TUTAN CNLD CHAIRMAN PU NO THAN KAP CABIA CU A TURU KO

Thukam Pahbaltu An Hlawhtling: ️Zalennak famkim nei, kan lutlun ah vanrang lawng rak um Chin miphun in, hnamdang Mirang hnuaiah Kum 50 lai kan um hnu Panglong Thukam tuahzik laiah, Kawl kawp maw Mirang hnuaiih um hrih a ṭha sawn, timi hmuhdan pahnih in an lungthin a rak luah. Kan pale hotupawl in Kawl kawp ih zalennak zamrang ten ngah tlang an rak hril.

An rak hrilnak san khal Kawlram ihsin Tlangmipawl “kan duh tikah kan suak thei (to secede any time we wish)” timi cu Kawlram uktupawl in an rak lungkimpi ruangah a si (Aungsan in February 7, 1947 ah; U Saw in March 20-28 Pinlung khawmpi Vei 1nak ah; Diduk U Ba Cho in January 17, 1946 ah an kaa
rorin an remti thu an simsuak).

Kum khat hman rei hlanah Rampi thlun ding Danpi (1947) cu Kawl uktu Unu hoin an ngan ih a ngantu bik cu Chan Htun a si.Riahsiatza in, “duh tik canah suak thei” timi cu ‘47 Danpi Art. 202 ah “kum 10 hlanah suak theih a silo (The right of secession shall not be exercised within ten years from the date on which this Constitution comes into operation) ” tin an run thleng.

Cutin, kum khat ṭha fangah Panglong THUKAM cu KAWLPAWL cun thlun Duh loin a vei khatnak an PAHBAL.Cuticingin 1947 Danpi hmangin 1962 tiang, Burma timi Rampi ah Tlangmi ramkulh 7 cu Kum 10 luan Kawl uknak hnuaiah kan umbet. Hmanseh Tlangmi cu tuar thei nawn loin 1961 ah Shanram, Taungkyi ah Khawmpi an tuah ih Federal ih fehsal theidan an reltlang. Asinan Gen.Newin in March 2, 1962 ah “Rampi a kekkuai zik” ti suanlam in uktu thuneihnak a lak ih 1947 Danpi khal a hlawn.

Theih Dingah. 1,Burma (Kawlram) le Tlangmi Shan, Chin, Kachin karlak ih Thukam (Treaty) umsun Panglong Thukam cu Kawl in an pahbal veten cui Thukam cu a NUNG NAWN LO, a THI CIH tinak a si. 2️,Thukam a thih veten Burma lole Myanmar timi Ramfinkhawm (Union of Burma) khal a THI, A CEM, A UM NAWN LO, tinak a si. Hihi Thukam umtudan hrimhrim a si (The breaching of legal treaty by Bamas means the Union is no more in existence).

HI ZAWN AH,Myanmar Rampi ah tutiang Tlangmi kan um ko, Union of Myanmar timi khal a um ko, kan ti thei men. TAKTAK ah, tui ni ih Myanmar ram ih Tlangram State 7 umdan cu Thukam (treaty) fehdan mit thawn zoh cun, Tlangmi lungkimnak tel loin, Ralkap thazang cahnak hmangin dan loin ukbet (occupation) menmi kan si (Cui umzia cu: Leitlun Ralpi vei 2 laiih German in Poland le French tivek ram a doneh ih a uk vek fang a si). Union of Myanmar timi Rampi khal ralkap cahnak hmangin finkhawm men mi Rampi a si.

Hiruangah Dan thiam pawl cun, Panglong Thukam pahbal ih an mipum tamnak thazang thawn Tlangmi lungkimnak tel loih uk hrimtu cu UNO lamah khin tlak a si, an ti reronak a si. RIAHSIATZA IN,Tlangmi cu duh tikih suaksal thei cu sim lo, kum 10 kim hnu khalah kan suaksal thei nawn lo. Nung cingin Rulpi pumsung ih dawlhmi kan hluan. A tawp ah hriamhrei kaiin tuini tiang kan do rero nan a danglam thei hrih cuang lo.

Kanmah Tlangram State cio ah mahte-thuneihnak um loin central ihsin Kawlin kum 70 mortor le bike bangin in khalkual rero men.In khalhkual a rei deuhdeuh, kan lu a zing deuhdeuh,Kan lupar ih kumkhua to ringring dingah Kawl cu kan ruatih kan zum deuh deuh, Kawl duhdan thlun cu nunnak le damnak ah ruatin Kawl tlon theitu si ding kan zuamaw deuhdeuh.Chin cathiamsang le Bawi upa hrekkhat cu Kawl ṭih le upat thiam dan ding in zirhtu, hnamvai le hnamhlo nun in zirhtu ah an cang vivo, hivek zirhtu Chin Bawi upapawl rak uarzet khal bo lo.

