BIAHALNAK ATAM CAAH KAHMUH NING TAWITE KA VUN TIAL VE LAI

NUG, PDF le Tlangcung hriamtlai pawl hi an i ready cang le maw asi hnga ralthawh dingin thawng an thanh (declaration of war) hi asi hng? timi biahalnak le ral biatak tein ram pumpi ah thawh taktak an i tim cang timi biahalnak pawl hi tuzing Facebook cahmai ah a khat kho taktak. Hi kongah ka hmuh ning tawi tein ka vun tial ve tuah lai.

A ngai tak lo ahcun Ramchung ral (civil war) timi ahhin mipi i ready le ready lo, hriamtha ngeih le ngeih lo, training kai le kai lo hi biapi asi lo, minung pakhat duhlonak in mipi sinah a vun i thokmi thil khi asi ko. Phundang in chim ahcun meithal pakhat in raldohnak thok i meithal ngeimi cozah kha chuh i cuticun ramkang bantuk in alhter thluahmah in rampumpi lawnter dih khi asi ko.

NUG, PDF le Tlangcung hriamtlai phu pawl nih an i za in meithal an i ngeih le training thatein an kai hi hngah ding asi lo, kan i manh cikcek tiang ral kan tho rih lai lo ti ding asi lo, cozah ralkap kha um awk thiam loin tuah zungzal i timh ding asi. Vanlawng le missile lawng in ralkap hi tei dingin ruah ding zong asi lo, ralkap cu an camp (sakhan) in an chuak bakin an lamh mi vawlei paoh khi an caah ral lawngte an si dih kha philh piak lo ding.

An i bochan mi zeihmanh a um lo an meithal zong an i bochan lo an cunglei bawi pawl tih ah le zaamnak theih lo ah a phung men in meithal an tlai timi kha theih ah a tha. Ralkap hi kan tei hnalonak bik thil cu Kum 70 chung kan thluak an kan tawl cangmi kha asi bik, an hriamnam le fimnak hi asi lo. Tlangcungmi sinah “Divide and rule” timi an hmang i Kawl sinah “Burmanization” timi an hmang i Kawl pawl nih tlangcungmi cu miphun nauta deuh hmuh in a kan hmuh thai.

Cucaah tutan ahhin NUG pet an si ah CRPH an si pet ah i bawm ding kan si ko nain lungfim ngai cu kan herh lai. Tutan ramchung ral ai thok cang an timi hi lau awk tuk ahcun ka ruat lo, zeicatiah huamsam tein a kal ceomau dingmi asi. Teinak cu hriamnam that le tlawmtam ah ai hngat lai lo zeitluk in mipi an i lungrual, zeitluk in mipi an i pumpek timi le an lung a dongh khawh lo timi pathum ah khin teinak cu ai hngat te lai. Credit: Rawn Chin.

Be the first to comment

Leave a Reply

Your email address will not be published.


*