PU THAN HMUNG: NLD PAWL I AN BIA MEILAH PAHNIH

NLD pawl i an bia Meilah pa 2. Pakhatnak: CNLD pawl nih Miphun covo kan lak tthan lai an timi hi Phunghrampi nih a onh lo caah a lam a um hrim2 lo mi a si. Lih le hrawkhrol bia, Mihlennak men2 a si. Pahnihnak: Kachin, Shan, Karen pawl zong kum 50 chung dothlennak an tuah cang nain teinak an hmu kho lo.Rekhaing pawl zong teinak an hmu kho hlei lo. Hi lio i CNLD pawl nih Miphun covo kan lak lai ti cu thlilak ah inn sak bantuk, thlapa ttahhnawh bantuk le Zubui thingpar kai ter bantuk a si.

A can a za rih lo ti pawl hi an si. Ruat cio tuah hmanh uh. Miphun covo lak tthan nak ding kong ah Phunghrampi nih a onh i a lam a um ko a si ahcun dothlennak tuah hauh lo in pei Phunghram ning le a lam ning in fawitein kan lak ko lai cu.Mizei nih dah lam a ong ko mi le zulh khawh a si ko mi a um bu in lamthar an cawh bal. Miphun covo lak tthan nak ding kong ah Phunghrampi nih a onh lo ca le a lam a um lo ca ah cun pei lamthar kawl in kan cawl kan cangh cio cu.

Phung nih a onh ko mi le lam a um ko mi ah tei khawh le hmuh khawh i zuam cu zumhnak a si lo.Philosophy men2 a si. CNLD nih dothlennak tuah kan timh mi cu Philosophy in a si lo, Zumhnak ( faith ) in a si. Zingkhat cu Mirangnu he Bus Station ah Bus kan hngak. Cu lio ahcun kan hmai ah Laileng a nu le a pa an hung tla i rawl an kawl. A thlang zawn i a um mi tung par te ah Pithlung pakhat a tthu ko i a khuahoi le a cawlcangh zoh tik ah rawl kawl kha a hun duh ngai ve nain Laileng nupa kha a ngamh hna lo ca ah canttha hngak in a tthu ziar ko.

Mirangnu nihcun a bag chung in Biscuit changreu a chuah i tlepkhat kha Laileng cu a hun chehpiak hna. An hun zuanhnawh veve i changreu kha lak hmasa lo in anmah le anmah kha biatak tein an i cu. Cu tin an i cuk kar ahcun Pithlung te cu a hung zuang i changreu cu a lak i a zuanpi diam ko. Laileng nupa hna cu ba lengmang in i cuk cu an ngol i changreu cu an vun zuanhnawh veve tikah a um ti lo.

An i zoh i minung khi si hna sehlaw kan loh ko ttung an ti lai dah ka ti. Mirangnu nihcun an hakkauh ruang ah a si a ti i thi deng in kan ni. A hmaizarh Kawlram thimnak (election) hi a bik in USDP le NLD / Min Aung Hlaing le Suhkyi / Kawl le Kawl Siangpahrang an i cuhnak puai a si. Hi lio ah Kawlmi 37 millions lak ah 5 millions hmanh a tling setsai lomi barawh zat lo Laimi pawl hi kan va aukhuan len le kan vaa i hlawh len ve kha a herh lo.

Ningzak tu kan si deuh. Kan saduhthah kan tlinh khawh nak hnga Pithlung bang dai te in um ziar ko in thil sining le canttha tu kha kan bawh ziar awk a si. Miphun dang dohthlennak an tuah kum 50 an tling cang. Teinak an hmu kho lo ti ruangah kan i tthangh ve ko buin kan it peng rih hnga maw? Kan Lairam Dr pipi le mifim pipi zong nih a caan a za rih lo nan ti lengmang mi hi ningzak a si deuh lo maw?

Miphun ah aa hlau ve cang mi thangthar mino kan fa le pawl hi thaazang kan pek hna tu ah a ttha deuh hnga lo maw? Kan Pu/Pa hna nih minung nun nak Van in a tla an rak ti. Nihin zumtu mi pawl nih kan nun nak ca ah khua khangtu cu Jehovah jeereh a si kan ti ve. Teinak cu Bawipa ta a si. Kanram zong nih Jesuh a herh a chung ah leeng ve seh kan ti tiah hla a sa tawn mi Laimi nih Buddish Kawl pawl kha kan zenh hna awk zong a si lo i kan i bochan hna awk zong a si lo. Lungrual tein kan um i Pathian tu kha bochan in CNLD kha kan Vote cio awk a si ko. Credit: Pu Thanhmung

Be the first to comment

Leave a Reply

Your email address will not be published.


*