THANTLANG CNLD BUAINAK VIALTE A FIANG DIH CANG

Chin National League for Democracy (CNLD) Thantlang Peng Thawngthanhnak. Atu lio CNLD Party CEC nih Thantlang Peng CNLD Party siamremhnak le CNLD Thantlang Peng nih MP aa cuh ding Candidate thimnak kan tuah mi kong he pehtlai in mizapi lung fianternak ding caah a tanglei bantuk in thawngthanhnak kan van tuah.

Pakhatnak. Chin Miphun Hrambunh Party pathum fonh a si hnu ah Thantlang peng CNLD Executive committee (EC) cu 2019 kum August 22 ah zung onnak he chungtel 92 in fehter a si i CNLD Chairman pa 3 nih min zong an thutpiak. Cu EC thar nih cun CNLD Party MP cuh ding Candidate minung (4) thimnak ding cu CNLD party Central Executive Committee (CEC) nih January 20. 2020 cachuah mi ningin thim ding mi a si.

Sihmanhsehlaw Thantlang peng EC upa cheukhat nih cun 2016 September 6 lio i CNDP Party thing nih Candidate kong ceih mi ning khan an i rinh i 2019 December 15 ah fehternak an tuah chap. CEC nih cun phunglam a luh lonak kong voi tampi an chimh hna. 2020 January 20 ah CEC nih cachuah ning in zulhding a sinak voi tampi an chimh hna nain an cohlang duh lo.

CEC cachuah ning ah cun 2020 January 20 cachuah ning thok in June 27, 2020 tiang a hopaoh nih Candidate caah soknak nawl on piak dih hna ulaw cu hnuah a sok mi vialte chungin nan duh bik mi kha EC nih nan thim te lai ti a si. Asinain Thantlang EC Chairman Pu Lal Mawng Cung le Secretary Pu Tum Sang nih cun 2016 lio CNDP Party hlun i minung pakhat caah chiahpiak mi thlau an duh lo caah State Hluttaw No. 1 thim hmun (Constituency) cu ahohmanh sok kho ti lo dingin an phih.

Cucaah Salai Ceu Bik Thawng nih 2020 February le 2020 May tiin voi hnih khengte State Hluttaw No. (1) hmunhma soknak a chiah mi zong Party Chairman le Secretary nih an hlawtpiak (an cakuat zong a um ko). Cucaah Central Party hruaitu (CEC) nih Vice Chairman Pu Awm Yaw le Pu Naing Hai Kawn cu an rak thlah hna i Thantlang EC auh in Candidate thimnak tuah dingin CNLD Chairman Pu Lal Mawng Cung an fial nain a duh lo, a el hna.

A rannak in kir uh nan kir lo ah cun minung 50 ka auh hna lai i sandah kan piah hnawh hna lai. A herh ahcun thisen zong a luang lai tiah a tlerhkhonh hna caah Central upa pawl cu a rannak in an kir colh. Cucaah Party CEC nih Pu Lal Mawng Cung le Pu Tum Sang cu Party phunghrampi le CEC cachuah mi zulhphung pakhat hmanh an zulh duh lo caah le Central party hruaitu CEC nih commission caah an van thlah mi Vice Chairman (2) cu an rak hrocer hna caah an dinhter hna.

Thantlang CNLD Party EC hrawhnak a um hrimhrim lo. Party EC chungtel minung Chiarman le Secretary tu kha Party hruaitu sinak in siseh, Party chungtel sinak in siseh an chuah hna nak a si. Thantlang Party EC 92 lakah minung pa 2 lawng hi chuah an si caah minung 90 cu an hmun ko. Chuah an si lo.

Pahnihnak. Candidate Thimnak kong acung ah kan langhter bantuk in Thantlang EC Chairman le Secretary nih Party phunghrampi le CEC cachuah mi pakhat hmanh zul loin le EC zong Candidate thimnak caan khiahpiak mi chungah cohlan loin anmah nih khua an khanpi hna caah CEC nih an khuakhan mi cu pom lo in a hnawlpiak hna. CNLD nih Thantlang peng telh in Myanmar ram ah Peng (Township) 27 ah EC hi a ser i Candidate a sok mi hi 200 hrawng lakah minung 48 hi mah le Peng (Township) ah an thim ( fehter) cang hna.

Adang Candidate 10 hrawng hi fehter ding a ceihcuahmah lio a si rih. Hi zawn ah, Thantlang EC nih an chuahpi mi dah ti lo a dang (peng dang) EC nih chuah pimi vialte cu CNLD CEC ah theihpinak an kuat cang hna. Peng dang ah buainak chimthlak zeihmanh a um lo i Peng dang EC vialte nih cun cunglei CEC khuakhannak hi phunzai lo tein an zulh dih.

Cucaah CEC nih cun a voihnih nak Inquiry Commission cu Vice Chairman 2 a si mi Pu Ling Hung le Secretary chungtel Pu Mang Hlei Thang tiin Thantlang ah an hun thlah than hna i Candidate thimnak zong cu Thantlang Peng EC siamremh tharmi nih a tanglei bantuk in kan tuah than hna. Cucu CEC zong nih 19/7/2020 hnatlaknak in an ferter cang. Cuhna cu, Dr. Van Hmun Lian (Amyotha Hluttaw). Salai Van Bawi Lian (Pyithu Hluttaw). Mai ChinChin Pekthang (State Hluttaw – 1). Pu Hmun Rung Lian @ Saya Rung Kaw (State Hluttaw – 2)

Pathumnak. Chin National Party (Kawlca in ?????????????????????? ????) timi CNP Party ah Pu Lal Maung Cung cu aa thial. CNP hi Salai Aye Tun Min (kum 30) nih 2019 August ah a dirhmi a si. Party dirhtu hi CNDP Party lio ah CEC chungtel a si nain Party Pathum fonh a hung si tikah Party pakhat minung 13 cio in CNLD CEC thar cu chungtel 39 in ser a si i cu ah cun CNDP aiawh in thim a si lo caah hi Party thar CNP a dirhnak hi a si.

