Pathian Nih Zei Rian Sat Dah A KaFial Ti Theih Na Duh Maw

Pathian nih kei hi zei rian set dah a ka fial, timi hngalh na duh maw?US ram Georgia State ah a ummi, Anthony Delgado cu rithaisii a tawng i innlo ngei lo le rawl hal in Atalanta lam cungah caan saupi khua a rak sa.

Voikhat cu, dam lo ngai in a um i cu lio ahcun nuva hna pahnih ruah lopi in a sin ah an rak phan i VA hospital ah na kal a hau, tiah an ti. Ee tiah cu nupa cu sizung kal ding cun, a zulh hna i Bus station an hung luh ah khin cu kutdok pa nihcun fak deuh ngaipi khin innkaa a hun sual caah innkaa cawngtu palik nih “ziah, zeitindah na si?”

tiah an hun tlangtlak. An nih nih “sorry tuk si; ka hmai ah a kalmi nuva hna khi rang deuh in ka dawi hna nak ah kaa chuah sual deuh i a si” tiah a leh hna.Asinain a mak tukmi cu, cu palik hna nihcun “ziah, hohmanh an rat ttung lo” tiah an ti i cu hnu cun, an nih zong nih nuva hna cu a hmu ve ti hna lo~a bawmtu nupa cu an tlau!

Cu caah a vaivan i a kiangkap Park ah a lut i rithaisii tawngh tham cu a peh zulh tthan.Caan saupi kutdok dirhmun in a um tthan hnu ah, voikhat cu a hngalh lomi pakhat pa nih “VA hospital na phanh khawh nakhnga kan bawnh lai” tiah a ti tthan. Cu pa nihcun, a kalpi i VA hospital lei kalnak ding tlanglawng ticket a lak piak i Anthony cu a pek.

Ticket aa lak dih hnu ah, cu pa sin ahcun lomhnak bia ka hun chim lai tiah a ti ahcun aho mui hmanh a hmu ti lo~a bawmtu pa cu a tlau!VA hospital cu a va phan i rithaisii nih hrawh cangmi minung sersiam tthannak {rehab} ah an chiah.

Cu kaa ahcun, pastor pakhat nih Pathian bia a cawnpiak. Cu pastor pa sin ahcun voihnih tiang, VA hospital kalpi ding in a bawmtu minung ruahpi in an loh dup nak kong zong cu a chimh i cu pastor pa nihcun, “Na caah Pathian nih Vancungmi an run thlah piakmi an si ko ee” tiah a ti.

Cu hnu cun, Pathian dawtnak a hun thei i a nun a hun i sersiam tthan. Rian zong a a hun hmu. Voikhat cu, pumh dih hnu ah eidin dingmi {changreu te pawl} tam taktak in aa ken i hlan liopi ah kutdok in lam cung ah a rak vahvaih tawnnak hmun, Atalanta ahcun a va kal. Amah kiangkap ah ti le rawl loin rithaisii he aa rak i ciah tawnmi minung tampi a va hmuh tthan hna; an dirhum kel ah an rak um peng ko rih hna.

Aa kenmi eidin vialte cu a pek hna i cu kaa hrawng ah a ummi innlo ngei lo le pawttam vialte cu an chuak i minute 40 chung ah aa kenmi eidin cu a dih dih.Cu hnu ahcun, a mawtaw aa maungh i inn lei ah a kir. Mawtaw cung a tthut lio ah, fakpi in a ttap i “Bawipa, ka nun chan taktak na ka hmuhter cang caah kaa lawm tuk” tiah lawmhnak bia a chim.

Cu caan thok cun, amah bantuk in rithaisii sal ah a tang i eidin awk ngei loin Atalanta lam cungah a vakvaimi kutdok vialte zohkhenhnak buu, “I Care Atalanta” timi a dirh i nihin ahcun, full-time rianttuantu minung pasarih a ngei. Nikhat ah minung 100 peng rawl petu ah a hung cang.

Kutdok pa cu a nun aa thlen tikah, a kutdok hawi caah a nunnak a hman bak.Rit-haisii nih a hrawhmi pa cu a nun aa thlen tikah, rit-haisii nih a hrawhmi hawile hna caah a nunnak a hman bak ve.Thongtla pa cu a nun aa thlen tikah, a thongtla hawi nih luatnak an hmuh khawh nakhnga caah a nunnak a hman.

Misual cu thiam coter a si tikah, a misual hawi thiamcohnak an hmuh khawh nakhnga a nun a hman ve awk a si ko. Zuu sal ah a tangmi pa cu, zuu saltannak in luatter a si ahcun, a zuu sal tanpi hawile caah a nun a hman khawh lai.

Sifak pa cu a rum tikah, a sifak hawi hna nun nuam tein an nun khawh nakhnga caah a rumnak a hman ve awk a si.Zeibantuk kong poh ah va si ko seh, a nunzia, a dirhmun le a sining ah thlennak a hmu cangmi minung poh nihcun, cu kan i thlen hlan i kan dirhmun, nunzia le sining ah a um ve rihmi minung bomhchanh ding leiba kan ngei cio dih. Cucu Pathian nih ttuan a kan fial ciomi rian cu a si; cu rian ttuan cu Pathian rian ttuan cu a si ko!

Kan dirhmun le sining hlun i philh hna hlah u sih zeicatiah cu kaa ahcun Pathian nih rian ttuan ding a kan fialmi an rak um tawn.Kei hi zeitindah Pathian rian ka ttuan hnga, timi naa fian lo ahcun “kei hi zei dirhmun, le sining i a rak ummi dah ka si? Zeitindah kaa thlen?” timi biahalnak rak i tuah law, ahodah ka bawmh lai? timi cu naa fiang ko lai.

Cucu special in a sunparnak caah Pathian nih nang an fialmi rian cu a si ko. Cu rian cu nangmah lawng nih na ttuan khawhmi rian a si. Cu rianttuan cu Pathian nih an fial.Lawmhnak he,

Crd. Pastor Hram Bik Lian

 

Be the first to comment

Leave a Reply

Your email address will not be published.


*