THE HAKHA TIMES NIH MIZO HOLH AN CHIMMI HI APOINAK UM LO. ARUANG

Thawng Zam Thang: The Hakha Times nih Mizo holh in thawng an thanh mi ruang ah rak buai tuk hlah uh. Mizo holh na soisel hi nan te naunak nan langhter a si. Holh hi thiam i zuam uh ca. Kei ka holh thiammi cu 1. Hakha Holh, 2. Mizo holh, 3. Mirang holh, 4. Kawl holh, 5. Kala holh ( a tawkfang), 6. Falam holh, 7. Spain holh tlawpal ka thiam.

A kan nihsawh ee-cu ee-kha ee ti hlah uh. Mah hngal lo hna. The Hakha Times nak lai media a puitling mi a um lai loh. Nain A dirka a si caah, an tlamtling deuh rih lo i si. I ralring hna seh ti ah kansoi hna. Nain Media dang nih an tluk bak hna lo.Mizo holh hi rak soi hlah uh. Holh timi hi thiam viar ah a tha cu.

Saya Van Peng Uk: Mah le Hmuh Ning Cio. Tha Hakha Times nih Mizo holh in thawng an chimhnak hi mi cheukhat a popular nak ding le follower an tam nak ding ca lawngah a ruat mi nih cun a tha tuk an ti ko men lai. Asinain, follower tam nak ding ca’h le popular nak ding ca lawng hin cun ruah awk an tha dih rua lo.Mizo holh nih zei tlukin dah Laimi influence a kan tuah ti hi kan theih a herh ngai.

Laitlangah tu lio kan hlasak thiam cheukhat zong Lai hla nakin Mizo hla a uar deuhmi hna an lo cang. India ram zongah Mizo holh nih hin influence a kan tuah taktak ti cu kan theih dihmi a si. Lawngtlai District (Lai Autonomous District Council), District pakhat a si ve mi kan Lairam ah Lai holh rim a nam ti lonak a sau ngai cang. Voikhat cu Aizawl ah a um mi “Lai House” ah kan riak i cu ka ahcun kan pawngah a riak ve mi Lawngtlai in a ra mipa he bia kan i ruah i ” Lai chu ka ni a, maseh Lai ttawng ka thiam lo” (Lai cu ka si ko nain Lai holh ka thiam lo) a ka ti ko.

Laimi si ko tung, Lairam ah um ve ko tung ii Lai holh thiam lo khi nang zeitin dah na ruah ve? Mizo holh in thawngchimnak thawngin kan Lai holh a thangcho deuh lai, Kan lai holh ram a kau deuh lai tiin kan ruah ahcun kan i palh cikcek lai. The Hakha Times nih Mizo holh in thawng an chim tikah a fiang mi cu a ngaitu hi tam deuh cu Laimi kan si ko. Cucaah, Laimi sinah Mizo holh cawisan le karhter bantuk a si.

Lai holh cu Chin State Township pakua (9) chungah Township pahnih, Thantlang peng le Hakha peng lawngah hmanh khawhmi holh a si. Tutiang khoika zung le parliament hmanh ah official tein hmanh khawhnak a um lo. Kan Hakha khua cia lila hmanh ah Zung kal ahcun Lai holh hmanh khawh a si lo. A fawinakin chim ahcun a him mi holh ti khawh a si rih lo.

Sihmanhsehlaw, Mizo holh cu Mizoram pumpi in an hmanhmi holh a si hlei ah official tein zung le parliament kip ah an hmanhmi holh a si fawn. India ram Reginal level in hmanhmi holh a si. A fawinakin chim ahcun a him i a hram a fek tuk cang mi holh kan ti khawh. Mizo holh bantukin kan Lai holh hi a him nak ding le Reginal Level tiang phan khawhnak ding ahcun Laimi nih Lai holh hi kan cawisan i kan thanchoter a herh.

The Hakha Times nih Lai, Mizo le Kawl tiin thawng an thangh. A si cun, ziah kawl hi tah a tha ko maw timi biahalnak a um kho men. A si ko, Kawl holh hi cu kan duh bia si loin kan ram holh (National Language) a si tikah kan duh le duh lo si loin Myanmar ram chungah kan um chung paoh cu kan herhmi Holh a si. Amah bel te kawl holh uar tuk cu a tha lem hnga lo. A si ahcun, Mizo Holh cu tah Chin State chungah Mizo holh a hmangmi khua an um maw?

A si cun, ziah Mizo holh a hmangmi an um lonak hmunhma ahcun Mizo Holh in thawng an chim? Mizo holh cawisan le karhter a si ko lo maw? Note: A cung i ka tialmi hi The Hakha Times thangchiat duh le soisel duh ah a si hrim lo. Laimi nih midang Holh le Ca siloin kanmah Holh le Ca te hi cawisan le thanchoter hna usih timi ruahnak he tialmi a si. Credit: Saya Van Peng Uk

Be the first to comment

Leave a Reply

Your email address will not be published.


*