PU NO THAN KAP: FEDERAL KONG CNLD POM NING

Federal Thu CNLD Pawmdan (Laktawi). CNLD’s POSITION ON FEDERAL PRINCIPLES (in brief) Pakhatnak. Ramfinkhawm cu Rampi sungih um miphunpawl in bangrep nun neiin, mahte lairel theinak famkim nei Federal democracy dan vekin din ding. Pahnihnak. Ramfinkhawm cu “Miphun Ramkulhpawl” le umnak ram umdan zoh ih dinmi “miphunpawl ramkulh” in din ding.

Pathumnak.Tui ni ih Ramkulh (7) cu “Miphun ramkulhpawl” ah ret an si dingih, Kawl (Bama) sirhsan ih dinmi Ramkulh pakhat umter ding (Ramkulh thar din tikah, dan vekin relrem ih din a si ding). Palinak. Ramfinkhawm le Ramfinkhawm ih telve Ramkulhpawl karlak ah, Danpi zulh in thuneihnak zemawk a si ding.

Panganak.Ramfinkhawm ah miphun tlanghmun le mipi tlanghmun tin Tlanghmun pahnih ret a si ding. HMANSEH, Ramfinkhawm tlanghmun timi ret si hlah seh. Paruknak. Mipi Tlanghmun cu mipum le peng sirhsan in din a si ding. Miphun tlanghmun cu Ramkulhpawl ihsin palai bangrep neiin din a si ding. (Kawl Ramkulh in Palai 12 a nei a sile Chin Ramkulh in Palai 12 a nei ve ding. Tui 2008 Danpi ahcun Kawl ramthenpawl in miphun palai 84 an neih laiah, Chin Ramkulh in palai 12 lawng a nei).

Pasarihnak:Ramfinkhawm ukawkdan cu President uknak le Prime Minister uknak pahnih rawi (Hybrid System) a si ding.President cu Ramfinkhawm ih lubik a si ruangah, Ramkulhpawl ih tuanter an duhmi lakin Miphun Tlanghmun ih a hril mi a si ding.Ramfinkhawm cu Prime Minister ih hoha mi (Parliamentary System) a si dingih, PM cu mipi Tlanghmun in a hril ding.President cu Kilvennak le Humhimnak lam hotu lubik a si ding.

Pariatnak. Ramfinkhawm ah Ramfinkhawm Danpi le Ramkulh kipah Ramkulh Danpi tiin a hranten a um ding.Pakuanak. Federal Ramfinkhawm thuṭhennaksangbik le ramkulh kipah ramkulh thuṭhennaksangbik telin a hnuaiih um thuṭhennakpawl ret a si ding. Pahranak.Ramfinkhawm Ralkap din tikah, ramkulh tin ih telvenak cu a mal theibik (minimum quota) in din a si ding.Ramkulh tin ah humhimnak latu Ralkap din theih a si ding.Ramfinkhawm Ralkap (Tatmadaw) cu President thuneihnak hnuaiah a um ding.

Hleikhatnak.Ramfinkhawm Danpi rem tikah, Ramfinkhawm Tlanghmun pahnih ṭhenthum ṭhenhnih le ramkulh tlanghmun tam sawn lungkimnak in rem a si ding. Hleihnihnak. Danpi thuṭhennak (Constitutional Tribunal) cu Ramkulh tin ihsin pakhat ciar hrilmi dan thiamsang thuhṭhentupawl sungin, “miphun tlanghmun” in a hril ding.Central Executive Community, CNLD

HMINSIN: Tlanghmun-Hlutdaw, Miphun Tlanghmun-Amyotha Hlutdaw, Mipi Tlanghmun -Pithuh Hlutdaw, Ramfinkhawm-Pithaungsuh, Ramfinkhawm Tlanghmun-Pithaungsuh Hlutdaw, Ramkulh – Pine, Ramthen – Taing ditahkyi. By. Pu No Thang

Be the first to comment

Leave a Reply

Your email address will not be published.


*