US DIRHMUN CU TTIHNUNG TUKSUM TAKTAK ASI KO CANG, THINPHAN DAILO BAK ASI

US Covid-19 Update: 04/05//2020.Coronavirus ruangah US ah a thimi, a zawmi a karh saling si. April 20 ah asang bikmi peak kan phak hnu ah a ttumte lai tiah ruah a si. Tuchun tiangah a thimi, minung 8452 an phan. Nizan lawngah a thimi minung 1046 an i chap. Tlawmpal a ttum deuh. A zawmi 311357 an phan.

Nizan lawngah a zawmi minung 33744 an i chap. A dam than cangmi 14741 an si. A dam thanmi minung nizan lawgah 2012 renglo an i chap ve.Vawleicung ah zawtnak ngeimi tam bik cu US a si. A zual bikmi khua cu New York a si i, minung 3565 an thi. Nizan lawngah New York khua ah minung 630 an thi. New York khua funeral inn pawl cu ruak lawng te nih a tlun hnawh hna lio caan a si.

Khuaci an mui. Inchungkhar ning in a thimi tam dawh an si. New York caah biatak tein thlacam bawmh an herh. Mizaw zohkhentu hna doctor le nurse pawl hi atu lio ahcun ralkap nak in bochan deuhmi an si. US mipi himnak caah ral a tumi an si. US rampi chung a zawmi i, 60% cu New York khuami an si. New York hi vawleicung khualtlawng a tam biknak khua a si caah a zual khunnak a si an ti.

Covid-19 ruangah US ah rian ngei lomi million 13 renglo an si cang. Unemployment a sawkmi 6.6million an phan. A thimi tam bikmi ram cu Italy, pahnihnak ah Spain, pathumnak ah USA, palinak ah France a si. A rauh hlan ah US nih a lonh dih te hna lai tiah ruah a si.Credit:Salai Lairamthang