PU TUM BIK KONGHE PEHTLAIIN PATHIAN MIN IN KAN NAWL KO HNA

Kan nau nu Sui Hlei Tial kong ah laimi kan i ttanh tuk hna le a ttha tuk. Kei zong ka ttanh bak ve. A sinain, kan Laimi Pu Tum Bik nih bia a chimmi kongah fak ngaiin nan ti. A biachim mi an duh lo, an lung a fah lio si kan ti. Nan luan tuk cang. Phaisa laknak ah nan hman. Phungki puan nan aih. A thih tikah mei in khangh ding nan ti. Mihrut mimolh nan ti.

Covid nih tlunh seh nan ti etc.. nan luan tuk. Cu cu maw lai mi ttanh?. U le nau nei ve. Fa nu fapa nei ve. U le nau tampi nei ve.Sahlawh rualchan nei ve An ngaihchia ve lai ziah laimi tihin kan um. cu cu maw Lairam dawt? Mi kan hnem ti i pakhat ngaihchiatter tthan. Kan luan tuk, Maa cang uh. Pathian hna zong kan tla lai loh Za cang seh. Pathian min in kan nawl hna. Credit: Peter Ceu.

Thantlang Kan Tonmi Hi Covid-19 Nak In Angan Deuh:Coronavirus hi ttih hlah u, nan nunnak ah i dawnhter hlah u,” tiah USA president Donald Trump nih a chim tikah hin zeidah a ruahnak a si hnga? Trump uartu na si le si lo kha um rih seh, nihin vawleipi nih kan ton cuahmahmi hi mang a si lo, cang a si ko ti hi fiang tein kan theih. Coronavirus cu tih a nung taktak lo maw? A bikin ram sifakbik Chinram khuasa Chinmi caah ttih a nung lo maw?

Hi ca ka ttial tiang i USA ah Coronavirus in a thimi 214000+ an si cang. USA tuanbia ah ralpi pali an tu i an zapi fonh a thimi hi tutan Covid-19 nih a nawnmi hna zat a si nai sai lo; Vietnam ral 47242 Korea ral 33686, Iraq ral 3836, le Afghanistan ral 1883 an thi. USA ah amah te aa thatmi kum tin 44895 hrawng an si, i mawtaw eksiden in kum tin 38000 hrawng an thi. Mah vialte fonh zong ah Covid-19 nih a nawnmi hna an tamdeuh. USA zong ah Covid-19 in Chinmi an thi.

Asinain Chinram ah Pathian dawtnak in Covid-19 in a thimi kan um hraw lo. Kan lungput le kan zumhnak tu hi a thideuh cang. Ramchung khuasa kan chungkhat pawl ka sia an herh tuk hna i ka chawnh pah lengmang hna. Covid-19 an ttihning, khua le peng kip i Covid-19 kawmetti an i ralring tuk ning te hna an ka chimh ve. Mah tikah ka zaang an fah a zual, a ruang cu Laimi hi innpa he ai lengkaimi kan si, pumhkhawmh a duhmi kan si, Khrihfa nunphung a tlai cangmi kan si caah hin Pathian thangtthat tti khawh lo hi ka lungsia an herh bik.

Cucaah voi tam ngai cu ttih tuk ding a si lo cu, tlangrai bantuk a si cang ko lai, ka ti tawn hna. An caah a dik lo, “It’s not fair” a ruang cu anmah nakin cozah tthadeuh, sii-ai le siibawi tthatdeuhnak ah ka um lawng si loin ruahchannak a tamdeuhnak ah ka um caah a si.Ruahchannak Hi Mi Vialte nih kan herh. Abik in Nihin ah hin kan herh khun.COVID-19 nih hin Democracy a tlaihhrem khawh caah ram kip ah Democracy ning si loin nawlngeihnak hmang in cozah an lor cuahmah ti kha an hmuh.

