TUTAN KHUA A RUAT MI CABIA ZOH CUN A RAK TURU HRINGHRAN KO

Ralkap nih hramhram in uknak an lakmi ah Khua ka ruahmi. Ralkap nih uknak an lak lai Janaury 31 (Zarhpi zaan) in zahan zaan tiang Suimilam 2 tiang hi cu kai hngilh kho bal lo. A liamcia caan le hmailei kong rumro ka ruat tawn. Rawlei chung zong a pil kho bak lo. Kei hi India ramri Tipi kap ah a thanglianmi ka si. Ka ngakchiat tein Ralkap uknak tangah a rak thanglianmi ka si. Ralkap uknak hi a rak tep ngaimi ka si ve. Ralkap an rak tlun/phak poh ahhin Inn chungah kan rak lut tawn i ther lengmang in Mau vanawngin kan rak bih tawn hna.

Kan Inn kut ka an meithel par in an van kan suk hnawh i Inn ka an van on tawn kha cu ik lengmang in kan rak um tawn. Kan Innlo ciacia ah an i thumh hlei ah Zaantim khuamang ah kan Arti an lak, kan Arpi tlum liomi hna an rak kan dawh piak i an nihkheh he thaw ngang in an ei tawn. A celh te hi kan rak celh hna naloin kan rak i in tawn( chim ding a tampi rih mah vial zarih sehlaw). Tihnak ngeibu in fim cawn a si tik ah ca kan rak thiam kho lo.

Cubu cun fimnak cawn cu pehzulh peng a si. Sianginn kan kainak ah Ramleng lei in Ca a rak kan chimmi an um tawn i tihphannak he cacawn a si caah thiam hnga tlukin kan thiam kho hrim lo. Fian huaha lomi pawl zong bia kan hal ngam ti hna lo, kan i fianlomi zong ai fiang bantukin um a si. A ruang cu kan thinlung ah tihnak/ thinphannak a rak um caah a si. Cawnpiaktu zong an khuaruah a har theu tawn.Lungfim bu in Ca kan cawn ko bu zongah khakha kan thlau kho lo.

Ee.. zeiti tha kan Fa le chantu cun hi vialte tihnak/ thinphan thlalaunak vialte hi a lo te ko lai dawkaw tiah thachia loin ruahchannak kan ngei cio. Uknak tha zeitik ahdah kan panh te lai tilawng te kan cuan cio. Uknak tha, zalennak ram kan panh cuahmah cang kan ti lio ah hnulei kir ding phun kan panh than. Kan mah chan hmanh kan rak ton kha zeiti awk tha ti hlah! hmailei kong ruah, a thang dingmi kan Fale kong tiang ruahah khuaruahnak a pit. A si kho bak lo. Chikkhat calawng ruat loin hmailei catiang ruat hram hna sih.

An nawlngeihnak chub ding dirhmun ah phan hna seh law a zam ding lawng te an si.Cucaah a nunnnak ding le a himnak dingmi lam cu hriamnaam in runveng lawnglawng a si. Mipi zeitluk in an thih zong ah an himnak a si poah cun a poi ah an chia lai lo.Kawl ralkap bantuk in a chiahrumi Libyan hruaitu Muammar Gaddafi a thihning kha an caah cawnpiaktu tha tuk a si. Mipi nih an celh ti lo hnu ah tutan bantukin an chuah hnawh i an au hnawh ve. Credit:RPM

Relchih:Kawl Ralkap Thlaknak Lam Pakhat Lawng A Um. Ralkap uknak thlak i nawlngeihnak lak ding hi cu a fawi lai lo. Thlapa kan lak lai tbk a si. Ralkap nih mipi sinah nawlngeihnak a pe hrimhrim lai lo. An pek ahcun anmah tein an i ap zong a si lai i, nan duh poah in kan tuah ko u ti he zong aa khat. A sullam cu anmah le anmah tein thah (suicide) bantuk si. Mipi cungah sualnak an tuahmi a tam tuk cang tikah kan caah luatnak ding lam a um ti lo timi an theih tuk.Daite in sandah a piahmi hna cu an kah hna.

