TULUK KHUAKHAN CU CELH DING ASI TILO APOI TAKTAK KHI A SI CANG

Tuluk Khrihfami caah cun thawngpang chia taktak a si ko cang. Tuluk Khrihfa hna cu Pathian chawn ti hlah uh. Jesuh hmanthlak vialte hrawk dih ulaw Communist hruaitu Chairman Mao le President Xi Jinping hi chawn cang hna uh. Hi bia nan ngeih lo ahcun nan caah atha dingmi thil nan sung lai tiah an ti cang hna.Hi konghe pehtlaiin Religious Liberty Magazine, Bitter Winter nih alanghterning ahcun,

April thlachungah China Lin Communist Party hruaitu hna nih Linfen, Shanxi province ah zumtu hna cu an kal hnawh hna. China Communist hruaitu hna milem hi Jesuh le Vailamtah can aiah nan tuah asi ahcun cozah nih bawmhnak pek nan si lai. Nan tuah lo ahcun bawmhnak pek nan si lai lo tiah an chim hna.Hi hmun ah a ummi Pastor zong nih atimi cu Mao Zedong hmanthlak tar dingin theihternak tuah kan si.

Cozah nih an duhmi cu Jesuh can aiah anmah hi biak an duh tiah innkip sin ah thawng atheihter hna. Cun hramhram in Biaknak chinchiahnak hmanthlak hna cu an lakter hna i, Mao Zedong hmanthlak tarter mi zong an um tiah chungtel pakhat nih a chim.Cun cozah nawlngeitu hna nih May thlachung ah khan Shandong Province ah a ummi Khrihfa hna cu an luh hnawh hna i, Mao Zedong le Xi Jinping hmanthlak an tarpiak hna i, anmah hi thil ati khomi pathian an si i, nan biak dingmi hna an si tiah an chimh tthan cang hna.

April thla ah khan mitlamtling lomi Khrihfami pakhat zong cozah nih bawmhnak $14 thlachiar te an pekmi zong aa pumh ruangah an phih piak cang.Culawng siloin Jiangxi i, Poyang County khrihfa nu pakhat kum 80 a si cangmi zong bawmhnak 200 RMB an pek i, Bawipa ka lawmtuk tiah Pathian sin ah lawmhnak bia achim ruangah bawmhnak an pekmi zong an phih tthan.

Hithil an tuahmi hi Pathian thangthatnak in Communist Party thangthat an duh deuh caah asi tiah a chim. Shangqiu City, Henan Province ah tarnu pakhat zong a kutka ah Vailamtah a tar ruangah cozah nih bawmhnak an pek tawnmi zong an phih piak hoi. Cupin ah Vailamtah zong an lakpiak ti a si. Hi konghe pehtlaiin aliamcia kum 2017 zong South China Morning Post alanghtermi cu Yugan county, Jiangxi province ah Khrihfami chungkhar hna cu luh hnawh an rak si.

I, Khrihfami hna chinchiahnak an tarmi cu 600 an lakpiak hna i, Communist dictator pawl hmanthlak an tarpiak hna tiah ati. Cozah nawlngeitu hna nih an ti tthan rihmi cu, Sifak damlo hna nih an dam khawhnak dingah Jesuh sin ah thla an cam. Asinain damlonak cu titsa thil asi caah rianrang in bawmhnak atuah khomi cu Communist Party le General Secretary Xi hna hi an si tiah an ti tthan hna.

Aliamcia June thla ah khan Henan Province i, Sunzhuang Church timi cu Communist hruaitu minung zahnih nih JCB hmangin an hrawhpiak cang hna. Khrihfa asimi pa pakhat an tlaih pin ah nu pahnih zong hliam an rak tuar. Tuluk cu Khrihfa aserhsatmi ram ah 23nak ah an chiah cang.