WORLD BANK NIH KAWLRAM SIPUAZI A RECORD NING BY SUI HINGZ

World Bank nih Kawlram sipuazi (GDP Growth rate) sipuazi thanchonak lei a record ning ah 2014 ah GDP 8% le 2015 ah 7.3% ah a rak si nain NLD cozah a kai hnu ah 2016 ah 6.5% in 2017 ah 5.9% in 2018 ah 6.8% in 2019 kum ah 6.3% in 2020 ah 1.5% in tiang a tla. Hlan lio cozah chan i a rak nuar ngaimi GDP kha thanter awk ah a lu a thunter khawh lo leng ah U Thein Sein cozah tluk hmanh in sipuazi thangchonak a tuah kho lo.

Word Bank i data ning in cun 2019 i Myanmar GDP hi $65.9 billion a si lio ah milu hi nuai 56 (2020 est.) kan si tik ah GDP per capita ti mi pumpak pakhat cio hlawh hi 2019 kum ah $1,407 a si i Cambodia ($1643), Bangladesh $1855 a si lio ah Chin Ram GDP hi $330 (Ref: 2014: Support to Chin State Comprehensive Plan 2016-2021) lawng a si.

Tuak uh law, Vawlei cung i a si fak bik changtu ram Burundi GDP hi $310 a si i pathumnak Eritrea ram khi $343 an si caah. Ngaihchia ngai a si mi cu vawlei cung ram 197 chung ah Chin ram hi Vawlei pumpi i a sifakpi ram thumnak ah kan cang hna. A si fakbik South Sudan GDP hi $277 le Burundi $310 le Chinram hi $330 ti in a va si hnga.

Vawlei cung ram rum bik Luxembourg nih 2019 ah $113,196, Switzerland $83,716 le Macao SAR nih $81,151 le Norway nih $77,975 an si. Inflation rate zong hi Singapore le Thailand ah cun 0.71% le 0.57% an si lio ah Myanmar ram 2019 inflation rate cu 8.3% bak a si.Myanmar Investment Law i Chapter VI i section 24 (h) ah Kawlram chung i ramleng tangka hrambunh (foreign direct investment) a rat tik ah dollar nuai 5 tiang cu State cozah pawl Biakhiahnak Nawl covo, permit peknak nawl (allocating power) a pek hna.

Cun sipuazi pawlisi, investment pawlisi pawl a chuah cun investment law and rule a chuah Myanmar Investment Commission nih directive, instruction le notification pawl an chuah mihna lak ah MIC notification 10/2017, MIC notification 11/2017 tbt an si. Tahchunhnak ah cu chung ah MIC notification 10/2017 ah Kawlram ah zone pathum in a then i, zone 1, 2 & 3 ti in then an si. A thangcho lo bik hmun pawl kha Zone A a ti i Chin ram hi cu “A” ahcun aa tel dih. Kachin ram khi Zone A le B ah khua ram hoih in an telh hna.

Zone 1 hi kum 7 chung ngunkhuai luatternak (income tax exemptions) an pek hna i Zone 2 hi kum 5, zone 3 hi kum 3 ti in an pek hna.Chin cozah zong nih ramleng kampani pawl a sawm ve hna nain kan Chin ram ah cun electric mei, ti le sehzung tuahnak ding le raw materials pawl a chuah lo le infrastructure a that lo ruang ah atu tiang ah Norway ram i kampani pakhat lawng a lut rih i ti in mei tha peknak hydroelectric power plant a sak lai.

Norway Power Company timi a si i nuai $50 tangka hrambunh ding in a rak lut. Sihmanhsehlaw, Kawlram cozah nih mei tha a chuahmi kha ram pumpi i national grid chung ah lutter a siangh hna lo. Private kampani pakhat hmanh national grid chung ah meitha pek ding in a hrawmh duh hna lo. Kawlram pumpi nih meitha 2,952 megawatts (MW) hi a hman.

Cu chung ah Yangon lawng nih megawatts 1,105 a hman i Mandalay nih 472 megawatts a hman, Nay Pyi Taw nih megawatts 120, cun a tangmi 1,254 hi pyine le ramthen pawl ah phawt an si. Chinram nih 7 MW in a tam bik 24 megawatts tiang lawng a ngah. Hi Norway company nih Chinram i national grid chung ah mei a pek khawh lawng ah a hlawh a tling lai.

National grid i mei a thlah khawh lo ahcun Electric hri zaam, tung bunh in power station and sub power station tiang amah te in a tuah dih ding a si ahcun a sung lai. Chinram cu khuate pakhat le pakaht a hla i mi an tlawm, hmanmi mei (consumption power) an tlawm lai cun India le Bangladesh ah zuar khawh ding in a chuah kho lo. A chuah khawhmi 30 MW hi cu Chinram ca lawng hmanh ah a za rih lo.peh than ding. By Sui Hingz