RALKAP NIH PHUNGHRAM BUAR LOIN NAWLNGEIHNAK AN LA KHO LO

Ralkap nih Phugnhram buar loin nawlngeihnak an la kho lo. Naite kawl media pawl nih ralkap lei thawngfiannak ah Ralkap lei thawngfiannak lei tuanvo ngeitu Zaw Min Htun nih lehnaka tuah mi ah ralkap lungput le tinh mi cu fiang pup in hmuh khawh a si cang.Kawl Media biahalnak ah Zaw Min Htun bialehnak ah “Nawl ngeihnak ka la lai lo tinak a si lo” tiah fiang ko in a chim tik ah kawlram ramkheel kal ning zong tampi aa thleng kho ti zong ruah khawh a si.

Ralkap nih nawlngeihnak hi Phugnhram pi buar loin an la kho lai lo. Nawlngeihnak an lak ahcun Phunghram an buar hrimhrim a herh. Ralkap nih Phugnhram buar in nawlngeihnak an lak than ahcun 2008 Phunghram hi a thi tinak a si hnga. zeicatiah anmah ralkap minung nih an ser mi phunghram hrimhrim nih nawlngeihnak lak than ding hi a kham hna. Phunghram pi nih ralkap cu tuanvo le nawl a pek hna. Cu phughram ning tein cozah tlaih ding a si ve.

Asinain Phunghram ah nawlngeihnak lak si ti loin mipi cozah ser ning in cozah ser ding le phunghram zong ser a ti tik ah nawlngeihnak lak hi Phunghrma nih a dirpi lo. Nawlngeihnak pohpoh cu President le Pyidawngsuh hnatlaknak lawng in pek chin khawh mi a si. Cucu Phunghram Dal 5 nak caang 217 chung ah Rampi uktu le nawlngeitu cu President a si. Rampi nawlngeihnak cu Hluttaw siseh, Phu pakhatkhat chung in hruaitu siseh cu hna sin ah nawlngeihank hi pek khawh a si nak aa tel.

Chim duh mi cu Nawlngeihank hi ralkap nih lak si loin President nih Ralkap sin ahcun a pek khawh. a lak in lak ding phun nawlngeihnak si lo. Nawlngeihnak he aa pehtlai mi i pekchanh ning cu Phunghram pi tang ah a um. Cucu anamh ralkap hnatlaknak tein an rak tuah mia si. Ralkap le Runvennak: Ralkap nih Runvennak le Humhimnak lei nawlngeihnak le tuanvo hi an lak mi a si. Phunghram Dal 7nak caang 339nak ah “Ralkap cu Rampi Runvenak le ah tuanvo ngeitu bika si lai: tiah a um.

Ruah ti ding: Runvennak timi hi Ramchung ramleeng lei in buainak he zong aa pehtlai mi a si. Cucu ralkap nih tuanvo le nawl an ngei. Hi Runvennak hi a lam kip caah hman a si. Ramkheel lei buainak, ralkap le ralkap i kahnak le Rampi caah ral a si mi vialte runvennak he aa pehtlai mi a si. Asi ahcun kawlram chung buainak sangbik cu ramkheel lei buainak a si. Ralkap nih nawlngeihnak an lak than ahcun ramchung buainak a sang chinchin lai caah Runvennak rian an hrawh/an tuan lo ti khawh a si.

Ramkheel lei buaibainak zong hi ram mipi duhnak he aa tlak in Ralkap nih an runven hi a rian a si. Nihin ah Tlangcung hriamtlai hna heh tiah an kah mi hna hi Runvennak rian an hrawh pakhat a si.Ralakp le Humhimnak : Ram mipi humhimnak he aa pehtlai in ralkap nih tuanvo le nawl an ngeih rih. Caang 340 nak: Ralkap cu Miphun Runvennak le humhimnak council hnatlaknak in Rampi himnak le runvennak ah Ram mipi telh in tuanvo laknak nawl a ngei.

Nihin ah ramdang he buainak kan ngei lo. Ramdang kut cun kan him nain ramchung buainak lei cun kan him lo. Tahchunnak ah AA hriamtlai he an buainak ruang ah harnak a tong mi cu ram mipi kan si. Ram mipi an him lo. asinain ralkap an riancu Ram mipi himnak rian tuan piak kha a si. Asinahcun Nawlngeihnak an lak ahcun ramchung buainak a sang lai humhimnak lei Phunghram an buar tinak a si.Cheu khat nih Hluttaw thutden hrawh loin Nawlngeihnak lak khawh a si tiah an ti.

Hluttaw thutden hrawh loin nawlngeihnak lak awk a tha lo. zeicatiah Hluttaw hantlaknak in nawlngeihank lak a si lo ahcun Hluttaw hrawh/thither he aa khat mia si. Hluttaw a thih lo le an hrawh loahcun nawlngeihank lak ding cu Hluttaw nih a caih awk a si hnga. Hluttaw an thah lawng ah Hluttaw nih caih lo in ralkap nih nawlngeihnak a lak khawh. Ralkap nih hluttaw a hrawh i nawlngeihnak a lak ahcun Hluttaw ah ralkap 25% hi ta a hrawk hna lai maw? tihi ruah chih aherh.

Hluttaw hrawh loin nawlngeihank cu ralkap nih la hna sehlaw mipi thim mi hluttaw palai hna nih cu hluttaw ah an thu duh lai maw? Hluttaw cu ralkap ser mi thutden a si lo. Mipi ser mi thutden a si caah mipi thim mi hna lawng an thu kho. Naite Min Aung Hlaing nih “Upadi kan zulh lo ahcun Phugnhram hrawh a herh” tiah ati mi nih a langhter mi cu Ralkap nih nawl ngeihnak an lak ahcun Hluttaw thutden pi an hrawh hrimhrim lai. 2008 Phunghram zong an hrawh chih lai ticu a fiang mi a si. Credit: Ro Lian

Be the first to comment

Leave a Reply

Your email address will not be published.


*