AN I TIMHTUAH NING CU AMAK BAK HIH, UAR AN UM KHO TUK

2021 CHIN MIPHUN NI SUNHSAKNAK AH THE HAKHA TIMES NIH PAIH LE A DANGDANG NUAMHNAK KAN TUAH LAI. Tukum 2021 Chin Miphun Ni cu COVID-19 tlaangrai ruang ah kum dang bantuk in Chin Ramkulh Cozah nih Hakha le pengkip ah tuah awk a tha ti lo. Cucaah The Hakha Times nih 2021 Chin Miphun Ni sunhsak ca ah tiin Paih le a tanglei program hna tuah ding in kan i tim: 1. Paih: Laksawng cu: Champion Ks.500,000, Taisawm le Roca. Tambik teitu Ks.300,000 le Roca. Zuamnak hi Zaatlaang paih le Zuamcawh (Singkhaw) tiin tuah a si lai. Paih ni cu February 20 a si lai.

A hmun cu The Hakha Times Zung (Hmun kaupi kan ngei) ah a si lai. COVID-19 zulhphung lonh lo ding in kan tuah lai. Paihbual hmun ah zapi nih zoh a si lai lo. Online in zoh a si lai. Paihbual chung ah aa pai lio mi, Bualrikhiak (Dailuci pahnih), Caantlaitu, TV thlatu le paih a lut ding mi pahnih lawng an um lai. A dang aa pai ding pawl cu leng ah um dih a si lai. Nihin January 26 thawk in February 18 zaan 10:00 tiang min pek a si lai. Min a pe lo mi i paih khawh a si hrimhrim lai lo.

Aa pai ding mi nih Bualrikhiak (Dailuci) nih biakhiah mi a zulh hrimhrim lai. Asinain a lungtlinlonak a um ahcun TV challenge tuah khawh a si lai. Zuamcawh Paih cu: Heavy Weight le Middle Weight ti in then a si lai. Min pek dih hnu ah pound tah in then a si lai. Zaatlaang Paih cu pound then a um lai lo. Min pek tik ah: min, khua, sang, kum, phone pek a si lai. A zoh ning cu: The Hakha Times Facebook Page in kan Live lai i zoh man a pe mi lawng nih zoh khawh a si lai.

Ticket man cu ramleng lei ca ah $10, ramchung ca ah Ks. 2000 a si lai. Ticket man pek ningcang cu a rauh hlan ah kan hun thanh te lai. The Hakha Times kan riantuannak ca ah bawmh kan in hal hna le nan kan bawmh can ah ramchung ramleng in tha rak kan pe cio hram u. Pehtlaihnak: Ph. 09-256649505. 2. Lucky Draw: Co ding mi cu Motor or India motorcycle a si lai. A zeideuh dah ti mi cu a rauh hlan ah kan hun thanh lai. Ticket cu The Hakha Times riantuantu le tuanvo ngei nih ramchung ramleng hmunkip ah kan rak zuar te lai.

The Hakha Times riantuannak ah bawmh kan in hal hna le nan kan bawmh can a si lai ca ah ramchung ramleng in tha rak kan pe cio hram u. Pehtlaihnak: 09-256649505. 3. Sasir ei zuamnak: Laksawng cu Pakhatnak Ks. 100, 000 le Roca, Pahnihnak Ks.50,000 le roca a si lai. Hi Sasir ei zuamnak cu Chinmi kan pipu hna nih an rak hman mi kan nunphung a si. Chin Miphun Ni sunhsaknak le kan nunphung hmuhsaknak ca ah tiin tuah timh a si.

A hmun cu, The Hakha Times Zung ah a si lai. Zuamnak tuah ning cu, voksa a thau kha Lai chumh bak in ei a si lai. Sibawi le Nurse kan sawm hna lai i ngandamnak kong ah an kan zohkhenh pi lai. A duh poh i zuam khawh a si. Zuam a duh mi nih Januanry 26 thawk in February 17 zaan 10:00 tiang min pek khawh a si. Min a pe mi lawng zuamnak ah luh khawh a si. Pehtlaihnak: Ph.09-256649505. 4. Ramkheel biacah chimnak: Chin Miphun Ni a si bantuk “Chin Miphun Ni hi Cozah Zung Khar Ni in kan hman khawh nakding ah zeitindah kan ti lai?” ti mi tlaangtaar in Chin ramkheel upa 10 kan thim mi hna nih February 15-20 tiang chun he zaan he The Hakha Times Facebook Page in ramkheel biacah chimnak an ngei lai.

Tinh mi cu: cu hlan Chin Miphun Ni i an chim mi ramkheel biacah nih kan miphun tuanbia dik le ramkheel dirhmun kha diriam tein an langhter khawh tawn lo ca ah, Chin Ramkulh Cozah tlai lio upa, CNF upa, Ramkheel party upa, le a lenglei ramchung ramleng upa hna kan sawm hna. 5. Catial zuamnak: Laksawng cu Pakhatnak Ks. 100,000 le Roca a si lai. Zuamnak hi Cabia, Biazai le Ram hla ti in phun thum in i zuam khawh a si lai. Zuamnak tlaangtaar cu: “Chinram hi kan ram a si” ti a si lai.

Cabia cu A4 hmai 2 nak tam lo a si lai. Biazai cu rikhiah a um lo. Ram hla cu solfa le a phuahtu maw midang nih maw sak cia mi audio file he kuat a si lai. Pehtlaihnak Ph. 09-256649505. thehakhatimes@gmail.com. 6. Nunphung laam: Kan miphun ni sunhsaknak ca ah kan nunphung laam kha hmuhsaknak online in kan tuah lai. A duh mi nih mahle hawikom, a bu le a phu zong in i tel le laam khawh a si. Cun The Hakha Times zong nih a dang tein tuanvo pek in cawnter mi zong an um ve lai. The Hakha Times Facebook in kan Live te lai.

