Mipi nih kan duhlo bikmi eihmuarnak (Corruption) kong zong ah a thianghlim, a ttha bik in kan thimmi an si lai caah a tlawm deuh lai. Mipi nih kan thimmi candidate cu cozah an tlaih tik zong ah a zeizongte ah a ttha deuh hrimhrim lai. Cucaah Chin Mipi nih a thar in CHIN Mipi vialte ai a kan awh khotu, Chinmi vialte nih ceihkhan in lungtlinmi party kan dirh hi a herh ko rua tiah ka ruah.

Note: Ka chim duhmi kha nan vun fian ka zumh ko. Chin Mipi vialte kan lungtlin in kan dirhmi party a um a herh ti kha a si. A dirhning le a tawlrelning cu mifim, thiamsang Chinmi kan pale tampi an um ko i anmah an va thiam deuh lai. Cattialtu: Satalin Tha Cung Lian