Palinak:Atulio CNP Party thar hi Chin miphun ramkhel lei funtomnak caah timhmi nakin pumpak hmunhma ngah lo ruang ah dirh sawh mi a si tiah kan pom. Party phunghram an ngei lo pin ah Party Chairman le Secretary telh in CEC cazin zong thitha in Thimnak Commission (UEC) zung ah an chuah pi khawh lo caah UEC nih an thanhpiak kho hna lo.

Panganak. CNP Chairman a simi Salai Aye Tun Min nih 2020 hramthok ah CNLD Party ah lut than ding le Vice Chairman hmunhma (position) pek dingin CNLD CEC a pehtlaih than. CNLD CEC nih a kong an ceihpiak hnu ah Secretary Chungtuan ah chungtel siseh tiah an lung a tling. Cuhnu ah an Party CNP zong hrawh ding in Thimnak Commission (UCE) ah cakuat zong an tial cang i CNLD kan Party ah ifonh dingin biakhiahnak minsen thut ding ah June 11, 2020 CEC meeting ah Chairman Salai Aye Tun Min le upa pahnih cu Rangoon an phan.

Asinain mah cu ni CEC meeting ah an kai tikah ruah lo piin Magwe ramthen i Chin Affair Minister (Chin Vuanci) si a duhnak kong, hmunhma pek a duhnak kong a chim tikah hi kong cu Chin a simi a hopaoh nih zalongte in sok khawh a si i a sokmi dihlak chungah CEC nih phunglam ning in mi tambik thimfung in a thimmi fehter a si lai tiah an chimh tikah a lung tling lo i cozah le kan Party CNLD sin i Party fonh ding hnatlaknak ca a kuatmi vialte cu a hnawl dih than i minthut loin a chuahtak than. Citicun MP Hmunhma pek lo le a halmi Vice Chairman hmun pek lo tiah a ruah caah Miphun Party pakhat i fonhnak ding khuakhanmi vialte le a lungtlinmi ciami vialte zong cu a hrawh dih than.

Paruknak: Chin Miphun Hrambunh Party (CNLD ) cu Chin ram peng dihlak le Magwe, Sagaing ummi peng (Tawhnship) 27 ah fek tein EC ser le miphun party thantar le signboard tar a si cang. Rakhine ram ah peng 5 ah kan lut than lai i a dihlak peng (30) renglo ah kan dir lai. MP candidate hi a tu tiang ah minung 48 kan fehter hna i minung 55 nak tlawm lo kan i cuh lai.

Pasarihnak: Kawlral huap ramkhel party 96 lakah Candidate a tambik party 10 lakah i tel kan i tim. Tlangcung party lakah candidate a tambik pathumnak kan si. Shan, Rakhine changtu ah Chin si kan i tim. Cucu CNLD kan i zuamnak a si. Chin miphun hi Myanmar ah milurel a tambik pa 5nk kan si caah Chin mipi nawl a si ko. Mipi nih fek tein nan kan dirpi nan kan thim ah cun Myanmar ram ah party thawng bik 5nk si khawh kan si. Kan party thawnnak dingah party phung fek tein le miphun dawtnak ngei papek in kan kalpi.

Pariatnak. Cucaah atu bantuk in Party chung thianhlimnak (Cleaning) zong kan phunghram ning in raltha tein kan tuah cuahmah. Thantlang EC chungtel a si mi CNLD Chairman Pu Lal Maung Cung le Secretary Pu Tum Sang phuahnak ruang ah Chin miphun Party zeihmanh idannak a um lo.

Pakuanak. CNLD cu ramkhel Party pakhat a si ko nain Chin Miphun dihlak nih cohlan khawhmi le Chin miphun a huap khotu si ding in aa zuam mi le kan phunghram fekte he a dir mi kan si. Pumpak nak in Chin Miphun mithmai zoh in a kalmi kan si. Cu kan lamthluan ah harnak a um ko nain Chin Miphun dirhpinak thawng in kan tluang tuk ko. Kan miphun caah fekte in dir in hmai nawr kan izuam zungzal lai. Chin miphun a simi dihlak sin in ruahnak peknak le saduhthah pinak zong kan cohlang zungzal lai. Chin miphun thawng in tutan cu teinak kan hmuh hrimhrim ko lai tiah miphun dirkamhtu mizapi sinah thawng kan in thanh hna.

Pahranak: CNLD Thantlang Peng kan boruak kong ah lungrethei mi le ruahnak a kan cheuhtu nan dihlak cung ah kan i lawm. Nan kan tanpinak thawng le nan kan dirkamhnak thawng in miphun dang hmai ah Chin Miphun (Chin Party) mithmai thar kan hmuh i kan thazaang a thawng. Chin Party CNLD a dawtu nan dihlak cung ah le a lamkip in a kan dirkamh tu kan Chin miphun dihlak, Thantlang Peng mizapi cung ah kan lung aa lawm.Chin National League for Democracy (CNLD).Executive Committee, Thantlang Peng