SALAI VAN LIAN THANG: HIHI CU KA HUN COMMENT TTHAN TA DUAK KO LAI

Hihi cu ka hun comment ṭhan ta duak ko lai. Ti hin chim ding asi. Kan i lawm. UPDJC (Political Dialogue) ah Political Parties pawl, a bikin tlangcung miphun party pawl an dirhmun hi a biapi ve maw? timi hi mizapi i el pahmi asi tawn.“Khatlei kan ral he kan i nam lioah political parties pawl a hlambikmi cu keimah hi ka si” tiah piang lakin UPDCJ Vice Chairman le CNF Vice Chairman nih a hun chimmi nih bia a daihter cang men ko lai.

Cucu a biapimi “point” a hun si. “Political Parties hi mipi aiawhtu an si, Political Dialogue ah an itel hrimhrim a hau” tiah NCA negotiation lioah hriamtlaibu (EAOs) nih an rak nornak zong kha achim. Hi nih Kawlram peace process ah “electoral politics or electoral mandate” hi tlangcung miphun caah a biapi ve dakaw ti kha a langhtermmi asi.

Cucu zong a biapimi “point” a hun si. 2015 thimnak lioah U.S.A lei he Talkshow pakhat ah upa zeimawzat he biaruahnak khi kan ngei. Zoom um rih lo i Skype in kai tel ve. “Kawlram thlen timi cu USDP tei khi asi lo. 2008 Phunghram thlen khawh khi asi. Cucu aho cozah NLD le USDP an kai zongah an thlen khawhmi asi lo. Cucaah atu thimnak ah hodah cozah aser lai (regime change) timi tiang lawng zoh nakin cozah thar a kai hnu pinlei (post-election) ramkhel tiluan ah zeitindah “ethnic problems” hi kan “solve” khawh lai i ramkhel biaruahnak in “political solution” a chuah khawh lai timi zohin thimfung kan thlak hi a biapi deuh.

Zeicatiah “political dialogue” tikah Tlangcungmi political party pawl hi ramkhel cabuai ah an ṭhu ve hna lai. Cu hna cu ṭhawnter le cahter a herh ko” tiah ka rak chim. (voice record um rih ko lai, Lai Forum le FB zongah thlah cangmi asi). Panelist asi vemi kanpa pakhat nih ti hin aka leh, “Political party pawl, cozah pawl, hluattaw pawl hi cu (Political Dialogue ahcun) meh ṭamhnak ah kan hmanmi spices bantukah ka chiah hna. Cu tluk cun role an ngei lai lo” tiah a ka leh.

Ramkhel cabuai ah political parties pawl meh ṭamhnak masala le achu-hmungh bantuk sawhah ruahnak hi naite tiang mitampi ruahnak khi asi ko rih in a lang. Cucu ”a palhmi asi” ti kha tutan ah a chungah aa telmi hna nih an hun chim tikah a tliang ngai. 2015 thimnak lioah ”political dialogue ah an biapi ve dakaw, cucaah tlangcung miphun party hi thapek an hau dakaw” ti voi tam non khi kan rak ṭial. Zei cozah a kai lai timi nakin kan ram thlennak tawhfung political dialogue ah zeitindah mah electoral process hi tlangcungmi caah ṭhathnem santlai ah kan canter khawh deuh lai, timi te khi ka interests mi cu asi tawn.

Nain, mi tampi an rak interests mi cu “core political issue” kha a rak si lem hna lo. Cucaah i thlaak zong khi lung a tho kho deuh tawn ti lo. 2015 thimnak lioah kan dirpi sek hna nain an ngah lo ruangah UPDJC cabuai in an doi hna ti hna kan theih tikah kan lung a rak ṭha lo ngai. Tutan ah UPDJC Vice Chairman nih “kan ngaih a rak chia tuk” a timi te nih bia tampi khi a hun chim tiah ka ruah. “Mipi ṭhohkhannak an hmu lo, arti an khuai lo” tiah UPDJC cabuai in doi an rak tonmi zong kha adikmi cu asi lem lo. Zecatiah “election system” kha Kawlram ahcun “FPTP system” kan hman caah asi ko.

Democracy ram tampi hmanmi “PR system” hmang sihlaw MP tampi an ngah ko hna lai, mipi ṭhohkhan mee tampi an hmuh ve ko, meehmun tampi ahcun mee tlawmtete lawngin an ithlau. Denmark, Norway, Sweden, Germany bantuk PR system sisehlaw tlangcung miphun party nih MP tampi an ngah ko hna lai. PR system zong cu Thein Sein cozah chanah hman ṭhan dingin an rak timh nain NLD nih an rak duhlo ngai i NLD nih a chimmi poah cu a ṭha ko lai tiah tlangcungmi tampi nih an rak zulh hna caah asi pah ko rua.

NCA hnatlaknak 22 (a) ningah Kawlram remdaih khuakhannak “Political Dialogue” ahcun “Political Parties” pawl tello khawh lo dirhmun kha a hun si. FPD ningin anmah tel loin UPDJC auh khawh asi ti lo. UPDJC ah EAOs nih upa 16 an thlah cun, upa 16 an thlah ve, 21UPC ah EAOs leiin 150 an kai cun an nih zong 150 an kai ve. Cucaah “tlangcung miphun political parties pawl hi ramkhel cabuai ah ral atu vemi an si, an role hi a hme lo dakaw” tiah langhter kan izuam tawn.

Buchoh Aung San chanah 1947 Supreme Council of United Hill Peoples minin (Panglong conference) le U Nu chanah 1962 States Unity Organization (Tawngyi conference) minin “Political Dialogue” le “Federal Movement” ah biapi ngaiin a rak dirpimi zong cu “tlangcung miphun political parties leaders” thotho kha an rak si. Tuni “political dialogue” hi ngaingai ahcun mah kan pupa hna an rian “hmaban” a pehzulhmi kha kan si.

