VP AA RUAHCHAN DOM MI ZONG KHI AN PE NEMMAM LAI LO ZEICAAH TIAH

Miphun Dothlennak Strategy: NLD-No. CNLD- Yes! Ralkap nih Kawlram ramkhel thlihran an rak thlen thawk in miphun dothlennak ah a aumi CNF chungah thlennak tete an rak chuak leen ve. Ihuhphenh kho lo tiangin an hliah le an caang tete an lang. Rak bochan ngaimi pakhat Kawlram chung a rak lut hmasa. Vei nih cite pelte a liah i ahring tanbo ah aa chuah.

Ahring tanbo aa can hnu cu miphunpi ca a tuak leem ti lo. Asen vaivuanh khawh ding sawh lawng in aa la. A miphun le ram ca a strategy vialte tlau dih. Pa fim kan ti vemi zong cu Asen te phu nih rawlhrawn an kawh cang. A paw puar pah ve cang i, a H… i a H… pinah a D…. lei a panh hnik cang.Kan sahlawh pakhat maw siloah mi pakhatkhat mithmai zoh duh ah, miphun ca timi cu fawi tukin rawi an hmang.

Mi an i-urnak paoh ah hei i-er leen ve tehna khi pafim dirhmun si lo.Pa fim pakhat nih dirhmun ai palh sual ahcun, “kumpi kum zeizat chung..” ti in an rak dil leenmi khi aa sat dih te kho. Dirhmun ipalhnak nih rak chim ciami bia ṭhaṭha le bia dawhdawh tehna khi thetse cung tithlet bang a zuhter dih te kho.NLD khi miphun caah zeicah dirpi awk an ṭhat lo? Pakhatnak. Kawl ukmi party thotho a si. USDP he an idannak um hlei lo.

Pahnihnak. An pi nih ralkap a rak awnh hnawh chungah a tule pawl nihkhin Tlangcung miphun hna zawnruat ngaimi an ilawhter. Nain, a takah ralkap nakin miphun dolh duhnak an ngei deuh. Tlangmi hna covo zei ah an rel lo.Tu chan ah cun, hranhram miphun dolh a timtu nakin hlenthawi venhle dawtnak in miphun dolh aa timtu pawl khi hmual an ngei deuh.

A nemmnak i hmual le tuur ngei cu ṭih an nung tuk.Miphun sinak identity ngeih duh ruangah dothlennak phu CNF rak dirh a si. Chinram ṭhanchonak caah dirhmi phu an si lo.Chinram chung i Kawl holh le Kawl biaknak a leennak dingah dirhmi an si lo.Cucaah, miphun dothlennak ah kai pe ko a titu nihcun tuur ngei NLD phu cu dirpi awk hrimhrim a ṭha lomi khi an si.Party politics pei si ko cu ti leen awk si lai lo. National politics cu party politics in ai thawk tawn.

Party politics khin a hram thuk chinchin in khuar khawh tu si deuh.Tutan 2020 hi National Politics caah hram thuk deuhpi in vorh tan a si. Ifuntom awk a si.Chin NLD nih an taarmi pawl khi mah pumpak caah cun, paza/nuza cu an si pah men lai. Nain, ramkhel thluak ngei lo lawngte an si. Mah pumpak caah pafim paza deuh pawl khi an si.Historian pakhat lebang khi cu Kawl (ralkap) duhning in tuanbia a rak ṭial ruangah a reng a rak kaimi si. Pakhat lebang Kawlram Ramkhel Tuanbia timi cauk khi a Facebook ah a hei taar. Heh maw tiah Like le Comment an pek. Pasal ciammam an tongh.

Ramkhel History cauk relnak in ram uk thiam si lo. Cauk a ṭialtu hodah si ti zong theih herh fawn. Ramkhel tuanbia tehna cu ramca rian ka ṭuan te lai aa timi nihcun High School lio hrawnghrang in theih tuk cia dingmi khi si. Pakhat ve hoi khi, U Saw ilawhter ngang i Kawl saṭaal uar takmi si hoi. Laikeng bantuk in a rong aa thleng kho lelekmi mi perpe a si.Khi pawl nih kan ram cu an thleng lo tengteng. Mipi he biakamnak zong tuah khawh an si lai lo. Cozah rian sau tuk ṭuan cangmi pawl cu Democracy uknak ah cun, bochan tlak MP an si bal lo. Cozah rian zong a ṭuan bal huaha lo, NGO tbk tehna ah a rak ṭuanmi, mipi mi zaran chungin CNLD palai pawl tu khi mipi he biahrennak a ngei kho ding an si.

Mipi cozah timi cu mipi he biahrennak, mipi duhnak a zulmi khi an si. Khi pawl tu khi zumhtlak deuh tuk an si te lai. Cucaah, “Chinram chung caah cun CNLD, Amyotha le Pituh caah NLD ti leen” hlah uh. Amyotha le Pituh i Chin mipi aw-an te hmanh khi a biapi tuk. 2020 ah cun, VP ai ruahchan dommi zong khi an pe nemmam lai lo.Miphun ca thil tuah khawhnak hmun dang zongah an chia nemmam lai lo. NLD lawng nih hlutdaw ah nawl a ngei ti lai lo cuta. Mah caah Chinram le Chin miphun caah cun a dihlak in CNLD lawng khi Yes an si. This is 2020, not 2015. i Fun Tom Caan A Cu. By Salai C Alexander

Be the first to comment

Leave a Reply

Your email address will not be published.


*