Cuticun hriamnan in an doh colh ve hna. Cozah ralkap cu an thawn deuh caah an tei ngai hna. Tam tuk an thah hna, an hren hna, an hrem hna. An inn chung, khur chung le ram tang tiang an dawi hna. Khuacimui in a tuah hna hnuah NATO ralkak nih an rak bawmh hna. Thil sing a vun i thleng thluahmah than i, thing kua le lung kua tiang a dawimi hna cu amah tu kha dawimi ah a cang.An tei i an tlaih cu sau zong a nung manh lo. Mipi thinhun nih a kangh in a kangh dih colh. Zohchia in a thi.

Kawl ralkap zong a dihdongh tiang an tuah dingmi cu hriamnam thlah lo; uknak thlah lo hi an nunnak lam pakhat te a ummi a si. Cucaah mipi nih fawi tein tei khawh dingmi an si lo.Fawi tein uknak a hlonh ding an si lo. Dictatorship uknak cu khawika hmanh ah a hmunmi a si lo caah an tlak caan cu a phan te ko lai.Asinain thisen tampi a luan ta hau; ram zong a rawh len hmasa hau. Hi tiang tiang dirhmun phak taktak maw a hauh ko kan ti men lai. Thisen a luan lo ahcun ram thlen hi a fawi lo. Hi tiang dirhmun phak cu aho ca hmanh ah kan duh lo.

Asinain dictatorship uknak thlak khawhnak ding ah cun thisen luan a hau. Kawram ah mipi thisen a luan a tlawm ti lo. Hriamnam loin doh khawh ding an si ti lo; international bawmhnak hrimhrim kan hau cang.Uknak maw cozah maw thlak kan duh taktak ahcun mipi thazaang menmen sawhsawh cun a si kho lo.Uknak tha lo nih an thazaang ah hman cemmi cu ralkap le police an si. Police hranning kha Hong Kong mipi zong an ceih lo. Hong Kong nih tampi a kan cawnpiak fawn.

Hong Kong cu Taluk chungum si ko nain amah tein democracy phung in a ukmi ram a si. Judicial lei a siah legal system lei a siah mah tein tlaang aa tlami an si.Media freedom an ngei; Taluk bantuk si loin zalonnak tling an ngei.Asinain Taluk nih rengh a vun timh thluahmah hna. Mi sual lunghrinh poah cu Taluk ah kuat an si cang lai tiah upadi a chuahpiak hna. Taluk ah kuat an si ahcun an mi tuahto le hran kha celh ding an si lo; nuhrin covo an pe fawn hna lai lo. Mipi leiin fak tuk duh lonak a chuak. An turu kho tuk hna. Minung zong an thi len ve hna. An let than. An tei.

Asinain Taluk nih National Security law a serpiak than hna. Rengh chin lengmang a timh. Media zalonnak a rengh chin lengmang.Mi lian pawl an tlau lengmang. A hnuah Taluk cozah nih a hrenh khumh hna tbk theih than an si. Cu bantuk na tuah ahcun nuarbuar ah chiahpiak nan si lai tbk phunphun in NSL a ser. Pro democracy pawl nih an duh naisai ve lo. Asinain Virus a ser i mipi tonpumhnak a zorter ngaingai. Virus a tlau cun an linsa thiamthiam ko lai tiah zumh a si. Cun mipi nih an doh ngaimi pakhat cu police pawl hran ning hi a si.

Hriam an tlaih tikah cunglei in nawlpek an si cang ahcun mipi fah le din kha bispi an chia lo. Atu lio kan ram zong ralkap le police runvennak phaw ah an hman tikah mipi nih cil le tei hna ding cu a fawi lo.Kan teinak ding lam cu mipi zong hriamnam tlaih; Tlang Cung hriamtlai he i bawmh, cun NATO ralkap nih dirkamh a hau. Thisen a luan hau. Cu lo cun ralkap kut in nawlngeihnak lak khawhnak lam a um lo.Zungzal in an tlaih peng ko lai. Nai i Min Aung Hliang biachim hna kha zeitluk zer dah an si ti a fiang. NCA minthu pawl aa sawmter thulh hna; party dang pawl a hei tluanh luklak hna. Mipi hlennak bia pawl a hei chim hna. Thenthek dih hna law na uk khawh hna lai timi lam an i tlaihmi fiang tuk in theih khawh a si. Tutan ah mipi an fail than ahcun hmailei caah ruahchannak a um ti lo. Credit: Luther Tinhre

Be the first to comment

Leave a Reply

Your email address will not be published.


*