THLENNAK AH NLD THISEN THOL 7 SI CUN TLANGCUNG MI THISEN CU THOL 70 ASI HNGA

NLD Ruangah Thlennak Kan hmuh, NLD Lawng nih Kanram Asersiamkhawh lai Nanti Maw? Tlangcungmi nih kan covo laktthandingin ral kan dohnak hi kum 70 renglo asi cang, Kum 70 renglo ral kan doh ruang ah hin kan thisen tamtuk aluang, kan thisen aluangmi nih hin vawleicung ram tampi le UNO tiang khi, ava tthangh hna. Cucaah 1995 ah UNO nih Kawlram remdainak aum khawhnak ding ah Tlangcung hriamtlaibu/Kawl ralkap le 1990 thimnak ah teinak ahmuhmi hna phu thum ichawnhnak um seh tiah biachahnak an tuah.

Hi biachahnak an tuahmi hi Kawl ralkap nih zulh hna seh tih an duh caah UNO, USA le EU tibantuk nih phihnak (sanctions) phun phun in an tuah,, Hi phihnak pawl ruang ah hin Kawl ralkap pawl an hmailei lam apit ter caah,Democracy innka fa te an hun onnak a ruang ngan ngaimi cu asi, RFA nih Turah SweMain interview an tuahnak ah achimmi cu ramdang phihnak atam tuk caah hmai kal awk attha tilo.

Cucaah democracy innka kan onnak hi asi tiah fiang tein achim, U Thein sein Cozah akai leh cangka in a aupi hmasa mi cu; reform tuah hi asi, Reform tuah a aupinak aruang cu 1995 UNO biachahnak kha ka zulh lo asi ahcun ramdang phihnak sanctions in ka luat khawh lailo ti ruang ah le kan democracy hi vawleipi nih akan pompiak lailoh, ti aphang ruang ah asi, Hi hna ruang ahhin UTheinsein Cozah akai leh cangka in Tlangcung hriamtlaibu hna ramkhel kong cabuai cungah kan ichawnh lai ahun kan ti colhnak kha asi.

U Theinsein nih reform akalpi tikah, NLD le 1990 thimnak ah teinak ahmuhmi hna kha achawnh duh loh, Tlangcung hriamtlai lawng achawnh hna. Hiruang ahhin Daw Suu alung afak, Cucaah tlangcung hriamtlaibu hna kha NCA min thut rih hla uh, keimah Cozah ka ser hi rak ka hngak rih uh, tiah voi tam ngai ahun chimnak kha asi, Daw Suu nih Cozah ka ser rak ka hngak rih uh, ‘min thut rih hla uh, ‘tiah a aumi kha, U theinsein nih achawnh duhlo mi cungah alungtlinlonak alanghter mi zong asi i, khatlei ah keimah nih reform ka tuah lai i, cu lam cu kan zulh hna lai a tiduhnak zong khi asi.

Atawinak cun USDP reform policy hi ka pom loh, keimah reform policy in kan kal lai ati duhnak khi asi, Hi ruang ahhin NCA min thut bu nih U Theinsein he min kan thut mi pawl hi Daw Suu nih aduh lomi aum ahcun fawi tein tuah kho seh ti an duh caah, remh fawi chap fawi le hlonh fawi in an tuahnak kha asi. NLD Cozah akai tikah reform policy asiloah NCA lampi hi kau deuhin akalpi khawh maw? kan ti ahcun zei nemnam, NCA lampi tu abit ter deuh lehlam, Tlangcung miphun hna nih kan iruahchanmi cu NLD Cozah akai ahcun kan covo va lak dingah kan zawh cuahmah mi lampi hi USDP lio ah meng 10 kan kal ahcun NLD chan ahcun meng 50 tal cu kan kal khawh deuh lai tiah ruahchannak kan rak neih.

Asinain NLD nih Cozah ahun ser taktak tikah Tlangcungmi kan iruahchannak hi alet taling in ahung chuak, Kan lam akau deuh lai i, meng tamdeuh kan kal khawh men lai kan timi kha kan lamtu abi deuh pinah meng tlomdeuh kan kal naktu ah ahung cang. Zei a va si zongah kan ram democracy innka aa onmi hi, tlangcungmi kan thisen le kan thlati hi ahrampibik asi. Tlangcungmi kan thisen nihhin vawleicung rampi hna le UNO tiangin innka avakingh hna i ava tthangh hna.

Cucaah UNO le vawleicung rampi hna nih Kawlram buainak hi,democracy buainak lawng asiloh, tlangcungmi buainak hi ahrampi deuh asi. Cucaah tlangcungmi he dainak ser uh tiah UNO tiang nih biachahnak an hun tuahnak khi asi. Tlangcungmi kan thisen nihhin Kawl ralkap pawl an lam a pitter. Hi an lam apit mi aa onnak caah thlennak an tuah i, tlangcungmi an hun ka chawnhnak hi asi. Tlangcungmi he kan ichawnhmi nih hin kan covo laktthannak le 2008 phunghram remhnak lampi ahun phah i, cucu atulio kan zulh cuahmah mi NCA lam hi asi.

Atulio kan zulh cuahmah mi NCA lampi hi kan covo laktthannak caah le 2008 phunghram remhnak caah ruahchannak nganbik kan neihmi asi. Ka langhter duhmi cu hi NCA lampi hi ahodah asial? aho ruang ahdah achuak? kan ti ahcun tlangcungmi kan thisen ruangah achuakmi asi. A ngaite kan ti ahcun Kawlram thlennak caah ahhin NLD nih lampi dang asial khawhlo caah tlangcungmi nih kan sialmi NCA lampi ahun zulh ve nak hi asi. Fiang deuhin kan chim ahcun NLD nih thlennak kan tuah lai an timi khi, anmah sialmi lam in siloin, tlangcungmi kan sialmi lamtu arak kan hrawmmi an si.

A ngaite kan ti ahcun Kawlram democracy innka aa onnak le 2008 constitution remhkhawhnak caah ruahchannak nganbik kan neihmi NCA lampi hna hi, NLD ruangah kan hmuhmi asiloah achuakmi asi nemnam loh. Tlangcungmi kan thisen ruangah kan hmuhmi le achuakmitu asi, NLD ruangah thlennak kan hmuh. NLD lawngnih 2008 constitution aremh khawh lai nan ti ahcun, kanmah nih kan sakmi Inn kha kanmah nih kanhrawh /ttheh tthan bantuk asi. Kanmah nih tikhur kan cawhmi kha kan mah nih kan chilh tthanni bantuk zong asi.

Kawl ralkap nihhin democracy le federal tii luang khawh hla seh tiah vampang an kham. Cu vampang cu Tlangcungmi thisen le democracy aduhmi Kawl thisen nih pemh lakin apah Vampang pemh lakin apahmi thisen tam deuh hi tlangcungmi thisen asi. Kawlram thlennak ahhin NLD thisen hi thol 5 si sehlaw Tlangcungmi kan thisen hi thol 70 asi hnga, Mah miphun thisen hmanh upat loin miphundang thisen va upat tlukin miphun le ram sersiamnak ah ttih anungmi aum ti loh. Credit:Van Neih Thang

Be the first to comment

Leave a Reply

Your email address will not be published.


*