PU VICTOR BIAK LIAN :CHINCHIN HI TEINAK HMU DINGAH A PHU NAN TI VE KO LO MAW?

2020 thimnak kong. Tutan thimnak kong ah keimah buai in ka buai ve tawn. Pakhatnak ah, party maw kan zoh lai? A silo ah a minung in dah? Hi hi mizapi an i ceih lengmang mi ka hmuh ton. Pumpak in chim ah cun keimah ka theihhngalh mi an si ah, cingla rualchan, cun hawikawm chung zong in aa thim ding an tam ngai. Party pakhat theng ah an um cio hna lo tik ah, a hohlei vun tanhawk ah thil a har ngai mi a lo.

Cu cu Laimi kan khuaruah ning ah cun, a minung zoh in ti hi chim a fawi ngai. Sihmahsehlaw, politic a si ca ah, tahfung a phun phun kan ngeih cio tik ah keimah pumpak ka dirhmun, ka tahfung le ka zumhning (principle) in cun, miphun party nih teinak an hmuh a hauhnak kong hi chimcawklo ka ngei ve ko hnga. Cu cu tutan ka capar tialhnawh chan a si thenglo ca ah, a hnu ah kan chim te lai can nih a kan pek ah cun. Keimah ka riantuannak Euro-Burma Office in ka riantuanpi hawi hna chung in, mi nung 4 tutan thimnak ah aa zuam ding an si.

Cun, kan mah kan riantuanpi hawi bu (Partners) dang hna chung he vun tuak ah cun minung 10 renglo an si.Cu hna lak ah cun, tutan ah Pi Chin Chin Pek Thang zong aa tel i, Thantlang peng State Hlutdaw 1 in thim ve ding a si tik ah, a mah Pi Chin Chin Pek Thang a kong tlawmpal te hi vun tial ta ve ka duh. A luancia 2015 ah Falam peng in thimnak a rak i zuam bal cang na in, teinak a rak hmu lo. Cu ca ah a si theu lai. Tukum thimnak zong ah kaa thim duh ti lai lo tiah a ka chimh bal.

Sihmanhsehlaw, kan hnulei a mah pumpak facebook in, Thantlang peng khuanu le pa hna sawmnak in 2020 thimnak ah i thim ding ah a cohlan hna nak kong a tial mi ka hmuh tik ah kaa lawm ngai ngai. A ruang cu 2015 kha aa thimnak hmunhma aa palh tiah karak ruah. Kan Chin politics zoh tik ah khuazei in dah ka dir ah a that lai ti mi hi a biapi ngai mi pakhat a rak si.

Pi Chin Chin Pek Thang he hin 2010 thawk in riantuanti kan rak si lawng si lo in, pumpak zong in hawikawm tha zong kan si ca ah a mah pumpak nih kan miphun le ram ca ah a ti khawhtawk a cawlve nak hna hi tampi ka theih pi ve mi le ka hmuh mi hna hi vun tial ka duh. Daihnak lamthluan kong ah 2009 hrawng a si ko laidah! Bangkok ah kan rak I tong I cu lio ah cun Chin Peace and Tranquility Committee tawlrelnak in CNF le cozah chawnhbiaknak kong ah biaruahnak kan rak ngei hna.

Hi lio can ah hin Tripartite Dialogue kan ti mi Tlangcung hriamnam tlai dothleng hna le, Democracy cawlcanghnak ah hruaitu Aung San Suu Kyi le NLD party le ralkap cozah karlak ah biaruahnak in daihnak le remnak ser kha vawlei khuaza ramkip ah siseh, ramchung tiang zong kan rak aupi lio can a si. Khatalei ah a tu 2008 constitution hi vun lim an i timh pah thluahmah lio can zong a si i culio can ah kahdaihnak a rak tuah mi hriamtlai bu 13 hrawng hi 2010 ah cun Border Guard Force ( ramri kilvengtu ralkap) ah thlen ding an rak timh lio hna can a si.

Hi kongah KIO le Than Shwe cozah karlak ah biakal tu Shalom Foundation in an Executive Director Rev Saboi Jum siseh, cun Laiza KIO hruaitu upa hna he zong kan rak i ton lengmang lio can a si i 1993-2010 karlak daihnak lamthluan kong kha rawhralh lei a panh can a phak kha a rak si. Sihmanhsehlaw, Shalom Foundation, CPTC zuamnak thawng in CNF le Kawl ralkap cu 2010 thim hlan ah Tio khua ah voikhat an rak i tong manh. Hi tonnak ah Shalom Foundation ah rian a rak tuan mi Pi Chin Chin zuamnak thawng hin thil tampi tlamtlinnak a rak um.

Cu daihnak khuakhannak a ci an tuh ta mi te cu, 2011 August thla a hong phak tik ah cun, cozah thar nih hriamtlai vialte he biakchawnhnak tuah ding a hung sawm hna tik ah, CNF zong nih emergency conference cu December 16-18, 2011 ah an auh i cu kong cu a bik in an ceih. Cu CNF emergency conference nih cun cozah he ton biaruah ding kha an pom tik ah cun Dr Sui Khar hruainak in CNF palai hna cu 2012 Jan 5 ah Tio an tan i Tlanglo, Tlangpi, Van zang, Farrawn, Sopum in Than Tlang le Hakha tiang hlunghlai ngai in an rak luh kha a si.

