ZEI THEI LOIN TIKIR DAM KONG A CHIMMI PAWL REL CANG UH KHAH

Tikir Dam Ai Thokning By Pu Ram Khar. Tikir Dam hi tthenkhat ruahnak ah Vice President Pu Henry Van Thio rian attuan hnu lawngin ttuanchuahmi ah kan ruah. Arak i thokning tak cu mah ti hin a si. 1998 kum lio ah hin Tikir khua pawngah a ummi Tikir Kual timi hmun hi hmunhma rem, hmunttha, hmundawh asi caah hi lio ah Pah Wa Tah ( Ohkathah) a rak ttuanmi ralbawi Bohmuci Tan Aung nih a ke bak in nili kal in a rak zoh hmasami asi.

Hi lioah hin Motor lam zong a um rih lo. Cu hnu ah amah a chawngtu, Pa Wa Tah (Ohkatthah) a si vemi Bohmuci Tan Win nih a rak zoh i Tikir Kual ( Tikir Dam tuahnak hmun) hi ka hmuhmi hmunhma vialte ah hmunhma dawh, hmunhma ttha bik a si tiah a rak chimta mi ti asi. Hi lio ah hin Tikir hi Thantlang peng chungah pehtlaihnak lam le sul lei ah a rak chiat bik caan a si.

Cozah lei zong nih hnu rak chit mi khua asi. Aruang cu pehtlaihnak a chiattuk caah asi. Tikir Dam tuah khawhnak dingah cun hawi hlan cem ah lam a pem hmasa ahau ti asi caah 2003 kum ah Nahtahlah zung lei in TIkir le Hriangkhan khua kar lam cawhnak ah tiin sing 272 an rak thlak. Cu zong cu an rak chuh tthan hna. Culawng silo, kum 2013 ah Myat Nu Thu company nih Tikir le Hriangkhan kar lam cu a free in an rak cawhpiak tthan hna i, an lim hlan ah an ngol tthan hoi.

Cu hnu cun a hung um tthan i Pu Henry Van Thio (Bohmu) nih Pensen alak hnu ah Cozah sinah Tikir Dam tuahnak ding halnak ca a rak chiah. Cu hnu ah Kawlram President zung in 2013 kum ah Tikir Kual (Dam) tuahnak a tha maw tha lo timi Servey tuah ding ca an rak chuah. Mah hnu cun USDP cozah kai hnu 2013-2014 budget kum ah Tikir Dam tuahnak ding caah phaisa sing 2000 an rak thlakpiak hna.

Cu zong cu Tikir Dam tuah loin Thantlang Peng Lautu lei khua 4 ah sing 2000 cu Lei Ti Lam tuahnak ah tthenphawt tthan an si. Dam tuahnak ah hman a si hoi lo. A liamcia caan zeimawzat ah hin Thantlang Peng ah pehtlaihnak Lam le Sul lei ah hin MARA Tlang le Bualpeng hi hawihnu ai thlaimi, a chia bik mi Pengtlang an rak si. Kum 2015 NLD Cozah a hung kai hnu in kanpa Pu Henry Van Thio nih a liamcia caan zeimawzat lio i Tikir Dam tuahnak dingah timhtuahmi vialte cu a thar in a van pehzulh tthan caah Nihin ni ah DAM cu tlam ahung tling.

Tikir Dam tuahnak hmun cu hmunhma ttha/rem a si caah Japan ram in a rak tlungmi Mr. Terumi Taka Oka nih Tikir Dam le a pawngkam a zoh tikah hmailei thil a hmuh colh. Hi hmun hi hmailei caan ahcun ramchung ramleng khual an ngamnak (Tourists Attraction) hmunnuam ah a cang te lai hihi a hmuh colh. Amah pumpak in kawlram ah a um ballomi Thingkung Maple Kung 3000 le Japan Cherry Kung 1400 cu Japan ram bak in arak phurh i amah bak nih a rak cinpi hna.

Nihin Ni ahcun duhnung ngai in an nung dih, Zetluk lunglawm dah asi. Thantlang Peng Bualpeng hi NLD cozah kai hlan a sining ruah ahcun lungfak tuk a si. Hawi hnu ah rak kaltakmi peng le tlang a rak si. Voitam pi cu tthanchonak lei nih kaltak a rak si. Nihin ni ah Hi dirhmun an phakmi hi Pathian thluachuah asi hrimhrim ti hi kan theih awk a si.

Tikir Dam kongah hin bia vaivuan tampi a chuak tawn. Kanpa, Pu Henry Van Thio zong asi lo ningpi in an tinak a um tawn. A ngaingai ti ahcun Tikir Dam hi Tikir khua ca lawng asilo. Bualpeng ca lawng zongah a si fawn lo. Thantlang Peng kan dihlak ca asi. Chinram ca zong a sifawn. Nihin ni ah cu ruahnak cu kan hmuh khawh rih lo hmanh ah a ralaimi caan ahcun kan hmuh te hrimhrim ding si.

Tikir Dam bantuk hmunhma rem le a tthami hmun a um si cun rak chuahpi cio uh. Hal khawh le tuah khawh i zuam hna usih. Thantlang peng Farrawn khua zongah hmunhma an rak zoh nain a rem deuh lo an ti. Hmunhma dang theimi le hmumi nih ruahnak zong rak chuah cio dingin kan sawm chih hna. Kan Chinram, Thantlang Peng, Bualpeng, Tikir khua hna i Tikir Dam pi a hung um khawhmi hi kan biak Pathian thawng asi titu hin kan ruah deuh ding asi. Pathian thluachuah a si tiin ruah khawhtu hi a biapi cu a si. Cattialtu. Pu Ram Khar. Thantlang Sipin Lutlai.

Be the first to comment

Leave a Reply

Your email address will not be published.


*