RELCIO UH A TTHATUK PU ZING CUNG CHIM MI LE CNLD POLICY

Pu Zing Cung(CNF) chimmi & CNLD Policy. Pakhatnak. Theih lo buin palh zong palh a si.Theih ko buin palh zong palh a si. Nangmah caah na palh zong a poi lo. Na chungkhar caah na palh zong a poi lo. Na miphun caah voikhat na palh ahcun a kum a za in a rau.

Pahnihnak. Kan biakmi Pathian hmanh zalong tein kan biak khawh lo ah zeidah kan nun hnawhchan a um lai? Kan biaknak kha zalong tein kan biak khawh a hau. Cu kan biak khawhnak ding ahcun Phunghrampi chung ahhin fel tein aa t’ial a hau. U le nau hna mah cucu Khrihfami a simi hna nih kan ihmaithlak i thla kan cam nenh a hau.

Pathumnak. Holh le ca, nunphung tlamtling tein a ngeimi miphun kan si. Vawleicung ah miphun phunkhat kan si tihi fiang tein a lang. Cucaah cun Miphun phunkhat a simi hna nih kan miphun sinak kha t’ha tein kan i ken i, kan miphun sinak kha kan nunter i, kan miphun sinak kha kan i zahpi lo i, hmai ah kan nawrpi ding kha a biapi tuk. Cu miphun sinak nihcun zeidah a langhter tiah cun, Kha miphun kha hmailei ah zeipaoh mahte in khuakhan lairelnak uknak nawl kan ngei lai timi zong kha fiang tein a langhter chih. (Ref: Youtube, Khawmsuattu-Salai Thomas Lian).

Bia beoh: Chin Nationalism kan herh.Kan Miphun nih kan herh tuk tiah ka ruahmi cu Chin phun t’anhnak hi a si. Chin miphun Dawt le t’anhnak kong keimah pumpak t’ialmi hna le Chinmi kan Pale hna nih an chim an t’ial lengmang mi Nationalism Cabia hna post le taar hi ka zuam ngaingai. Basis need a si lo tikah mi tampi nih an taar huam tawn lo. Kei nihcun Chin Nationalism hi kan herh tuk tiah ka hmuh cang. Cucaah CNF Policy ka dirpi bantukin ramchung in Chin Nationalism a aupitu CNLD-Chin Party cu ka dirpi venak hi a si ve.

NLD cu Kawl nih dirhmi, NLD CEC ah Chinmi pakhat zong telh an si lo. Cucaah NLD cu Kawl Party a si. Kawl Party nihcun kan Lai Caholh, kan Nunphung le kan Biaknak t’hanchonak taktak cu an duh bal lo. Nihin ni ah kan hmuh dihmi a si ko. NLD nih cun lenglei in a langsaar menmi thanchonak (Development) sawhsawh kha Chin miphun caah an tuah men, mah t’hanchonak hna cu a mizei Acozah paoh nih an tuah dingmi khi a si.

Cucaah kan miphun damnak le nunnak taktak a duhtu CNLD Party hi vote a phumi a si. CNLD nih cun kan ramri kong, Caholh kong, Biaknak kong, Dingthluk Lairelnak le a dikmi mahte khuakhan Lairelnak covo kha kan Miphun nih kan ngeih khawh nakhnga a khel i, Chin miphun kan sinak “Chin min” hrimhrim kha fek tein a dirpi.

Chin miphun na sinak hi na zahpi lai maw?Chin miphun kan sinak hi Kawl miphun sin ah maw na zuar rih ko lai? Atu hi lungfim caan a si. Khua a tlai rih lo.Chin miphun nih kan miphun Party kan dirkamh lo ahcun Kawlpa cu a diriam men ko lai. Cucaah 2020 Myanmar Rampi Thimnak cu kan miphun party CNLD ah vote thla cio hna usih.Chin Mipi sin ah nawlngeihnak um seh. Kaa lawm.Salai Thomas Lian Thihlum