KHATLAMAH, 1948 ihsin kum 70 lenglo tui ni tiang Tlangmi (Chin telin) nasa tukin kan sun lai ah, Kawl cu nasa tukin an HLAWHTLING. An HLAWHTLINMI cu a tawinak in: 1️, AD 1000 lai ih Kawl Lalram din hmaisa biktu Anawratha siangpahrang san ihsin an ukmi rak si dah lo Shan, Chin, Kachin, Kaya tiangin an ukmi Ram ah an can phah.

Pahnihnak. Pupa san ihsin kan rak hman dah lomi an Kawlca in Tlangmi ca (Chinca) cu a nehkhuh thluh ih, kan Lamzin hmin, kan Khua le Veng hmin, khat le khat thupipa ca kuatawk le thuthan, meeting thu relcatmi tiangin Kawlca a si thluh. 3️,Tlangmi leiram tlunih pupa San dan kan neih mi cu an Kawl dan in a khuh vivo ih Tlangram (Chin State) tiangin Kawl dan thlun a si vivo. (Union Hlutdaw ah Tlangmi telin tuahmi Leiram Dan a si an ti nan taktak ah Hlutdaw cu mipum tambik Kawl duhdan in a feh ti zapi theih a si.)

Palinak, Kawl nunphung le zinledan in Tlangmi nunphung le zinledan a khuh hlo vivo. 5️,Miphun sinak langtertu hmatpungtin tiangin miphun hmin ngannak ah “Chin, Shan, Mon” tvk si rori “Bama (Kawl” tin ngan a tam vivo ih, kan Chin miphun sinak tiangin Kawl tilipi sungah a pil hlo vivo. 6️,Kawl anka le ṭong cu Chin le Chin biakawk hmanah 55% hman a sizo. Chin party sung hmanah Kawl ṭong hman a tam.

Pasarihnak. Kawl hrimhrim cu mi menmen an si hmanah Tlangmi (Chin) in kan ṭih, kan huphurh, kan ngam lo. Kan tlunah thuneitu ih um ringring ding Micungcuang ah kan ruat, an huham kan neh nawn lo.8.Kawl thuneihnak hnuaiih um lo cun nung thei lo, ei-in ding khal nei nawn lo, car cuahco dingih ruat cathiamsang le Bawi upa kan tam vivo. (Ngai ngai ah Kawl thuneihnak um ban lonak Wa, Mengla tipawl ah an ṭhangso dutdo sawn ti thei lo kan tam).

Pakuanak. Dan hmaiah bangaw thluh ih dinmi Party rori hmanah, Kawl dinmi party cu thunei cuang, cak cuang, ropi cuang ih ruat Tlangmi (Chin) kan um laiih an Kawl Party uar le dinpi ruangah mai miphun Party nautat le hnihsan phah khal kan tam. Kawl party dintu le hotu pawl cu Lei pathian ah retin, an hmaiih el kiak zik ko lukun hreh lo, mai Chin miphun Party dintu le hotupawl cu Lucifer le ramhuai tlukih misual le laktlak lo ih rettu khal an suak phah vivo. Hi khal hi Kawl hrangah hlawknak a si.

Pheldarh awla ukaw (divide and rule policy) an hmanmi a hlawhtling vivo. Chin Miphun cu hrinhnam 53 lai um vekin thuphan an phuah ih peng khat le peng khat, hrin khat le hrin khat, ṭong thu ah siseh, thansonak thu ah siseh, cuhaw le keuaw rero ding zawngin thu an tuah. An thuneihnak cu kan pumkhat theinak hrangah an hmang Duh dah lo.

Eg.Chinram Cozah tlawng zate ah Laiholh, Mizo, Khumi, Laizo, Zopau, Cho, tivek sungin pakhat lawng zirh ding tin Union Education Deptt. in thu suah sehla, Chin in common language or Official language kan neihnak kum 60 lai a sizo ding. Hivek zawnah an thuneihnak an hmang Duh lo hi cuhaw rero in remaw hlah hai seh, cule kan uk thei ding an ti (divide and rule policy) ruangah a si.

A TAWINAK IN,Thukam pahbaltu cu miphun HLAWHTLING ah an can laiah, Thukam thlun sawn Tlangmi cu, “Kepal thangih awkmi Sakhi” bangin, talsuak thei nawn lo thih bawh ih nung fangfang miphun ah kan cang.Hihi Uanpi tlak lo UKMI le UKTU karlak thuanthu tawite cu a si. Credit: Pu No Than Kap