Cu caah Tlangcung political parties hruaitu chungin ramkhel biaruahnak ah aa telmi: Dr Tuja (Kachin), Pu Ngaisak (Chin), Sai Kyaw Ngunt (Shan), U Hla Saw (Arakhan) tbk pawl hi zeitindah ramkhel biaruahnak ah an dirhmun biapit lo cun a um lai? EAOs upa cheukhat bangin a chimrel kho vemi an si ko lo maw? Hi bantuk “political role” a ngeimi hi tlangmi nih ṭhawnter awk an si lo maw? ti kha kan chim tawnmi cu asi. Nain, cu bantuk “core issue” kan chimmi cu mi tampi nih an kan hmuhpiak kho ṭheo lo.

Thil poimi cu mi cheukhat nih “political dialoge” hi cu hriamtlaibuu he lawng aa sengmi ah kan ruah hna i, “electoral politics or electoral democracy” he kan pehtlaihter kho hna lo. Electoral process in a chuakmi “electoral mandate or dejure mandate nih zeidah tlangcungmi caah thil ti khawhnak a ngeih ve ” timi a thazaang kha kan hmu kho hna lo. “Ruling government” silo ahcun zeihmanh tuah kho lomi ah khin kan ruah dih.

2008 Phunghram cu “legal means” in thlen khawh asi lo, “political means” lawng in thlen khawhmi kha asi. “Political means” timi cu “Political Dialogue” kha asi. Cucu Kawlram thlennak ah kan tawhfung kha asi. Cucu NCA process zongin a cang kho, 2008 constitution review committee chung zongin a cang kho, 1962 Federal Seminar bantuk phun zongin a cang kho, Parliament inn hnulei “Smoke Filled Room” zongin a cang kho, National Defense and Security Council (Kaalung) cabuai zongin a cang kho, Thurah Swe Manh le Thein Sein chan hruaitu bikbik paruk tonnak (six-way talks among top political leaders) bantuk zongin a chuak khomi khi asi.

Tulio cun NCA process hi a lam a ongmi cu a hun si. Nain, mah hi cu lampi pakhat khi asi. Mah lampi hin chuaklak va ral kan phak lo sual si zongah “federal movement” ngol loin kan tuah chung pohpoh cu, a dang lampi zongin a chuak thotho te ko lai, ti kha zumh a haumi asi tawn. Biapibik cu: “any political dialogue” ah tlangcung miphun timhcia kan si ahau i, kan thazaang a ṭhawn a hau” timi kha asi ko.

Ramkhel thazaang kan timi cu ”popular supports” kha asi. Cucu electoral process ah “verdict” tuah ding kha asi tawn. 2015 thimnak lio hrawng ahcun tlangcung Political Parties hruaitu zeimaw cu: “Political Dialogue” ah an “role” khi anmah lila a hmete khin an ihmu. Kan “role” zeitluk a ngan ve timi kha anmah lila nih an hngal set lo. EAOs upa an bia a dirkamhtu le a bawmtu sawh ahkhin an rak iruah ko cu ta, “key stakeholder le main actor role” a ngei vemi khin an iruat hna lo.

2015 thimnak hnu UPDJC cabuai in an doi hna i, 2017 by-election hrawng lawngin biatak nawnin a aupi awk an hun hngal. Tutan 2020 thimnak cu asi lem ti lai lo. Mizapi zong lung a fim deuh ko cang in a lang. Naiah SNLD hruaitu San Ngunt Lwin interview ka ngai, “kan nih political parties pawl cu EAOs le cozah nih an ceihchah ciami kumzabu 21 Panglong conference ah lusuk piak dingah khin kan ra ko lo maw, hmailei ahcun mah bantuk hi cu kan let khan kho ti lai lo” tiah a chim.

Hruaitu upa zeimaw zong nih cuticun an ilawmh deuh lonak kha an chim. Political Parties hruaitu pawl Political Dialogue cabuai in sirleiah hnawn le pheu maw an si hnga, tiah lung a awṭawm pah. Cun EAOs upa cheukhat sinin, “hriamtlaibuu lawng nih thlennak hi kan tuah khawh” tiah tulio Electoral Process hna “undermine” a tuah deuhmi bantuk le “political parties pawl an biapit tuk lem lonak” zong khi a chimmi hna kan hmuh pahmi an um. “Duk” tiah ka lungchuakmi cu United Nationalities Federal Council (UNFC) nih “Negotiation Team ka ngei ko.

Kawl cozah sinah ramkhel biaruahnak hi keimah lawng nih ka chimrel lai” tiah Working Group for Ethnic Coordination (WGEC) a rak chuahtakmi kha asi. “Cangvat seh vs seh lo ” timi hi a ne a thi kho deuh loin a lang tawn. “The pen is mightier than the sword” an ti. Tlangcung miphun political parties pawl hi Kawlram Federal movement ah zeidah an role a rak si bal i an biapi ve maw? Tuanbia ah nehnaang zeidah an rak ngeihmi a um? (The role of Non-Burman Political Parties in the Struggle for Federalism in Burma)” timi kha ka lungah pakhat hnu pakhat in a hun chuak luaimai. Nai zardongh kha si kaw tawi tein ka ṭial tuah lai ka ti cu ka hun ot hnik i, ka lan thluahmah i, kaa theih lo karah cahmai 17 a phan. A tamtuk ka ti i thlah zong ka thlah ti lo. Cauk maw journal phun tu-ah maw a herh ahcun chuak te ko seh tiah ka fim. Salai Van Lian Thang

Be the first to comment

Leave a Reply

Your email address will not be published.


*