RALKAP BAWI A THONG TU LAIPA KONG, THAWNGPANG UPDATE.

Tu Zaan Tlaihmi Chung ah Minung Pakhat an Thlah nain Ralbawi a Thongtu Pakhat an Thlah Rih Lo. Tu zan Hakha Khuathar ah an tlaihmi hna chung ah minung pakhat cu ralkap le palik nih an velh hnu ah an thlah, tiah kan theih. An thlah tthanmi hi Hakhathar ah a ummi Bawi Tha Thawng a si i, amah he an tlaihmi a hawipa an thlah rih lo.

Bawi Tha Thawng cu an thlah tthan. Asinain, a hawipa hi an tlaih hna lio ah ralbawi pakhat a thongh ve caah an thlah lo,” tiah Khuathar upa pakhat nih The Chin Journal ah a chim.Tuzan Hakha Khuathar ah ralkap le palik nih lamkam ah a ummi motorcylce pawl an den pin ah motorcycle cheukhat zong an motor cung ah an khin i an i kalpi hna, tiah kan theih. Credit: The Chin Journal

Tuan Deuh Thilcang Kong: Hakha ah Ralkap nih Rubber Kuan in an Kah hna i Minung Pakhat Hliam a Pu. Tuzan Hakha Khuathar ah ralkap nih minung an tlaihmi chuah hnawh ding in a kalmi Khuathar khuami pawl ralkap le palik nih Rubber Kuan in an kah hna i minung pakhat a baan hmun 3 ah hliamhma a pu. Atu cu ralkap pawl zong an um ti lo. An kal dih cang. An thiang dih cang,” tiah Khuathar upa pakhat nih The Chin Journal ah a chim.

Hakha Khuathar BOC kuaih, Innwa Bank pawng hrawng ah Ralkap le Palek nih March 24, 8:30 PM tiang ah minung 3 an tlaih cang hna. Innwa le CB Bank (Bank then) in Golf Club lampial tiang tear-gas an kah cuahmah. Meithal zong an puah len, tiah kan theih. Credit: The Hakha Times & The Chin Journal.

Khuaci An Mui Ko Cang: Kawlralkap thiltuah hi mipi caah cun thawngpang ttha ti khawh asi cang. Aruang cu mipi nih aa kan tukdoh sual lai timi hi an rak phangtuk cang timi fiang tein an thiltuah mi in hmuh le theih khawh asi. Biatak tein ralhrang kawlralkap hna cu an lungdong taktak timi afiang ko cang. Zeiruang ah ti ahcun tutan an thiltuah mi in fiang tein hmuh khawh asi.Kawlralkap ralhrang hna nih Laimi meithal ngei vialte hna cu kanmah sin ah rak ap dih uh an ti cang.

Hi thanhnak an tuahmi hi meithal in an kan tukdoh sual lai timi an phan caah asi ko timi hi a fiangmi asi. Mizei hmanh nih kan meithal ap hna lo ding asi. Kawlralkap cu phihkharnak phunkip in ramdang nih an tuah hna pin ah ramchung lei in biatak tein cawlcanghnak an tuah hna.Cu tikah kawlralkap ralhrang hna hi caan sau rian an ttuan kho ti lai lo timi hi zakhat zakhat in a fiang cang. Aphunphun thanhnak an tuahmi zong ah CRPH nih an doh colh hna lawng siloin mipi hna nih ralhrang ralkap thanhmi zei ah kan rel lo caah an si avaang cang. An dirhmun an i theih tuk.

Thlathum chung ei din lawng an ngei cang ti asi. Cucaah an vansang cang.Tutan ah thanhnak an tuah mi zong hi a cunglei ah langhter cang bantukin an lungdong cang, mipi nih Lai meithal siseh, thonghrolh tiangin a hnu ahcun aa kan tukdoh lai timi an i hngalh cang caah nan meithal zong rak ap dih uh an tinak a si lai ti uh sihlaw kan palh lai lo. Cucaah meithal angeimi vialte hna nih ralhrang ralkap le palek sin ah kan meithal ap bak hna hlah usih.

Laitlang ah Ralkap nih License Ngei Meithal Zong an Apter Hna. Laitlang chung ah License a ngeimi meithal vialte zong ralkap le palik sin ah ap dih ding in hmun cheukhat ah thawngthanhnak an tuah, tiah kan theih. Nihin ah khan ralkap nih license ngei meithal zong ap dih ding in thawng an thanh. Ahlan uktu ttthing pawl kha ralkap nih an fial hna i thawng an thanhter hna,tiah himnak ca ah min langhter duhlomi minung pakhat nih The Chin Journal ah a chim.

Meithal ngei hna nih ap awk a si le si lo kong ah lung-awttawm in an um ve hna. Asinain, kan ap lo ah a ttha deuh lai tiah a ruattu zong an um ve. Laitlang lawng ah si loin Myanmar ramchung hmun kip ah hriamnam (Chai, Vainam, Meithal, Li le Cantiang tbk.) pawl ralkap le palik sin ah ap dih ding in nihin March 24 ah ralkap nih thawngthanhnak an tuah.Chirhchan: The Chin Journal

Be the first to comment

Leave a Reply

Your email address will not be published.


*