SHARE CIO UH: AHMANTUK, TLANG KAN AUMI HI A SAWHSAWH ASI LOH

Tlang kan au mi hi kan au sawh sawh loh(Freelance CDM). CDM hi ralram kal he ai khat mi asi. Ttuan ciahmah mi rian kal taak asi hlei ah cunglei bawipawl nih hro le ceer le cupin ah tlaihkhih action laak ton ding i ruah chih bu in, ka va thi kho men, thong ka va thla kho men, an ka hrem khawh men ti in zalam an va zawh hi asi. Hriamnaam he arak bawh ko mi hna kha kut ro in va doh bantuk asi. Mah tluk ral ttha i revolution tuah hi a um bal lo mi asi.

Ram dang zong nih an rak tuah bal na in hriamnam he rak dir onh an tong bal lo. CDM atuah mi hi kan upat hna, kan thangthat hna i miphun le ram ca i ai pe taktak mi nan si. Revolution tuah hi a fawi lo. Zaraan nih tuah khawh mi asi lem lo. Ralkaap a tla mi lak ah ralram a kal ngam taktak lo mi an um tawn bantuk in tutan CDM zong a lung in aduh ngai ve ko na in a minung sinak a phunphun ruang ah a ti kho ve rih lo mi an um.

Hi hna hi faak tuk in soisel ding hneek ding an si lo. A caan a phaan te lai. Lung zong dong viar le thin hung viar in i tuah ding asi lo. Lung lomh awk ngai ngai asi mi cu atu ah Min Aung Hlaing nih Palik pawl hi an duh poh in meithal an hmang action kan laak hna lai ati cang i cu ruang ah Police pawl tampi nih CDM an tuah cang lai ti a fiang. Kan mah Lai lei zong ah an tuah cuahmah cang i ramtang an phan pah len cang ti zong kan theih.

Police pawl hi tuan te in an lung a fim ding asi. Ralkaap nih puanchia bantuk in anhman hna i ralsa an tarh hna hi i fahsak tuk ding asi. Atu cu an i fiang pah cang. Ram leng um mi pawl nih FREELANCE CDM tuah hram kan thok cuahmah ve. Hlan lio Bamah ttatmadaw a rak thok tu Yebaw tungcaih timi hi ralkap sawmthum in an rak thok. Hrangnawl Tapung zong cu hibantuk ram buai nak in a rak i thok. CNF zong cu tthiam tthiam.

Atu ah hin CNF ah kan luut lai ti usih law mipi nih kan bomh hna lo tuk ruang ah an ei ding kawlhawl nak ah an buai khim i cucu mipi saan tlaih lo tuk ruang bik ah asi. Midang kan rak ra lai ti zong ah tlun inn a rak onh kho ding hmanh an si lai ka zuum lo. Atu bantuk miphun pi lungfah lio ah hin Revolution pakhat a chuak tawn mi asi.

Atu cu ram ttha ttha ah minung mah vialte dollar in a cawlcang mi kan um cang. Kan hri le kan ruang zoh tik ah Revolution process hlei a van zawh mi lawng te kan si. Chimh leen a hau mi kan si lo. Chimh a hau mi cu ai hngilh ter mi tthangh an i har ter bantuk sawhsawh khi an si. Cu cu a fiang tuk mi asi ko. Cu caah ramleng nih FREELANCE CDM kan tuah ve nak ding cu hi kan ralkaap hna miphun a veengtu hna rak dirkamh ve hi asi i cucu Dollar 4000 family pakhat nih cun i ruah chih cio hna usih ti hi asi.

Ram chung um mi vial nan rian kal taak uh ti i fial ttung i mah vial thlakhat lahkhah hmanh kan sian lo ah cun Min Aung Hlain ttapeh bantuk men kan si ko lai. Ai harh tuk minih mah le ti khawh tawk te in Ramleng CDM ah hin rak i tel cio ding hi faak pi in kan ruah cio aherh tuk mi asi. US nih zeitik ah dah arak kan doh piak lai, UN nih zeitik ah dah akan doh piak lai ti lawng ai bochan mi kan tam pi. Ningzak asi.

Kan ram chung revolution cu ram ngeitu nih tuah ding asi ko. Mi dang fial phung asi lo. US mi nih US caah nunnak an peek awk asi ko. US mi nih Kawlram Lairam caah an nunnak hong pe hna seh law kan nih cu rak um huar usih ti bantuk ruahnak cu ruahnak chiakha asi. US le UN nih mi ramdang ral an doh pi tik hna ah cuka ram chung ah vai ttawm ding mi ralkapbu an um tawn. Cubantuk tluk tal asi mi ramchung ah miphun ralkaap i ngeih ve ttung lo in US le UN nih hong kan bawm hna seh ti cu seihkuzin sawhsawh asi.

Cu bantuk khua a ruat taktak mi nih cun kan ram chung miphun ralkaap caah meithal pakhat man tluk tal asi mi, kan mah pumpak kan i tel ve can ai ah kan i thawh ve ding asi. Zei caah ti ah atu ah hin kan mah pumpak nak in a hriammaan le a chawva hi an herh deuh i cucu ram leng chuakpawl nih kan peek khawh ve mi hna asi.

Cu caah Ramchung ah CDM tuah in nifatin ralram ah an kal peng bantuk in Ramleng um mi pawl zong nih kan mah pumpak CDM tuah can ai ah kan thlakhawt lahkhah tluk tal asi mi hi cu rak i thaap ve hrim hrim hna usih law cuti i kan ttan rual ah cun hi Revolution hi kan hrilh hrim hrim ko lai ti hi. Credit: Salai Bawiukthang Cinzah.

Be the first to comment

Leave a Reply

Your email address will not be published.


*