Aa zuam kho mi le a duh poh i tel khawh a si. Ramleng lei zong i tel khawh a si. Zuamnak a si lai lo. Pehtlaihnak: Ph.09-256649505; thehakhatimes@gmail.com. 7. Ramhla saknak: Chin Miphun Ni sunhsaknak ca ah a zuam mi poh sak khawh a si. Ram hla a si lai. Hlasak zuamnak a si lai lo. Ramchung ramleng in i tel khawh a si. Nangmah tein naa thlaak mi video file kuat in siseh, The Hakha Times Studio ah rak sak in siseh i tel khawh a si. Chin Miphun Ni sunhsaknak ca ah ramchung ramleng rak i tel cio hram u. Pehtlaihnak: Ph. 09-256649505; thehakhatimes@gmail.com.

8. Sponsors: Hi a cunglei kan program ah hin 2021 Chin Miphun Ni sunhsaknak in siseh, cun The Hakha Times bawmhchanhnak ca ah siseh sponsor tuahnak in rak i tel ve ding in ramchung ramleng hawidawt hna kan in sawm hna. Cun na thil le na riantuannak fakthanh zong tuahpiak khawh a si. Hi program chung vialte The Hakha Times print ca le Online TV ah fakthanh special in kan in tuahpiak peng lai. Pehtlaihnak: Ph.09-400972394;09-256649505;09256202894, thehakhatimes@gmail.com. Credit The Hakha Times

Relchih:Myanmar Ralbawizik Min Aung Hlaing: Upadi Zulh A Si Lo Ahcun Phunghrampi Hrawh A Si Lai.Upadi hna hi zulh an si lo ahcun ralkap sermi 2008 Phunghrampi hrawh awk a si lai tiah Cawnithumni i ralbawi ngan senior officer a cawnglio mi hna sianginn National Defense College i biachimnak a ngeihnak ah Min Aung Hlaing nih a chim.Commander-in-chief Senior General Min Aung Hlaing nih Tatmadaw Myanmar ralkapbu nih,”Upadi hringtunu a simi Phunghrampi an zulh a herh” tiah a chim. Atulio i a nungmi upadi cun 2008 phunghrampi chung i a ummi paoh cu kan upat dih hna tiah a chimchih.Min Aung Hlaing nih cun, “Upadi an zulh lo ahcun cubantuk upadi cu hrawh hrimhrim ding a si lai. Ka chim duhmi cu Phunghrampi an zulh lo a si ahcun Phunghrampi cu hrawh a herhmi cu a si.

Upadi an zulh lo ahcun Phunghrampi cu hrawh hrimhrim ding a si” tiah ralbawi ngan senior officers a cawng liomi hna cu a chimh hna.Min Aung Hlaing biachim hi Myanmar ralkapbu biachimtu Major General Zaw Min Tun nih Cawnnihnihni i press conference a ngeih lio ah ralkap nih nawlngeihnak lak ding le lak lo ding kong ah biafiang a chim duh lo hnu in a si. Zaw Min Tun biachim cu ramchung mipi nih biatak tein an soisel cio i nawlngeihnak an lak ahcun anmah ralkap sermi 2008 Phunghrampi an buar a si lai tiah soisel an tong ngaingai.Min Aung Hlaing nih, “2008 Phunghrampi hi a nungmi a si, theihter kan duhmi hna cu hihi politics ah a biapi taktakmi a hrampi a si.

Ahohmanh nih hi Phunghrampi hi an daithlanh awk a si lai lo. Cucaah nannih cu upadi lei kongah theihhngalhnak a ngei dihmi nan si i upadi lei untuning muisam lei kong zongah theihhngalhnak a ngei dihmi nan si,” tiah a chimh hna.Upadi tthen le upaditteng kip nih anmah le an sullam le tinhmi an ngei dih hna caah mah duhning paoh in upadi hna hi hrihfiahnak tuah lo ding a biapi tuk. Upadi hna nih mah ruahnak le duhning hoih in hmannak nih tthatnak nakin hrawhhralnak a chuahter deuh, tiah a ralrinpeknak a chimchih.Min Aung Hlaing nih cun hlanlio Myanmar Phunghram pahnih a dik lo ruangah ralkap nih nawlngeihnak an rak laknak kong a hun chim.

Tuanbia kan zoh a si ahcun, 1947 Phunghrampi cu Revolutionary Council nih an rak hrawh cun 1974 Phunghrampi cu State and Order Restoration Council timi ralkap nawlngeihnak tangah an rak hrawh tiah a chim.Hihi ralkap bawizik nih Phunghrampi hrawh ding tiah a chim hmasat biknak a si. Hipin hi cu tampi a chimchap ti lo. Tuan deuh ah khan Min Aung Hlaing nih cun political party zeimawzah he tonnak an rak ngeihnak ah Myanmar ram le rammi le Ralkap hna hmailei an dirhmun ningcang loin ttihnung dirhmun i a um ding a si ahcun”Zeihmanh tuah ngam lomi ka ngei lo, Zeithil paoh ka tuah ngam” tiah a rak chim bel cang.Note: Ralkap nih nawlngeihnak an lak lai le lak lai lo cu kan thei cio lo nain Commander-in-chief Senior General Min Aung Hlaing biachim cu a fak ngai. Thinphan awk ngai cu a si ko. Credit: TCH

Be the first to comment

Leave a Reply

Your email address will not be published.


*