THAWNG HNIN THANG: MIPI THEIH IN SALAI LTT TUAH SERNAK PHUAN AHAU CANG

Miepi Group a rak that tu kha Lungthli Tum a si. Ahlan ah Miepi timi Facebook group a rak um. Laimi hmanmi group velte ah member tambik an rak umnak a si. Miepi timi min hi Thantlang peng Hriphi khua pawng i a ummi tlang sang, tlang dawh Miepi tlang min laak in rak sermi group a si. Miepi group nih Miepi tlang a min a thanter.

Miepi group cu 2010 kum hrawngah rak sermi a si i Laimi nih an rak duh ngaimi a si caah atu tiang hi hei um rih seh law member ting khat leng an si cang lai dah. Miepi group cu kum 5 hrawng a hung rauh hnuah member zong an hung karh ngaingai. Member thong 40 hrawng an hung si ahkhin Miepi group cu “dup” tiah a mit. A tlau. Facebook company nih an phih. A raung cu Miepi group kha report tuahtu a ngeih caah a si.

Report tuahtu nih, “Hi Miepi group hi ralhrang bu (terrorist group) bantuk ah ruahmi CNF he aa pehtlaimi a si i meithal le hriamnam cawkzuarnak ah an hmanmi group a si,” tiah Facebook company ah report a tuah. A si lomi pi a si. Miepi group ah meithal le hriamnam cawkzuarnak an tuah bal lo. Laimi nih meithal zuarnak kong cu kan tuah phaak zong a si lo. Member vialte cu Laimi an si hna caah member cheukhat nih CNF kong le CNF nih a tuah cuahmahmi kahdaihnak kong cu an ṭial pah hna.

Group dang i an i ceih tawn ning cio khi a si ko. Members nih an duhmi konglam paoh kha ttial cio a si ko. Terrorists pawl he aa pehtlaihnak zong pakhat hmanh a um lo. Miepi group a thattu hi Lungthli Tum a si kha tuan ah rak hngalh a si lo. Thil sining zoh dih hnu le Facebook ah hlat dih a si hnu, caan zeimawzat a rauh hnu lawngah Lungthli Tum a si kha theih a si. Nain, Lungthli Tum nih a thahmi a si kha tuan ah kan phuang duh lo, hmailei chim caan a chuah tik i phuan ding ah kan rak ichiah.

Miepi group hi zeitindah, zeiruangah dah Lungthli Tum nih a thah? Miepi group cu atu bantuk in phaisa kawlnak ah hmeh chom haumi (link) he post a rak um tuk lo. Biaruah a rak nuam ngaingai. Miepi group cu Lungthli Tum ta a si lo. Amah nih a sermi a si lo. Group a sertu le admin tampi nih tawlrelmi group a si. Lungthli Tum cu mi nih an rak thei rih lo. Phaisa kawl a duh caah Miepi group ahcun (links) ca a rak post tawn.

Lungthli Tum nih a phaisa kawlnak hi a tlaangpi in Laimi member tam bik umnak group pahnih ah a rak post tawn. Cu hna cu 1, Miepi (member tam bik) le 2, Chinland Daily News (member tam bik chang) an si. Miepi group phihpiak a si hlan zarh 3 hrawng ah thil a cangmi a um. Lungthli Tum nih phaisa kawlnak ah hmehchom haumi a vun post tawnnak a sau pah cang caah group member cheukhat nih an rem set lo i an soisel.

Na cattialmi hmehchom hau loin, rel khawh colh ding in hung kan post piak, tiah a cheu nih an ti. Comments zongah mitam nawn nih Lungthli Tum cu an phomh pah. Cu tikah Lungthli Tum cu a ning a zak i a ca a post ngam ti lo. A phaisa kawlnak hmun ah cu lio Chinland Daily News group dah ti lo cu hmun dang a ngei ti lo. Miepi group ah mi an tam deuh i Lungthli Tum nih a ca a post ngam setlo tikah a phaisa hmuhmi a hung zor thluahmah.

Cucaah, Miepi group cu ral zoh in a vun zoh. Hi group a thah lo ahcun a phaisa kawlnak a tlau lai ti kha aa fiang tuk. Miepi group kha report tuah i a chung member vialte kha amah Lungthli Tum siarem deuhnak group dang ah kalter a duh hna. Cu lawng ah phaisa tam deuh a hmuh lai ding kha a theih tuk. Cucaah, zei sual lo Miepi group cu a si lo ning in a report i Facebook nih an phih thai.

Nan vun fian deuh ding ah chim ka duhmi cu Miepi group hmang in phaisa a kawlmi cu a tlangpi in Lungthli Tum lawng a si. Phaisa lei in miakmainak a tuahmi cu amah lawng a si. Ahohmanh hi group kong ah thinhungmi an um lo. Amah Lungthli Tum lawng hi group ah conflict of interests a ngeimi a si. Cun, Facebook rules a fiang i zeitindah ka report lai i an phih lai ti a theitu cu Lungthli Tum bantuk thil a ngal pahmi lawng hi an si.

Mirang ca in report a tuah khotu zong amah dah ti lo midang an um lo. A fim, a thiam pahmi nih lungput ttha lo an ngeih tikah ttih an nun ning khi hika hin nan vun i fiang ko lai dah. Fianter ka duh chapmi cu Miepi group ah Lungthli Tum a soiseltu hi group a sertu le admin pawl an si lo. Member paohpaoh zalong tein post nak nawl an peek cio ko hna, aa tlukrual tein.

