PU HTET NI A HOLH CANG, TUCHUN HAKHA RALKAP LE PALIK KONGAH

CDM hi ram uknak thlen nakding ah a donghnak a si, lam naite in kan in zoh peng ko hna: Pu Htet Ni (CNF). Chinram, a bik in Hakha ah Palek le Ralkap nih zalong tein duhnak a langhter mi hna kha an rengh deuh hna tik ah nan thinphang hlah u, lam naite in kan in zoh peng ko hna, CDM in kan tei hrimhrim fawn lai, tiah CNF/A Chimphuannak Nawlngeitu Pu Htet Ni nih February 26 ah a chim.

Atu ah Palek le Ralkap nih an hun rengh deuh mi hna hi khatlei cun Schy War ti mi Thinlung lei Raltuk hneksaknak bantuk ah kan ruat. Asain, hriam hman hna a um ahcu na poi tuk te lai. Ralkap zong nih Palek thuam (uniform) an i hruk-aih sual maw, ti tiang in zohfel khawh i zuam ve hna u. Lam naite in kan in zoh peng ko hna,” tiah Pu Htet Ni nih The Hakha Times ah a chim.

Pu Htet Ni nih a peh rih mi cu, CDM hi ram uknak thlen nakding ah a donghnak lam pakhat a si. Kan siter zong a hau i a si ve hrimhrim fawn lai. Amah belte, CDM hi ram ca dothlennak a si ve i harnak zeimawzat cu a um ko lai. Ralringte le lungfim tein cawlcangh khawh zong i zuam u, tiah a chimchap. Credit: The Hakha Times.

JP Biak Tin Sang: Min Aung Hlaing hi tlaang cungmi a kan bawmtu ah kan biak PATHIAN nih a van kan thlah piakmi asi tiah ka ruah. Ka hmuh ning cu hi ti hin a si. A tu kan Kawlram uknaak phunghrampi hi hrawh lo in cun a remh I remh ding cun democracy federal ka duh ko a timi NLD hmanh nih Ralkap le USDP party I tlaang cungmi hi vuancichouh CM te hi cu an mah duhmi te. I thim ko hna seh ti in cite an kan liah mi hmanh an duh ve lo tik ah phunghrampi a remh I remh hin cun NLD nawl koko hin cun tlaangcungmi nih mah te uk khawhnaak federal kan duhmi hi a cuanh in cuanh khawh ding a si hrimhrim lo ti ngam ding a si.

Phunghrampi chung ah hin ralkap uknaak a fehfuan khawhnaak ding caah le tlaangcung miphun kan duhmi covo hmuhnaak ding a dawnkhan tu aa ttawnttokmi a tam tuk hringhran. Cu ca ah phunghrampi cu a hrawh in hrawh hmasa bak a hau ko tiah upadi ( Law ) a thiammi hna nih an ti cio bantuk in a tu bantuk aanaa ting lio caan te ah hin kan phunghrampi cu a hrawh in hrawh cikcek ding a si. A hrawh a fawi lio caante a si fawn. Phunghrampi hrawh khawhnaak lamthluan cu aanaa ting lawng ah a lam a awng tiah kan rak ti cio bantuk khan a tu caan te hi phunghrampi hrawh khawhnaak a caan cu a hung si ve.

Tlaangcungmi le ramkulh vialte kan ca ah cun mah te I uk khawhnaak lam thluan hi a tu lio aanaa a kan ting piaktu Min Aung Hlaing nih hin a kan vih piak, lam a kan sial piak I a kan bomh bia a si ti in kan ruah a hau tiah ka ruah.( A mah lehlam hi cu anmah kawl nih an thin hun tuk ah an thah I mei in a ruak kan duah tiah an tar bantuk khan thih chiat in a thi lai I a va lotlau ve te ko lai ).Cu ca ah kei nih cun Min Aung Hlaing hi tlaangcungmi a kan bawmtu ah kan biak PATHIAN nih a van kan thlah piakmi a si tiah ka ruah. Luatnaak le mah te I uk khawhnaak cu kan biak PATHIAN nih kan hmuh ter hram ko seh! Credit: JP Biak Tin Sang.

Be the first to comment

Leave a Reply

Your email address will not be published.


*