NLD TTANH PAWL CU KAN LO CANG, LAINU A PHUAN DIH CIKCEK KO HIH

Ralkap he a dirti mi cu NLD le Dawt Aung San Suu Kyi hi a si.IJC ah Kawl ralkap sualnak a hmaimilh mi, Kawl ralkap nih nuhrin covo buarnak le cihmihnak an tuah lo tiah a chim tu cu NLD Chairperson Daw Aung San Suu Kyi hi asi.Palate ralzam an karh tuk lio, Ralkap le AA nih Paletwa cu raldohnak hmun ah an um cuahmah lio ah Dai tein a um tu cu Daw Aung San Suu Kyi hi asi.

Media nih Paletwa Chin ralzam an harsatnak kong thawngpang an lak khawh lonak ding ah curfew tuahnak lam tu an kawl. Facang ei awk a um ti lo, tirawl an ngeih ti lo caah Banluang tiang in an ei. Cu lio ah an thawngpang, an dirhmun hi vawleipi nih an theih sual lai tiah Internet line a chat tu, Internet line a phit tu cu NLD Cozah hi ansi.

Vawleipi nih an thawngpang an theih lo karlak ah Ralkap nih duh paoh in an den ve hna. Raldohnak daihter uh, raldohnak chuah pi ti hlah uh tiah mipi an au lio ah Daw Aung San Suu Kyi nih Kawl ralkap pawl cu upat conglomhnak Roca a pek hna. Mipi kan tem tuk cang, tirawl kan i kawl hawl kho ti lo, Ramleng lei in phaisa kan i kua kho ti lo, Internet line kan pe cang uh, Internet hmang in phaisa kuat nak tel kan tuah lai tiah Mipi sandah a piahtu hna thong ah a thla tu hna cu NLD Cozah hi asi.

Relchih rih: USDP le NLD a ttanh mi nan dihlak in Uico, mah bawhnak saphaw a ttam mi tiah kan i soisel hna lo.Ramkhel Party ttanhnak kong ahcun kan pumpak ruahnak nih a phak khawh tawk tein biachim le holh rel a si ko. Tamdeuh tu in bia kan i ruah ahcun a dik mi biachahnak thar zong tuah cio khawh a si ko. A sinain Miphun dawtnak kong a rak chim ve lengmang mi, kum 70 chung kawl nih an kan uk cang i kan covo kan lak tthan a herh tiah a rak chim ve lengmang mi minung hna nih “An chungkhar, an unau le hawikom NLD le USDP an dir bak in , CNLD nih zeihmanh an tuah kho lai lo.

Chin Party a herh lo tiah a chim mi pawl hna tu khi mah bawhnak Saphaw a ttam mi Uico tiah kan i tahchun mi hna cu a si. Pakhat pa cu a mah tein ruah khawh mi a ngei lem lo, ramkhel kong le Chin miphun kan tuanbia zong a thei lem lo. A sinain USDP in an khua pa cuh aa tim, NLD in an chungkhat cuh an i timh ve caah, zeisat tuak lem loin, an khua pa le a chungkhat pa dirkamh nak ah CNLD a soisel chih len ve.Pakhat pa nih aa thawh ve i “CNLD, Chin MP nih cun zeitin dah NLD tluk cun Chin ram ah thanchonak cu an tuah khawh lai, a sullam hrim a um lo tiah a chim len ve.

A sinain Ramkomh Hluttaw nih Ramkulh cio tthancho nak ah Budget rikhiah mi a ngeih dih i, a hal thiam mi, ahal kho mi paoh nih thanchonak tam deuh an tuah khawh timi kha a thei ti lo”. Cu pin ah a ruahnak cu an khua thanchonak lawng kha asi. Khua politics in ca a tial. Thanchonak pin ah mah tein khuakhan Lairelnak kan ngeih a herh ve cang timi kha a ruat lo. Pakhat pa cu “Nan khua hlei a ttha lo tuk, Cozah nih pei an i daihthlanh hna i, keimah MP ka tlin ahcun kan rem piak hna lai” tiah Vote a kawl ve. Kawl nih sifak cikcek in an kan tuah hnu ah thanchonak rian, Phaisa hmang in Chin miphun cihmih an kan timh timi kha a lung hrim ah a umlo. Cu pin ah thanchonak bia in vote a kawl i Kawl Policy kha thawnter a timh chin ve. Credit: Sui Chin Tial

Be the first to comment

Leave a Reply

Your email address will not be published.


*