Pi Chin Chin zong CNF a voikhatnak an rak tlun ah Tio tiva ral Tlanglo khuataw in a rak dongtu hna ah aa tel mi a rak si. Hi kong ah pumpak in a lung a rak i lawmh zia le a saduhthahnak vialte zong pumpak in a rak ka chimh bel ve tik ah, zeitluk in dah daihnak le thanchonak a rak duh ti hi ka fiang ngai ngai. Cu thawk cun Pi Chin Chin Pek Thang hi Kawlram daihnak lamthluan kan kar hlannak vialte ah tuanvo ngeitu pakhat dirhmun in a tu tiang aa tel.

Kan daihnak khuakhan lamthluan zong cu kum 8 a rak rauh cang tik ah, CNF le cozah an i chawnhnak (2012) kong lawng si lo in, NCA an rak i ceih hramthawk in Tlangcung party hna zong nih an I tel khawhnak hnga le, cu hna an I teltumnak kong ah Chin Chin kutneh hi vun chimlo awk a tha lo. Tlangcung Political party hna ca ah “Nu” can bantuk Ka chim bantuk in, 2010 thimnak ah hin tlangcung party hi 50 leng an um I, teinak zong tampi an rak hmu.

Hilio can ah, parliament chung ah hmunkhat te rian an tuanti khawhnak ding ah siseh, cun daihnak lamthluan ah hmunkhat te in an i tel khawhnak ding ah ti in Pi Chin Chin cu a rian tuanlio mi Shalom Foudation in aa phuak i cu tlangcung party 18 (culio ah) kawmhnak an tuah. Cucu Nationalities Brotherhood Federation (NBF) ti in riantuantinak an ngeihnak hmun ah cantling in director dirhmun in a tuan piak hna.

Hi an riantuannak hi a biapi ah kan ruah ca ah, le cun tlangcung political party le hriamtlai karlak ah a bik in daihnak lamthluan an kar hlannak le federal ramsernak kong ah Chiang Mai ah thlakhat voi 1 lengmang meeting a rak kai i biaruahnak kan rak ngei tawn hna. Nu pakhat dirhmun in hi vialte pa nih an hruaimi political party vialte a hei hruai hna tik ah ka titawn mi cu, an “NU” can na si ko ee ka ti. Zeitluk in dah a lung a heisau le a thin a fual ti kha ka mit nih a hmuh tik ah ka thangthat ngai ngai.

Kan mah Chin miphun dirhmin lawng si lo in, tlangcung mi vialte a kan cawisang tu zong a rak si. Cuticun, Framework for Political Dialogue kong ah siseh, Party 54 riantuantinak hmun ah hruaitu dirhun in a dirnak le kahdaihnak an tuah hnu 2015 October thawk in UPDJC kan ti mi political dialogue biaruahnak hmun ah siseh, cun Union Peace Conference-21 Century Panglong zong ah a luancia kum 5 chung Facilitator (pumhuktu) a sinak hna hi kan miphun dirhmun in cun a har ngai.

Sihmanhsehlaw, lungsau thinfualnak le miphun dawtnak, zawnruahnak thinlung a ngeih mi nih hi dirhmun a phakternak a si ti hi ka hmuh mi a si. Chin miphun dothlennak le cawlcanghnak, Cu pin ah chim rih ka duh. Chin miphun lak zong ah rualremnak kan ngeih khawhnak ding ca ah siseh, cun hmunkhat te ah Chin parties, CNF le CSOs hna zong riantuannak ca ah ti in, Chin National Conference cu Hakha khua ah 2013 November thla ah kan tuah. Minung 750 kan kai. US$ 120,000 kan dih. Biachanak phun 53 kan ngei.

Cu biachahnak a tuanchuahtu committee zong kan dinh I, Pi Chin Chin hi chungtuan 3 lak ah aa tel. Conference tuah hlan thla 6 hrawng in conference a dih hnu kum 3 chung deng kan riantuannak vialte ah chungtuan dirhmun in a hei dir mi pin ah khualtlawn vialte le meeting vialte ka zoh tik ah nu pakhat dirhmun in thilfawi a si lo. Nu can ah cun a kan dir piak thiam thiam. Chin Chin nih hin “NO” ti hi a chim thiam lo mi a lo. Miphun kong ah cun kaa manhlo, ka si thiam lai lo ti bantuk hna hi a chim ka thei bal lo.

A dangdang: CNF ah ruahnak petu dirhmun in rian kan tuantinak ah siseh, Chin Forum ah rualremnak le khuakhan lairelnak vialte, cun, Chin Shalom Mission ti mi nih biaknak lei upa lawng si lo in, CNF le cozah le miphun tling in upa hna khuakhan nak ah Pi Chin Chin aa teltumnak zoh tik ah, rualremnak a duhnak le, daihnak lamthluan ah aa peknak vialte hna le a hmuhtonmi vialte hna hi kan miphun ca ah thahnem santlai an si hnga lo maw?

Tutan thimnak ah Thantlang peng in ka dir lai a ti tik ah, ka lawmhpi khunnak cu a retheihnak vialte le a hmuhton mi vialte hna cu a tak in a tuanchuahnak (implementation) lei ah a kalpi khawh lai ti kha ka zumh. Miphun dawt kan ti mi hi an rak i pekchanhnak in ka tah zungzal. Kan miphun nih dirhmi miphun party CNLD in aa zuam lai tik ah ka hmai a hngal fawn. Teinak hmu ding ah a phu hrim hrim nan ti ve cio ko lo maw? By. Victor Biak Lian

Be the first to comment

Leave a Reply

Your email address will not be published.


*