VUN REL VE HMANH NA FIANG TAKTAK LAI CNLD KONG CU

Zeiruang ah dah CNLD (Miphun Party) Vote Pek a Herh? Pakhatnak. Kan Chin miphun covo vialte khuakhirh ṭhan a cu cang. Panglong Hnatlaknak biahren cu Kawl (cozah) nih kum 70 reng lo, nihin tiang an buar caah kan miphun, kan nunphung, kan vawlei-ramri, kan biaknak le kan caholh cu a phunkip in an dodit i an kan dolh. Cu a rawk cuahmahmi kan miphun Jerusalem vampang sak ṭhan ding le kilven ding Federal mahte-khuakhannak (self-determination) ca ah miphun dang i bochan awk a ṭha lo. Kanmahte in kan sahngar-ar kan i runven khawh a herh.

Pahnihnak. NLD le USDP nih Chin miphun sernak le damnak policy an ngei lo. USDP party cu ṭhanchonak (development) tuah lawng a thiam. NLD cu ralkap cozah doh in democracy hmuh ding tiang lawng aa hmaithlak democracy lawnglawng pakhatnak, pahnihnak le pathumnak’ timi policy a hramthawk tein aa tlaih. Federal hi nai ah an velhle in an telh chapmi a si. Phunghrampi remhnak biatung 114 points an chuahpimi ah federal le tlangcungmi covo kong mu khat hmanh a tel lo.

Pathumnak. 2008 Phunghrampi remhnak ah Miphun Party (CNLD) thazaang thawnter a herh. NLD lawng in Phunghrampi remh khawh a si lo tiah kum 2015 lio tein kan rak chim pengmi cu atu zapi nih hmuhfiang a si cang. UPC (21st Panglong) timi ramkhel cabuai biaruahnak in Tlangcung Hriamtlai Bu, KawlRalkap/Cozah le Ramkhel Party pawl nih lungthu-thumkomh in hnatlaknak (Pydaungsu Accord) tuah dih hnu lawng in Phunghrampi cu remh le thlen dingmi a si.

Cu cabuai cung ah miphun aiawh in a kaimi CNF le tlangcung hriamtlai phu pawl lawng si loin CNLD le tlangcung miphun party pawl he– sum an vaa i ṭhuanh, le an i dirkamh a herh tuk. Phunghrampi thlen/remhnak lawng si loin, cu thlen/remh tikah Chin miphun nih kan duhmi aa tel ding zong a biapi tuk. NLD lawng nih remh sehlaw kan duhmi aa tel dih lai lo ti kha a fiang cang ko khah, an chuahpimi 114 zoh in.

Palinak. Varit le Vavu awh ṭi a hau. Myanmar ram buainak hi ralkap cozah thlak in democracy ser lawng ah a za lo i federal miphun covo khuakhirh lawng in a dai dingmi a si. Chinmi nih kan herh tukmi nuhrin holh in cacawnnak nawl, Chin State ramri khuakhirh ṭhannak, Chin Miphun Ni zungkharnak nawl, Khrifa biakinn le vawlei pawl biaknak laisen pek ding, kokek thil mansung ṭhenphawtnak nawl,

Chin Act upadi tharchuah le nunternak tibantuk cu Phunghrampi (2008) remh hau loin NLD cozah nih a tuah khawh tukmi a si ko nain a kan tuahpiak duh lo. Cucaah democracy NLD varit awh lawngin a za lo i Miphun Party caah vavu kan awh ve a hau cang. Kawl nih NLD varit an pek i Tlangcungmi nih miphun party vavu an pek ve ko ahcun khoika awngkua hmanh in cepa (angkihring) an rak lut kho lai lo.

Panganak. CNLD nih ṭha deuh in cozah tlaih ding timh cia a si cang. Nay Pyi Taw in miphun dang nih chaak/hnarphaw-hri rengh chommi NLD le USDP nakin cun Chin ah a ke a chia i Chin ah a lu a chiami bu CNLD nih cun Chinram kong cu a tuaktan deuh, a hngalh deuh i a ṭuan khawh deuh lai ti cu lunghrinh awk a um lo. Chinram hruainak ding caah CNLD nih Policy Manifesto zong Dal (sector) 22 le Cang (policy point) 154 in a suai cang i a rauh hlan ah mizapi sin ah cauk in a chuahpi cang lai. Cucu party hruaitu pawl le ramchung ramleng mifimthiam hna i bawm in ṭialmi a si.

Cu nihcun zeitluk in dah timhtuahnak ṭha kan ngeih ti a langhter. USDP le NLD bantuk in NPT cabawm a pohmi mi vanṭha pa nih timhlamhnak chunmang (Manifesto) zeihmanh ngei loin lakhruak in lohma domh le khawngtawn in Chinram hruai kan i tim lo. CNLD cu a policy in siseh, hruaitu ṭhaṭha a ngeihmi in siseh, a dirkamhtu mifimthiam tampi hna he siseh, Chin cozah ser ding le hruai ding ah timhcia a si cang. Note:Salai Ceu Bik Thawng (Chin Miphun Authawng Avoi 5nk, 2020 September 5 chuak in). Credit: Van Chan Ceu

Be the first to comment

Leave a Reply

Your email address will not be published.


*