Saya Chan Thawng Lian,Thinphan Nun Cu Hnawmpung He Ai Lo, A Tha Kho Tak Tak

Thinphan Nun Cu Hnawmpung He Aa Lo.Thilri hnawm cu hnawmpung chungah kan hlawnh khawh. Phaisa kan liam i company nih an hung lak. Thinlung hnawm bel hi mah tein hlonh thiam lo ahcun company nih an thle kho lo. Phaisa zong nih a thle kho lo. US Pastor minthang pakhat Keith Krell nih a chimmi hi hun ruat ve. Ka hngakchiat tein thuhden pipengthui in aa thuimi (Rocking Chair) cungah kan um peng i a nuam tuk, a ti. Lungretheihnak ka ton caan zong ah mah thutden ahcun ka rak thu i ka thin a dam deuh, a ti.

Nain ka upat deuh hnu ahcun cu thuhden cung ka thuh pah ah thinphan mi ka ngei peng a ti. Thuhden tha takmi cung i thuh ko i a thin a phang pengmi kan si kho, a ti? Khua ruah ah thinphan, zeihmanh thil tha tuah fawn lo cu thinlung hnawm phurh a si, a ti. Thutden chia nawn i thuh fawn i a thinphang chapmi hna si le bang ahcun thih hlan lo hnawm tha lo aa phurh peng kan si hnga. Khua ruah tuk, mi bi aa uai pi tuk, hmailei kong ruah tuk, hmunhma i cuh tuk, phaisa duh tuk, minthan duh tuk te hna hi mah le mah hmunthur hnawm i phurh a si. Mi caah thilrit sinak a si. Psalm 127 ah Pathian nih a dawtmi hna cu an i hngilh kir ah an herhmi a tuah piak ko hna a timi kha ka fiang ngai ve cang.

Thuhden tha cung i kan thuh ko ahcun kan thau chin. Mi nih an kan tih nain zeihlei kan si lo. Lungretheihnak hnawm tu tam deuh kan i phurh. Mah nih khin: 1) Chungkhar buainak a khamh lo, 2) Thuh ahcun ka dang phanh khawh a si lo, 3) Thuh ahcun lungretheih lawng aa chap i khua thalo ruah a si. Thuhd en tha cung i thuh sawh nih harnak a bawm loh, pum a damter loh, phaisa a chuahter loh, Pathian nih a kan pek ciami kan pum thazang tu a derter. Cu caah Pastor Keith Krell nih, thin phangmi nunnak cu hnawmpung nun a si, tiah a auh. Thinphan cu riantuan a si lo. Thazang donghnak tu a si. Mizei si hmanh ah zumtu cu nihin thok in thil tha tuah khawh a si peng.

Lungretheihnak nih thazang ngeih cia mi a chuh. Thil tha tuahnak nih thazang thar le lomhnak a chuah pi. Peknak nih US President Abraham Lincoln a lung zawt tuk lio ah a dam ter timi theih a si. Thuh sawh i mah lungretheihnak mi cung ah chuahter, bia chia chim, mi ngiar, mi sosel khi hnawm pung sinak a langhtertu tu a si.
Lungre thei in um hlah tiah kan Bawipa Jesuh nih Mtt 6 chung ah voi thum a chim (Ahme 25,31, 34). Lungre theih lo cu khuaruah lo, rian tuan lo khi a chim duhmi a si lo. Hmailei kong tuak lo i nun zong a si lo. Pathian i bochan loin minung hawi tih tu khi a si. Phaisa kong ah thinphan khi a si. Mi huat khi a si. Ka palh ti duh lo khi a si. Lehrul cham duh khi a si.

Cu bantuk hnawm a ngei i nun a rawk cuahmahmi US minung kum khat ah million 40 leng sizung ah an thlop cuahmah hna. Covid-19 nakin tih a nung deuh. Lungrethei in um cu hnawm nih nenh he aa khat. Khrih nih ti le rawl, hni le puan kong ah nihin ahcun nan lungre thei hlah uh, Pathian duhnak tuah tu kha tuah i zuam ko uh a ti. Thaizing kong cu hohmanh nih kan thei kho lo. US minung kum 95 cung bia an halmi ah, an chan a saunak cu soisel tu nih rawl an pek hna ruangah a si lo. An medical bill zong an pek piak bal hna lo. Nihin hi ka caan tha bik a si tiin Pathian caah an nun ruang tu ah a si. Caan a ngeimi paoh Pathian dawt rihmi kan si. Hnawm siloin Pathian dawtnak tu i phurh hna usih! Amen.

CTL

Sermon tawi rel a huammi Caah: http://www.kapakandawt.com

Crd, Chan Thawng Lian

Be the first to comment

Leave a Reply

Your email address will not be published.


*