PU VAN CHAN CEU NIH FIANGPUP IN ACHIM KO CANG HIH

Miphun Ramkhel Lentecelhnak Cu Tualchung Ah A Si Lo, Tualleng Ah A Si. CNLD le USDP, CNLD le NLD karlak tibantuk buainak ah kan miphun damnak biaphi a um lo. Hiti kan buaimi hi miphun dang Kawlnu/pa an i nuam tuk. I seh hna seh law an thazaang der seh ti khi an i tinhmi Kawltung a si. Cucaah, Kei le CNLD party policy cu kanmah le kanmah i doh, i kalh hi a si lo.

Miphun dang sin ah a ummi kan covo khuakhirh than ding khi kan Kawltung a si. Chin miphun kan covo le mahte khuakhan lairelnak (Self Determination/Federal) kan kut cung ah a um lonak hi Mirang kut in kum 60 le Kawl cozah kut in kum 70, a zapi kum 130 tluk a si cang. Kan miphun nih kan sunghmi covo laakthannak ding le khuakhirh thannak ding ramdamnak biaphi cu Chinram ramkhel party pakhat le pakhat i rialdipnak ah a um lo.

Khuazei Ah dah a um? Chan a dotdot in nawlngeitu cozah hna miphun dang Kawl miphun kut chung ah a um. Cucaah, Chin miphun le Chin mizapi ramkhel hmaichon hi pumpululh holh in kan chim ahcun tualchung (ing-kun အိမ္ကြင္း) ah celhmi si loin miphun dang, tualleng (away-kun အ‌ေ၀◌းကြင္း) ah celhmi lentecelhnak puai a si. Cu ruang ah Chinram ramkhel party ah miphun damnak biaphi a um lo kan tinak cu a si.

Kawlpa nih a kan chuhmi miphun covo kha amah sin ah kan ttan le kan i bek ahcun zeitindah kan laak khawh lai? Ramkomh Lentecelhnak Ah Aho Lei Ttang Dah Kan Si? Chinram le miphun damnak ding caah ramkomh (Pyidaungsuh hluttaw) ahkhin Chinram MP pawl khi aho lei ah dah an ttan? Chin kongkau le Tlangcung miphun kongkau a chuah tikah Kawlpa le Kawlnu nih chakrenghmi lei ah an ttang dih ko lo maw?

Anmah miphun dang policy lonh le dohngam in “Chinram le Tlangcung miphun” caah fekte in a dir ngammi palai an um maw? Tualleng ramkhel biaruahnak NCA ah tah NLD le USDP palai nih Chin miphun covo khuakhirh thannak kong an chim bal maw? Party nih chakmerh chommi men si loin miphun damnak ding kan Kawltung hi Chin palai vialte nih kan i fian a herh.

Tualleng lentecelhnak a si chinchap pin ah Kawlnu/Kawlpa lei in kut a bengtu le a ttang pengmi si cu ning a zak tuk lo maw? Cucaah, Kawl paoh cu NLD ah an vote an i funtom dih ngawt. Kawlpa nih miphun party a vote lai lo. Cu bantukin Chinmi zong nih Miphun party CNLD ah kan vote funtom ve cang hna usih. Party nih chakmerh chommi palai le miphun dang lei ah a ttangmi palai si loin tualleng ramkhel lentecelhnak ah Chin miphun covo khuakhirh than khawhnak ding lei a ttangmi palai si kan herh.

Cu bantuk palai cu Chin mizapi nih kan vote hmang in thimthiam le thlahthiam kan herh. Chin ram le Chin miphun damnak ding hrampi cu Chin mizapi vote cung ah a um. Pu Van Chan Ceu, State Hluttaw No.1 CNLD Party. Hakha Township, Media Team. Credit: Van Chan Ceu

Be the first to comment

Leave a Reply

Your email address will not be published.


*