YLA PAWL A TTHUAT CANG HNA, SANGAU YLA PAWL RAK KA LET UH ATI CANG HNA

Young Lai Association (YLA) Sin Biahalnak. Naicikua ka Facebook kuangah Kyaw Kyaw thihnak rumro a hung lang i um siarem lo ngai in a ka tuai. Phunglut media riantlai ka si lo caah hlathlainak ka tuah lem lo, nain nihin tiang Kyaw Kyaw thihnak kong cathanh le catial ka rel tikah, ka dirhmun van chim ka duh ko. Cucaah YLA nih cathanh nan chuah mi ah phunglam nan ngeih mi kong fianh hau a um pah rua, tiah ka ruah caah, biahalnak van thlak chih ka duh ngai.

Sangau pengkulh chung tizu ngacel zalhnak kongah phung le lam nan ngeih mi kan fianh u. Kan ngeih mi Tiva humhaknak ah, Bomb, Ngakah bawh le ruh, Dynamo, Lenkhang, Siivai etc., lawng nan langhter. Hi nan kham mi lonh le buar in a pah mi cungah zeibantuk dantatnak tah pek ding phung (law of punishment) nan ngeih timi fianh a um lo. Kyaw Kyaw dantatnak pek mi kongah, mauphek in voihnih-khat an tuk timi hi, muicawl (video) chimmi he kalhnak a um.

Kyaw Kyaw riahnak thlaam ah YLA minung zeizat dah a kal? A kalmi dihlak nih voihnih cio an tuk timi hi biadik (the truth) a si maw? Cun mauphek nan timi zong hi bia dawhnak sawh a si sual maw, an tuknak hmavual zoh ah mauphek hmaneh cu a lo ruam lo. Cun nan cathanh ah mitiatum lo a si caah faak zong in kan tu lo nan ti, sinain minung taksa ah hmaneh tiang langh khawh hi, dinte cu a si bal lai lo.

Cucaah chirhchan tha (strong evident) a si khawh nakhnga, an tuknak fung hrimhrim kan tarpiak u. Palik (police) kutlaih fungpum (baton) phun hna a si sual maw? Fianhnak tuah a herh deuh rih in ka hmu. Aruang, minung nunnak tiang a liam caah tukhremnak hmanrua nih biachahnak lairel ding a biapi lai. YLA nih sualhuah Kyaw Kyaw a dam lo ti hngalh ko nabu in tipi chung nan pilter mi hi nuhrin nawlvo nan buar a si.

Midamlo a si tiah, mithmuh kuttawngh a si ko mi tipi chung nan luhter i nga nan charternak aruang fianh a phu. Zeirello phun khat a si. A nun man (life value) nan ngeihter lo khing khi, mit nan chinhkanh khing a si. A damlo bu in nan charter mi “nga” hi nan hlonh maw, nanmah nih dah nan ilak? Aho sinah dah “nga” hi a phak ti zong fianh a hau. Nun pek (sacrifice) in a char mi “nga” a phaknak nih bia tampi a chim fawn lai.

Mithi (Kyaw Kyaw) chungkhar he nan kar ah pehtlaihnak tha le hnatlaknak kan ngei nan timi hi lih a si in ka hmu. Zeicahtiah, Kyaw Kyaw hringtu a nu Pi Ci Pen nih ka fapa ruak laak dingah minung ka thlah hna i a ruak an rak pe duh hna lo. Sangau ah rak vui hrimhrim hlah u, tiah ka ti ko hna nain an vui, kan hnatlaknak a um lo, tiah CBN biahalnak ah a chim. Hihi hnatlaknak (consent) phung nan buai a si caah, nuhrin covo nan buar a si.

Mithi chungkhar lih nan chimter hna zong a si. Cucaah kaphnih hnatlaknak catlap (written consent) a um le um lo zong na kan fianh a hau lai.A thihnak hi lung zawtnak (heart attack) nan puh. Sinain aruang taktak (postmortem) nan tuah le tuah lo kan fianh u. Nan tuah ahcun, ahodah tuah, khoika sizung ah dah tuah a si i ahonih dah minsenthutnak he lung zawtnak ai thihpi, tiah a fehter?

Cun lung zawtnak a ngei mi ca ah țihnung thil (risks) nan hngalh ko bu ah, hrocernak le tukhremnak nan tuah chih mi hi, phungbuar a si fawn. Hi zong hi kan fianh chih u. Adonghnak ah, tizu ngacel zalhnak phung nan ser mi lonh in a pah mi hi, fung tuk siseh, tiah phung (law) nan ser mi a si maw? A si ahcun, mizei dah a tu lai, voi zeizat dah a tuk awk a si? A taksa pum khoika zawn ahdah tuk ding a si?

Cubantuk phung nan ser lo ahcun, Kyaw Kyaw cung kutthlak hi ningcang tlai a si lai lo. Tutan thil kan tonmi cuanh tikah, YLA nih tlangtar nan ngeih mi “Khrihfa ziaza tha upat buin, miphung le ram ca i riantuan” nan nganh ngaingai. Cucaah, ka biahalnak hi YLA riantuantu hna nih nan kan leh naklai, toidornak he Bawi Khrih min in kan nawl hna.Credi: Peng Hlawnceu

Be the first to comment

Leave a Reply

Your email address will not be published.


*