Cu lawng a si lo, nuhrin covo hrimhrim kha a tlaihhrem. Minung nih nitin kan tuah duhmi a kan tuahter kho lo, ttihphannak a kan pek. Pumhkhawmh le i lenkai cu um rih seh, ai dawhhriami le chungkhar hmanh lungduh in um tti khawh a si lo.Zalonnak a hmu bal lem rih lomi kan miphun kong ka ruah ah ka lung a fak. Nan lungretheihnak le nan ttihphannak hi a langtlang in kai hrawm ve. Vawlei cungah hin zeizong vialte nakin anganbik mi thil pathum an um, i cu hna cu “Zumhnak, Ruahchannak le Dawtnak” an si, tiah kannih Khrihfami hna nih cun Korin-cakuat chung hi kan duhbikmi a si.

Kan hmette in Church School in kan rel i bupi pumhnak ah Pastor te nih an sermon, an kan cawnpiakmi a si. I nunpi awk a ttha tukmi a si. COVID-19 nak zong in a ngandeuhmi cu mah hi pathum hi an si timi te hi ka dawtmi Chin miphun vialte, le Thantlang peng nan sinah chim ka duh.Tutan i Thantlang ah kan tonmi thawngpang pahnih kong ka ruah tikah I.Korin 13:13 hi ka lungah a chuakmi cu a si. Kan Lungpi le kan khamhtu Khrih kan zumhnak, cun kan miphun pakhat le pakhat kan i zumhnak,

Kan i ruahchanmi zungzal nunnak le kan thih hlan i a tthadeuhmi thil kan i ruahchannak, cun Pathian a kan dawtnak le Jesus cawnpiakmi innpa dawtnak hna hi COVID-19 kan tlaihhremter, kan i teiter tuk lawmmam ko rua hlah maw tiah ka lung innka ka khar zong ah a bauh in a bauh i a chuak. Naite ah khan Yangon i cancer avai i thlawpmi kan Pi pakhat (Khualhringtlang) cu a nunnak caah ruahchannak a um ti lo tiah Thantlang ah an huntlunpi i Thantlang Covid-19 kawmetti nawlchuah ning bantuk in Townhall ah Quarantine an pek hna, i cu kan pi cu a zual caah Siizung ah an chiah.

Nain a fanu cu Townhall ah a um caah zohkhenhtu hmanh a ngei lo. Cu ticun Cancer in a zawtmi thinphannak, ttihnak le ruahchannak a ngei ti lomi tarnu cu mitthli le hnapduk he a ttap i siizung ah hramhtu ngei lem lo in a nunnak a rak liam. Pastor le a dang pahnih-thum nih a inn ah suimilam pakhat hrawngte a ruak an suan i an vui colh. Cancer in a thimi a si, Coronavirus in a thi lo tiah kan ti khawh nain nanmah cio kha hun i dap u law, zeitindah nan ruah lai? Saram thih in a thi ko lo maw? Zawtnak in a thi ding a si hmanh ah a thaw a cah hlan cu ruahchannak a ngeih awk a si ko lo maw?

Zumhnak a ngeih khawh awk a si ko lo maw? Dawtnak a co le dawtnak bia a fale a hawile sin in a hmuh khawh awk a si ko lo maw? Phung le lam hi minung nih kan sermi a si. Hi phung le lam hna hi zeitluk in a tthami phung hmanh Dawtnak, Zawnruahnak, Ruahchannak a pe khomi le zumhnak a tthawnter kho lomi cu pakpalawng kha a si ko.Vawleicung i democracy tthabik ram ah khuasami ka si tikah zeitluk indah a sunlawi kha ka fiang. Cucaah zeihmanh ka si lo nain ka chuahkehnak ka ram le ka miphun caah hin ka ti khawh tawk ka nunnak cheu nga cheu hnih cu caan a pemi ka si.

Cucaah hi ca zong ka ttialmi a si.Vawleicung ram tthabik, inn tthabik, lam tthabik, tthangchobik le bawibik hmanh si usih law hi ruahchannak, dawtnak le zumhnak hi kan ngeih lo a si ahcun ngaihchiatnak lawngte kha a siko lai timi hi a hnubik Thantlang ka tlun lio ah ka rak chim cang. Nai zarh Norway Chin Student Union tonnak ah “Mipeem le Nuhrin Holh” timi i ruahttinak kan ngei i ka tlun hnu nikhat-zing lawng in Sui Hlei Tial thawngpang hi ka thei. Ca ka relka cu ka ar, ka pawng ummi mileng zong ka chawn kho hna lo.