Group chung i a ummi member tlawmte nih an caakmi lawng khi a si. Member pakhat le khat ruahnak ikhah lo cu khoika paohah a ummi a si ko. Amah a phomhtu member pawl kha a duh ahcun a phomh khawh ve ko hna. Siloah, an bia zei relo in a post duhmi kha pehzulh in post thluahmah khawh a si ko. A poinak a um lo. Group tuahtu le admins nih a zei an sual lo. Member thong 40 hna tlin khawh ding ahhin a tlawm bik kum 5 a rau.

Mi nih har le fe tein an tuahmi group kha mah hlawknak caah report tiangtiang tuah cu minung lungthin a ngeimi nih cun an tuah awk a si lo. အဖျက်သမား lungput bak a si cu mu. Miepi Group a report ruangah a chuakmi sunghzatlaaknak. Miepi Group kha nung peng seh law atu cu member ting khat leng an si cang lai. Miepi Group nih Miepi tlang hi a rak laarter tuk. Miepi Group a rak um ruangah Miepi tlang hi fakthanh (ကြော်ငြာ) cia a si.

Hmun dangdang i a ummi Laimi tampi kha Miepi tlang par va kai duhnak lungthin a ngeihter hna. Miepi tlang nih hmailei ah a pawngkam ummi Hriphi khua le Zophei peng vialte khi Tourism leiah tampi a tthathnem hna lai i phaisa chawva tampi a luhter khawh. Miepi tlang cu tlang sang, tlang dawh a si caah khualtlung mileng tampi a leem (attract) hna lai i a pawngkam khuate vialte phaisa tampi hmailei ah a huipiak khawh hna.

Atu cu Miepi group kha pumpak hlawknak men ah minung pakhat nih a thah caah Miepi tlang a laarnak zong a zor dih. Miepi min a tlau cang. Zophei peng ca ah zatlaknak nganpi pakhat a si. Miepi a thattu cu Hriphi khua kha khor chungah a phumtu a si. Miepi a thattu cu Zophei peng vialte tthanchonak a hrawktu a si.Miepi a thattu cu group chung ummi Laimi vialte kha zei ah a rello i a tthiotu a si.

Mah pumpak chawkawlnak le min ngeihnak men ah kan mibu a that ngam tu cu Laimi vialte i kan ral a si. Cu nak ttihnungmi an um lo.Zophei peng tourism leah tampi a tthathnem khotu ding Miepi tlang hmanh a min a that ngamtu pa cu Zophei peng a dawttu kan ti kho lai maw? Lungthli Tum bantuk chawva zong a ngeimi, fimthiamnak zong zeimawzat a ngei i a lungput a zermi hi kan mibu ca ah ttihnung an si.

Power a ngeih chinchap ahcun Laimi a kan buai dih lai, a kan zuar dih te lai.Thil ttha a tuahmi khi amah tthatnak caah tinhmi a ngei peng. A pu Zo Bawi MP aa cuh rua lai tiah a ruah i Hakha peng khuate cheukhat ah phaisa zeimawzat a hlut hna. Hakha peng khuate sifak pawl kha a pu Zo Bawi ca mee duh ah phaisa in a mawn hna. Mi ttha ngai aa lawhter. Nain, a pu Zo Bawi MP aa cuh tthan lo ding a hung si tikah phaisa a hlutmi zong a maak i, Hakha peng khuate pawl kong cu a ceih zuam ti lo.

Thil pakhatkhat aa tinhmi a um ruang, siloah laarnak a duh ruangah mittha aa lawhter tawn. Phaisa a hlutmi zong midang nih an thei sual lai lo tiah amah lila nih aa phorhlaw, aa phuang tthan. Atu MP cuh aa timhmi zong hi Thantlang peng pi-ne hluttaw No. (2) i NLD mee vialte vaihvuanh a duh caah a si. Lungthli Tum hi NLD MP aa cuh ding pawl cazin ah aa tel lo ti kha rak philh hlah uh. Tutan thimnak ah NLD minung a si lo.

NLD minung bantuk in aa chim lai, NLD a ttanhtu hna thazaang kha a fir lai i NLD mee kha chuh dih aa tim. A hrut deuh nih an fiang lo i heh tiah thazaang an peek. Thantlang pi-ne hluttaw No. (2) ah aa cuh ding hna lakah saya Rung Kaw, sayama Ni Sui Lian le Dr Hmuh Thang cu mittha an si ko. Nain, NLD minung cu sayama Ni Sui Lian a si khah.

Biadonghnak. Miepi group a thah kong he pehtlai in Lungthli Tum nih thil ttha lo a rak tuahmi kha an hngal rua lo tiah a ruah i mittha bantuk in aa umter. Amah bantuk thil a ngal pah ttung i thinlungput ttih a nungmi, mibu nuamnak zong mah hlawknak ah a hrawk ngammi, Laimi thong 40 renglo an i buutnak zong a tthio ngam tu nih MP hna icuh a vun itimh ve tikah Lungthli Tum kong hi mipi nih theih a herh tiah ruah a si caah kan vun phuannak a si.Credit: Thawng Hnin Thang

Be the first to comment

Leave a Reply

Your email address will not be published.


*