SHARE CIO UH. PU SIANG MANG NIH MIN AUNG HLAING ZOHCHIA IN A TUAH

Ralkap nih nawlngeihnak a lak hnu ah Chin State Administration Council (SAC) Chairman ding ah Pu Siang Mang cu rian an khinh nain a cohlang hna lo, tiah February 15 ah kan theih. “An ka fial taktak ko. Asinain, ka al ko hna. Zeicahtiah, kei cu mizapi nih duhlo mi cozah le hruainak tang ah riantuan kaa tim bal lo. Cun, 2020 November 8 thimnak ah mizapi dawtnak thawng in Palai zong ka rak tling.

Hi tluk in mizapi nih an ka dawt lio i mizapi nih an duhlo mi ah vaa thial cu kaa timh bal mi a si lo ca ah ka cohlan hna lonak a si,” tiah The Hakha Times ah a chim. SAC Chairman hlun Terrance Pu San Mawi Ni Khuai cu February 11 zing ah lung lei zawtnak in ruahlopi in a thi i cu hnu ah amah ai-awhtu ding ah Pu Siang Mang an sawm nain a cohlang hna lo, tiah kan theih.

Chin State Administration Council Member (SACM) ah Pu Ngun Sang Aung, Pu Go Suan Khai le Minister hlun U Han Win Aung hna lawng members an fiang rih i Chairman ding a fiang kho rih lo. Pu Siang Mang cu 2020 November 8 thimnak ah CNLD party in amah lawng teinak a hmu mi a si, tiah kan theih. Credit: The Hakha Times.

Hi kong hi vun rel chih hmanh. Pu Tum Bik Le Palik Chungkhar Biak Sung. Pu Tum Bik kongah siseh, Hakha i thawngpang latu palik nupi nu le a far kongah siseh, khuami or chungkhar unau ka cungah nan lungfak ti ka theih. Keicu ka chim cia bangin, a si khawh chungin daihnak phurtu si ai timmi ka si. Ka page khi zoh u law Kawlram a buai hlan ah midang ti hniarnak le thangchiatnak dohnak ai tel lai lo.

Ka Facebook account zongah biazai, thazaang peknak, capo le lung um tete dah lo cu midang he i dohnak a um lo. Tutan belte cu Lailei a ummi hna an fb i ca post an ngamh lomi paoh an ka kuat i ka friends a simi he si lomi he an ka pehtlaih. Anmah nih an post ahcun an post thaizing ah thong an tla kho. Ralkap nih uknak an lak ṭhan te lai timi kan ruah bal lomi a vun can tikah thil sining ai let dih i biazai ka ṭial tawnnak cakuang cu midang kong chimnak ca ah ai cang. Ka lung cu a ṭha hrim lo.

Ka nolh rih lai. Chungkhar lei hna ka ngaithiam uh. Nan zawn kan ruah ve ko hnga. Bia chokvai cu bia porhmi zong a um ko lai nain tuah tak takmi hi cu kan zamh peng ko lai. Keimah nih thawng ka zamhmi ruangah nan lung a fak ko lai. Hi thil ka tuahmi hi Bawipa nih a si awk a si lo a ka ti cun nun a ka cawnpiak te lai ka zumh.Kan miphun himnak ding caah cun chungkhar lei sinin biafak zong kan in rih ko lai.

Ka ngaithiam uh. Palik le ralkap lei ah a ummi hna nanmah nakin ralkap le palik kut tang a um i a tuarmi hna ka zawnruah deuh hna nak caan a si. Tu lio cu kawl cozah sinah thin hun lio a si caah nek tukin bia nan chim i kan leh vemi hna a um zongah ka ngaithiam uh. Kan let hrim hrim ti hna lai lo tiah bia kan kamh hna.Note: Zapi nih biafak fak in an in timi ka hmuh hna ah ka lung a ṭha lo. Nain zapi an temtuar tuk caan a si caah anmah diriam tein bia chim ve ko hna seh. Credit: Nusung Htl- Nunu

Relchih: Lai mi nih CDM le duh lo nak langh ter nak kan lang ter ve ko hi mak ah a tha deuh ko cang lai. Kha tluk in lung rual ding in za han ah bank riantuantu pawl rian tuan lo ding in le i thup ding in ralrinnak le fim khur ding in kan i pek bu ah lai mi cu Hakha hrawng lai mi khua pawl cu bank an awm zuar i ralkap le palik nih an cong zuar an ti ko hi. Khua bawi pa nih le palik pawl a khua chung mi nung lila 100 tluk an inn ah a kalpi hna i an tlaih viar ti asi hoi, ralkap nih rian khin mi a rak cohlang mi zong kan um len ti a si hoi.

Zei cu dah CDM kan ti mi le duh lo nak kan langh tar mi cu san a tlai ne? Ram dang phaisa kuat mi cu ralkap pawl bawm lawlaw ah a tha ko lo maw cang in? A ngai tak lo ah cun Chin mi khua kip ah duh lo nak kan lang ter tham khi cu palik le ralkap nih van ah meithal voi hnih thum puah hna seh law a tio viar ding lawngte dawh kan si ko hna cuh. Kan I ruahchan bikmi tham cu CDM le khuabawi tlang mipi hna i hum nak hi pei asi ko cu. Tha chiat nak ka chim si loin Kei cu CDM le duh lo nak langh ter nak zong hi lai mi paoh nih cun ma ko cang hna usih law a tha ko lai. Kan ngam tak tak tung lo i kan tha lam a di i kan mah le mah san tlaih lo mual tu kan i phoh asi ko lo maw? Naypidaw, Mandalay le Yangon hrawng i kawl pawl tuah mi duh lo nak tu nih khin thlen nak taktak cu ti lian bang in a vun kan ciarter te ding tu khi i ruah chan ah a tha cang hnga lo maw? Credit: Sui Pi ( Chin News)

Be the first to comment

Leave a Reply

Your email address will not be published.


*