ZASANG CINZAH: UNION OF BURMA A DIRHTU AH CHINMI KAN PALE AN RAK I TEL

Union of Burma a dirhtu ahhin Chinmi kan pale an rak itel. 1947 ah min an thut. Union an rak dirh lio ahhin biahrenh an rak tuah chihmi cu, Union hi Unitary/centralization System in kal hmasa in, Kum 10 hnu ah Federal System in thlen hi a si. Asinain, 1962 Newin/Ralkap nih uknak an lak caah an biahrenh cu a tlau. Cu a tlaumi Federal System cu, atu kan pale nih khel cuahmahmi cu a si.

Chin miphun nih Union of Burma in chuah tthan ding an khel bal lo. CNF zong nih Union in chuah ding an khel lo. An khelmi cu Union an rak dirh lio i, Kum 10 hnu ah Federal System in kan ihruai lai timi, Federal System kha a si. Hmailei ah Federal System cu hei hmuh usihlaw, U.S or Canada 🇨🇦 bantuk hi kan si hnga. UNION of Burma cu, USA sisehlaw, Chin State cu Indiana, Texas State tibantuk khi a si ve lai.

A sullam cu Burma 🇲🇲 rammi kan si peng thiam ko lai tinak a si cu. Cucaah, a biapi ngaimi cu Union of BURMA a huapmi Party ahhin Chinmi kan pale an itel hi a biapi tuk. Union of Burma ah hruaitu/uktu dirhmun hi an tlaih ve hrim a herh. 2015-2020 karlak ah Chin miphun chung in Union of Burma ah Vice President/Henry Van Thio a tthutmi nih zeitluk indah Chin miphun kan hmai a hngal i Chin ram caah a tthat ti cu, ngakchia upa dihlak theih a si.

Tulio ah Union of Burma a huapmi parties lak ahhin a nganmi cu USDP le NLD an si. USDP cu Ralkap in a rak chuakmi a si caah Mipi thinlung an hip kho ti lo. Cucaah, NLD hi a chan sau rih dawh a si ko. USDP le NLD hi Kawl Party tiah an auhmi hi a diklo. National Party an si. CNLD hi local party an si ve. Phundang in chim ahcun, USDP/NLD hi Union a huapmi Party an si i, CNLD hi Chin State te lawng a huapmi Party an si.

Cutin a si tikah, Chin State te lawng a huapmi Party ahhin Chinmi dihlak um dih usihlaw, Chin State cu, Union tang ah a ummi a si thiam fawn tikah, Union of Burma a hruaitu Kawl or tlangpar dang uknak tang ah thiam ah um kan si hnga. Cucaah, Union of Burma uknak ahhin kan pale an itel ve lawng ah, Kawl he Union kan uk tti lawng ah Chin fang khat, Kawl fang khat timi kha a tling hnga.

Note: State Government sernak siloin, Union Cozah sernak ah Chin kan pale an itel ve a herh zia view pakhat in ka langhtermi a si. UNION ah kan um vek hnu ahcun, Union hruaitu ahhin kan itel ve hrim awk a si timi hi ka ttial hnawhchanmi cu a si. Credit: Zasang Cinzah

Be the first to comment

Leave a Reply

Your email address will not be published.


*