VAIPA MEITHAL SI LOIN MAH MIPHUN MEITHAL IN SAKAH BY SALAI VAN CHAN CEU

Vaipa Meithal Si Loin Mah Miphun Meithal In Sakah. “Miphun ramkhel ramvaihnak ah midang meithal i hlanchom in ramvaih le sakah i tim ti lo in mah meithal le kuan le zen he ramvaih le sakah i tim deuh cang hna usih”. Midang meithal i hlanchom in sakah cu a ttawk tit a thatnak bik kha meithal ngeitu hleh le pek a hau.

Cu bantuk in Kawl party (NLD, USDP tibantuk) i bochan le an meithal i hlanchom in sa na kah ahcun a ttawk tit a thatnak bik kha cunglei upa (Central party upa) mithmai zoh in hleh le pek hrimhrim a hau lai. Nangmah meithal a si ahcun a ttawk tit a thatnak bik kha na miphun caah a taang cang lai.

A ttawk tit thatnak hleh a hauh lengmang caah pei Cunglei nawl, cunglei nawlpeknak hngah ta hau tiah an ti lengmang nak cu a si. A sa theng an hleh hna lo zong ah an lungthin le an khuaruahnak pei an hleh dih leh cang hna cu. Sakah ciocio zong aa khat lo. Vaipa meithal i hlanchom i sakah nakin mah (miphun) meithal te in sakah hi a hlawk deuh pin ah a tha deuh suaumau!

Kan miphun cihmit khoding raldohnak ah Vaipa meithal, kuan le zen nakin kanmah meithal, kuan le zen i funh, i rawnh in kamlo chuncha bang Chin mizapi dir ser ve cang hna usih. Chin miphun cu kan pipu chan in miphun dang kecung le lungthin cung ah kan i hngat lo. Vaipa meithal, kuan le zen i hlanchom, i rawn chawn in miphun ramkhel ti hna hlah usih.

Miphun dang nakin kanmah le kanmah i bochan deuh cang hna usih, kanmah kecung le lungthin cung ah dir ve cang hna usih. Kan miphun covo laakthannak ding Chin mizapi kutcung a phan cang. Cucaah, CNLD ah kan miphun i funtom cang hna usih law CNLD mee peknak in kan miphun covo la than cang hna usih. Pu Van Chan Ceu, State Hluttaw No.1 CNLD Party. Hakha Township

Be the first to comment

Leave a Reply

Your email address will not be published.


*