CHEUKHAT KAN PASTOR TE CU BIBLE SULLAM AFIANG LOMI AN TAMTUK

Trump ttanhtu pawl hi Biden a ttanhtu pawl cungah bom chehdan nan thiam deuhdeuh. Atu tan US thimnak ah Trump a ttanhtu pawl hi, Laimi (Chinmi) lakah cun 100 ah 90 hrawng nan si men lai. Biden ttanhtu pawl cu zatuak 10 hrawng kan si men lai hei ti ko uh sih. Nan tamdeuh ruangah nanmah kha nan hmandeuh hlei lo. Nan tamdeuh ruangah a piangthar deuhmi nan si hlei fawn lo. Pastor te le vawlei lei hruaitu karlak zongah nan tamdeuh ruangah nan hman deuh hlei lo ti kha philh hlah uh.

Kan hman deuh ko ti nan i ruah ahcun nan palh cikcek lai/nan molh bia a si ko lai. Trump ttanh ding le dirpi dingah pastor cheukhat le vawlei lei hruaitu cheukhat nih hehtiah Laimi (Chinmi) an in forhmi hna le nan thluak an in ttawlmi hna cungah anmah ka mawhchiat ngai cang hna. Aruang cu Trump ttanh ding lawng an in forh hna i ttanh ziathiam ding an in cawnpiak ti hna lo. Biachim holhrel thiam ding le i sum ding zong an in cawnpiak ti hna lo.

Media le facebook le comment pek le ttial ziathiam ding zong an in cawnpiak ti hna lo. Mah i a phichuak cu, Trump nan ttanh ruangah nan Khrihfa nun ziaza a rawk dih cang. A dawh tukmi, Khrihfa biaknak muisam le a ttha tukmi a sullam zong nan hrawh dih cang, Trump ttanhtu pawl nih. Trump nan ttanh ruangah facebook chungah hehtiah Biden a ttanhtu pawl cu bom in nichiar te nan kan cheh lengmang ko. Trump nan ttanh hnu ah facebook le media chungah bom cheh nan thiam deuh.

Khoika dah bom cheh hi nan va cawng manh hnga ka ti. Tang 4 le tang 5 awng lo, ABC ttial zong a thiam lomi pawl nan tam nan facebook chungah cun bom cheh nan thiam ngai. Biden a ttanhtu pawl zong kan tlawm te nan Israel cozah bantuk in kan thawngtuk ve i, Trump ttanhtu pawl nih bom in nan kan cheh lengmang nan kan i kham khawh lengmang ve ko. Musalim ram 5 hrawng nih Isarel ram cu hehtiah an tuk i bom in an cheh len nan an tei kho bak lo bantuk in Trump ttanhtu pawl nih Biden ttanhtu pawl, mitlawm te cu nan kan tei ve lo hi aw.

Trump ttanhtu pawl nih Biden a ttanhtu pastor le vawlei lei hruaitu zong hehtiah holh dawh lo, biachiakha in nan ti len ko hna. Atak te cun mah hi nanmah thluachuah hmuh lonak ding fawh a si lehlam ko cu. Hmailei nan lamthluan ah khua awng pem lonak ding fawh a si lehlam ko cu. Biden ttanhtu pawl nih Trump ttanhtu pawl i nan catialmi tangah comment (khawmenh) zong kan in pe bel hna lo.

Biden kong zong ttial ti hlah uh ti zong in kan in ti fawn hna lo/kan in thlauh hna lo. Nannih cu nan i thawh i Trump kong ttial ti hlah nan kan ti len. Aho nih dah kan cungah nawlneihnak an in pek hna? Nanmah nih mi cungah nawl neihnak pakhat hmanh nan nei lo. Trump ttanh ding le dirpi ding in an forhtu hna pastor cheukhat le vawlei lei hruaitu cheukhat le Trump ttanhtu cheukhat cu Osama Bin Laden le a minung pawl, US innsang pi pahnih, vanlawng in a pah hnawhmi hna nan lo ve cang hi aw.

Nan hruaitu pawl nih bom cheh dan an in cawnpiak ve hna rua ka ti. Trump nan ttanh hnu in fawh facebook chungah bom puah/bom cheh nan thiam deuh ko hi. Biden a ttanhtu pawl nih nan pumpak kong zong kan tial bal lo i nan pumpak zong in kan in ti bal hna lo nan hehtiah Biden a ttanhtu pawl cu ka pumpak zong in nan kan ti len. Kan nih cu “Trump ttanhtu pawl” timi biafang lawng kan hman ttheu. Nan pumpak min hrim in kan in ti bel hna lo.

Mah zonghi thuk deuh le fak deuh in ruat uh. Trump ttanh ding in an forhtu hna nan pastor cheukhat le vawlei lei hruaitu pawl, forhfial kan duhmi hna cu nan za tein nithum chung rawl ulh thlacamnak le cawnpiaknak rak nei uh/rak tuah uh. Nan duh le keimah zong sawm khawh ka siko. Facebook le Media ah mi bom cheh hnawh lo ding, le khawmenh le cattial dan thiam ding pawl kan cawnpiak hna lai. Biachim holhrel thiamdan zong kan cawnpiak hna lai. Hehtiah thla zong kan campi hna lai.

Mah vialte hi video in Trump vote pek ding an fialtu hna pawl nih an tuah lo cu. Laimi (Chinmi) nih kan theih awk ah ka duhmi cu cheukhat kan pastor te cu cawnnak zong an nei ko nan mah Bible cang nih zeidah a chim duh hnawhchan le a sullam a si ti a thei lomi le a fiang lomi an tamtuk. Bawi Zisuh nih zeituah dah a kan cawnpiak i vawlei i a ratnak aruang le a zultu pawl nih kan tuah ve ding pawl zong an i fiang lo/an thei lo.

Cheukhat pastor cu ruahnak bituk in an in kalpi ko hna lai/an in cawnpiak hna lai. Mah kha a thabik ah nan ruahsual men lai ti ka phang. Mahti ka chim tikah pastor te upat lo le ttihzah loah nan ruah men lai. A san lo. Laimi chungah mah bantuk pastor phun cu kan tam reng2 cu, ruahnak a bituk le cawnpiaknak bituk in a kalmi le Bible a fiang huaha lomi. Pastor te cu ka hawi le lawngte an si ko i ka upat ko hna, Pathian rian an ttuannak cungah. Trump ttanhtu pawl, Biden a ttanhtu pawl cungah bom cheh nan hmangmi hi ngol cang uh, kumthar 2021 chungah cun. Credit: Van Tum

Be the first to comment

Leave a Reply

Your email address will not be published.


*