NLD NIH POHMAH 261 AN REMH DUHLONAK PUANZAR PHEN AH ZEIDAH?

NLD Nih Pohmah 261 Remh An Duh Lonak Puanzar Phen Ah Zeidah?Pohmah 261 cu rampi president nih thim le min cazin pek si lo in ramkulh le ramthen kip hluttaw cio nih anmah duhmi palai kha Chief Minister ah i thim khawhnak nawl ngeih ding in remh an duhmi cu a si.Zeiruang Ah Dah NLD Nih Remh An Duh Lo? Mizapi thim lomi 25% ralkap palai kha hluttaw in ttum ta dih hmasa hna seh an ti ruang ah NLD nih pohmah 261 remh an duhlonak hi a si.

A dikmi zaukphung ram ahcun mizapi thim lomi ralkap hi hluttaw ah an thut awk a si taktak lo. Amah belte, dengteo pi in hluttaw ah ralkap nan i tel awk a si lo tiah caw le ui tthawl in fektthup in dirpi le aukhuan hi thil kalpi ningcang a si lo. Chim le rel ding cu a si ko nain caw le ui tthawl in an dawi colh hna awk a si lo. Hi bak hi NLD policy le thil kalpining a that lonak le an i palhnak taktak cu a si. Hi nihhin ralkap thin a phawh, an hma ah makphek, cite le raite benh le thuhpiak hna bantuk a si.

Cu ruang ah pei NLD nih remh ding an chuahpimi pakhat hmanh an hnatlakpi duh hna lonak le an hlawh a tlin lonak cu a si. Hi kong cu duhsah in kalpi ding le dinhdorh deuh in kalpi dingmi thil a si. Tahchunhnak ah 25% in 20%, 15 in 10% tibantuk in kalpi dingmi a si.Pohmah 261 kan remh ahcun USDP le ralkap an i fonh lai i anmah nih Chief Minister an tuan lai ti an phan ruang ah an remh duh lonak hi a si.

Hika zawn zong ah NLD nih fak tuk in an i palh. 25% ralkap palai timi hi ramkulh le ramthen lawng ah a si lo, ramkomh zong ah a si thiamthiam ko. 25% ralkap an i tel ko bu ah pei NLD nih ramkomh ah cozah a ser khawh ko cu. Ramkomh vial ah thinphan lo i ramkulh le ramthen ah ralkap nih Chief Minister an tuan sual lai ti phan cu hrokhrol hmanh ah “Lih tumpi” a si.

Ataktak ahcun ralkap pa Chief Minister a chuak lai ti an phan bia si lo in miphun party nih Chief Minister an tlaih lai i kan duh paoh in an chak kan reng kho ti hna lai lo ti an phan tuk ca ruang tu ah khin a si deuh.Miphun pi a simi kanmah Kawl miphun hruaitu upa nawl a ngai dingmi le fialchuk fialcho khawhmi lawng nih Chief Minister tuan seh ti an duh caah a si.

NLD nih cozah an ser i anmah duhmi President an i thim ko bu le anmah NLD teinak ramkulh cheukhat hmanh ah NLD palai hna nih anmah duhmi palai kha Chief Minister ah an i thim kho lo. Duh zong ah cepa, duh lo zong ah cepa ti bang in President nih pasaltha le miza thim lo in amah nawl a ngai dingmi kha Chief Minister ah a thim diam ko hna. Hi nihhin federal phunglam a simi ramkulh le ramkomh nawlngeihnak i thencheunak timi an kalpi lo zia le Kawl miphun dawpdolhnak (Burmanization) policy thawnter an timhnak kha fiangte in a langhter.

Cunglei chakrenghnak (Centralization) asiloah top-down system thawnter an duh caah a si”. Thutdan tambik a hmutu party nih anmah duhmi palai kha Chief Minister ah i thim ko hna seh tiah NLD nih an ti khawh lomi nih cunglei chakrenghnak (centralization) an thawnter zia kha a langhter. Phundang in chim ahcun Miphun ngan a simi Kawl (Burma) nih ramkomh he ramkulh he tlai dih usih, uk zungzal hna usih timi policy an tuanchuah zia kha a langhter fawn.

Zaukphung phunglam ralchanh in cunglei chakrenghnak an thawnter zia le nawlngeihnak an humhak zia kha a langter fawn.Self Determination le Federal Democracy rampi ser taktak an duh lo caah a si.Ramkomh pi hi ramkulh le ramthen in miphun vialte i fonh in sermi a si ti kha an i philhter riangmang i mi tambik a simi Kawl miphun duhnak lawngte in kalpi an duh ruang ah a si. An khelmi cu mi tamdeuh duhnak a simi Democracy Federal rampi ser a si.

Cucu, democracy hram a bunhmi Federal uknak phung in a kalmi rampi ser khi a si. Zeiruang ah ti ahcun mi tamdeuh a simi Kawl nih vote thlak in kan tei peng hna lai i kanmah duhnak in thil a kal kho zungzal lai ti an i ruahchan. Sihmanhsehlaw tlangcung miphun nih kan duhmi le kan caah a biapi bikmi cu Federal hram a bunhmi Democracy phunglam asiloah Federal Democracy rampi ser hi a si. Ramkulh le ramthen kip cio nih mah le hmunhma cio ah mahte in i tawlrel khawhnak, upadi ser khawhnak, ngunkhuai kholh khawhnak le Chief Minister i thim khawhnak ngeih hi an si.

NLD nih biatung 3765 remh ding in hluttaw i an chuahpi lio ah pohmah 261 ziah aa tel lo? A biapit lo ruang ah a si maw? Si naisai hlah, a biapi tukmi pohmah a si. Ralkap nih remh ding in biatung an chuahpi lio caan ahhin ziah an hnatlak lo? An hnatlak lo ruang ah remh dingmi upadi biatlang 3765 an remh khawh lonak a si. Mah thengtheng ti lo in aa remh khomi paoh in remh ding a si ko. A taktak ahcun pohmah 261 remh hi NLD (Kawl miphun) caah zeihmanh thathnemnak a ngeih lo ca federal phunglam kalpi an duh taktak lo caah a si.

Hi vialte miphun nawlngeihnak covo cu Mirang nih kum 60, Kawl nih kum 70, a zapi kum 130 tluk an kan chuh. Kan kut cung ah a um lo, Kawl kutchung ah a um. Khakha laak thannak ding le miphun covo khuakhirh thannak ding ah miphun party vote pek a herhnak cu a si. Vote for Pu Van Chan Ceu. Vote for CNLD. Credit: Van Chan Ceu

Be the first to comment

Leave a Reply

Your email address will not be published.


*