Pathian zeitindah na khuakhannak a si ti run kan theihter hram law tiah ka lung in thla ka cam. “Ka dawtbikmi ka chuahnak khua Thantlang nih ka lung a fahter,” tiah facebook ah ka ttial. Covid 19 ruangah ramkip cozah nih a si khawh chung in mibu tonnak kha an phih chung cio. Cu lakah a fakbik cu hi zawtnak in a thimi he zeidang in a thimi hna zong an ruak kha a thlahtu an tlawmtuk cio. A thi cangmi cu a vuitu company / biakinn rianttuantu nih vui ko hna seh, an ti lo.

Asinain minung cu zat nih a ruak thlah u tiah a zatawk kha an onh. A ruang cu mithi nak khan a taangmi nu le pa, u le nau, sahlawh le hawikom kha an biapitdeuh caah a si. Ahohmanh nih thih hi kan duh lo. An thih tikah a tangmi kha an ngaihchia, an lungfak, an tuar kho lo i cheukhat an zaw beh, cheukhat an nunnak ah a ttha lo lei in thlennak an ton tawn caah a nungmi hi pakhatnak biapi taktak in an chiah hna.Thantlang khua le Sui Hlei Tial nih a tonmi thil hi minung sinak he ai hlat tukmi a si. Laimi nih thih hi kan i fahsak, kan duh lo tuk caah zeitluk indah hlanchan ah an rak tuar timi kha kan theih. Khrihfa kan si hnu ah “thihnak” hi kan duh lo, i zungzal nunnak kan duh caah thihnak hi kan duh lo chinchin.

Sihmanhsehlaw, mi cu kan thi, asinain a nungmi hi a biapideuhmi cu kan si peng. Kan si peng awk a si. A nungmi caah hin an tuar lo nakding, an damnak ding, an lungtthawn i ruahchannak, dawtnak le zumhnak kha innpa, Khrifabu le zatlang sin in an hmuh ding kha Laimi kan nunphung le Khrhifa kan nunphung a rak si. Mah cucu Siibawi te nunphung hrimhrim kha a si awk a si i, nitlak lei ram ahcun sii-bawi te nih mizaw le mithi tluk in a zohkhenhtu le a taangmi chungkhat kha ruahchannak le lungtthawnnak pek an i zuam pengmi a si.

Cucaah atu kan tonmi thil hi COVID19 nakin a ngandeuhmi thil a si. Miphun kong a si. Khrihfa kan zumhnak le Khrihfa nunphung kong a si. Minung covo kong a si. Nuhrin covo kong a si. Minung khuaruahnak kong a si. Minung lungput kong a si. Mah hihi thei u sih ti saduhthah he hi ca hi ka ttialmi a si.Thantlang COVID19 kawmetti hi an mawh. Thantlang khuami, khua nu khua pa, bukip le nangmah le keimah zong kan mawh.

Dinnak kan ttanh taktak lo ruang le ttihnak kan ngeihmi hi kan mawh. Cucaah kan mawhnak hi pehzulh lo in i remh u sih. Minung ruahnak bantuk in a kan zoh lomi uktu hna hi kan duhnak langh in chim hna usih. A mipum he an lung he thlen khawh i zuam hna usih. Dai hlah u sih. Coronavirus nakin Dawtnak, Ruahchannak le Zumhnak hi a ngandeuh timi theihter hna usih. A luancia zarh khat, S. H. T thawngpang ka theih hlan ah khan, Galati 5:1 le Efesa 1:3-7 kha ka Facebook ah ka rak post. Kannih cu Pathian nih Khrih thawng in a kan luattermi kan si cang. Mi luat kan si cang. Cucaah fek tein dir usih law, Sal ah khan i ser tthan ti hlah usih, tiah Thantlang khua hmanthlak he ka rak tar. Chin miphun hi hi pumsa le lungthin in kan luat khawh taktak nakding ah nihin hi caan tthabik a si. Chinmi nih Pathian kan zumhnak, kan ruahchannak le kan i dawtnak hi kanmah kut ah chia usih tiin ka bia ka donghter. Kai lawm. Credit: Si Bawi Mang Lian

Be the first to comment

Leave a Reply

Your email address will not be published.


*