MAH BIAHALNAK HI JESUH MIN IN SAYA JOHN FREADY RAK KA LET TA

Bible Bia Halnak ( Khrih ah ka unau John Fready sinah kan Bawipa Jesuh Khrih thawngtha bia halnak ) BIAHMAITHI : Hi thawngtha hi kan Bawipa Jesuh Khrih vancung khua a kai hnu bia a si tihi philh bak lo ding a si lai. Zei a si paoh ah ka upa, zumhnak zong kan i khah lo buin bia na ka hal tawnmi zong ka si khawh tawk tein kan leh ve tawn ko caah khan atu kan halmi te hi cu zangfahnak tein hi Group ah hin fiannak ra kan tuah piak kho law kan i lawm tuk ko lai ee. Cucu hihi a si.

Saul – Paul, Paul tiin ka hman ko lai. Lamkaltu Paul cu Pathian kan Pa YHWH ( Judah miphun hna nih Adonai ti zongah an auhmi ) Israel Pathian, Elohim lawnglawng kha a rak biami le a zummi a si. Sihmanhsehlaw kan Bawipa Jesuh Khrih a thih i sunparnak le iangngannak in thawhter a si hnuah le van a kai hnu i Pa sin khan Thiang Thlarau zong a hmuh hnuah, cu Jesuh Khrih nih cu lamkaltu Paul cu a rak ton than tikah, lamkaltu Paul zong cu lungthlennak taktak a hmu ve.

Cu bantukin lamkaltu Paul nih a chimmi cu, “Ka u le ka nau hna, nan sin i ka chimmi thawngtha kha minung serchommi a si lo ti kha chimh kan duh hna. Cu thawngtha cu minung sinin ka hmuhmi a si lo i minung nih an ka cawnpiakmi zong a si lo. Ka sinah a phuangtu cu Jesuh Khrih hrimhrim kha a si,” tiah a ti. ( Galiti 1 : 11 – 12 ). Cucaah cun lamkaltu Paul nih a chimmi thawngtha vialte hna hi Jesuh Khrih hrimhrim nih a chimh dihmi a si tinak zong a si.

Kan hal duhmi cu hihi a si. Bible relnak; Lamkaltu 9 : 19 – 20 ( Saya Sang Awi ) Cun a tho i baptisma a in, rawl a ei i a hung fekfuan than. Ni tam nawn chung cu Damaskas khua zultu hna sinah cun a um. Sinakok ah Jesuh kong a chim colh i, “Amah hi Pathian Fapa a si,” a ti. Cun rawl a ei dih hnuah a thazang kha a tlung than. Saul cu Damaskas khua i a ummi zultu hna sinah khan ni tlawmpal a cam. Pumhnak inn ah khan i cungcang loin a va kal i, “Jesuh cu Pathian Fapa a si,” tiah a chimh hna. ( Dr. David Van Bik )..
‭‭
Question; 1. Kan Bawipa Jesuh Khrih lawnglawng hi Pathian a si ko ahcun zeiruangah dah lamkaltu Paul nih hin Sinakok ah Jesuh kong a chim colh ah khan Amah hi Pathian Fapa a si tiah a ti? 2. Jesuh nih cun keimah lawnglawng hi Pathian cu ka si tiah a chim hnga lo maw? ( Eg;- Lamkaltu Paul nih le ka chimmi thawntha hi Jesuh Khrih hrimhrim nih a ka chimmi a si tiah a ti fawn ko tung ). 3. Lamkaltu Paul nih hin a lih bakin maw kan Bawipa Jesuh Khrih kong hi a kan chimh ne kun hnga?

Note : Comment nak ah kan hal lai ka ti ko nain nih na hmang tuk pinah comment nak lawngah na ka leh sual lai i mi tampi nih an thei sual la lo caah thazaang zong an i lak kho ve sual la loh ti ka phan ve caah hika te hin kan halnak a si. Theithiamnak he kan Bawipa Jesuh khrih min in na rak ka lehnak lai zong zaangfah kan nawl ko. Biahlatu; Johnly Fambawl

Be the first to comment

Leave a Reply

Your email address will not be published.


*