NAWLNGEIHNAK A KAN CHUTTU HNGALHFIAN A HARH: PA HMUN

Nawlngeihnak A Kan Chuttu Hngalhfian A Herh. Chinmi le Tlangmi hna kan sunghmi nawlngeihnak (covo) a kan chuttu le a kan hlengtu hi Kawl Ralkap AANASIN lawnglawng an si lo. Kawl politicians hna nih a chanchan in an kan hlenmi a si. U Nu chan 1948 – 1962 (March 1) tiang kha 1947 Phunghrampi in Parliamentary Democracy uknak chan a si. Ralkap uknak a si lo. Kawl pawl caah cun a dikmi Democracy System a rak si ko.

Ralbawi zik (Chief of Army) cu civilian politician (AYATTA NAINGNGANZI TAMA) a simi Minister of Defence kuttang ah a um. Media zalonnak, a dikmi a felmi thimnak zong tuah a rak si tawn. 1947 Panglong Meeting ah Tlangchungmi nih mah tein khuakhan lairelnak (Self Determination) ngeih ding timi biakamnak an tuah hnu a rauh hlan ah ṭialmi 1947 Constitution cu Kawl politician tampi nih Federal System a si ko an rak ti tawn (U Nu zong nih a rak ti).

Asinain, cu 1947 Constitution cu Union System (PYITAUNGSUH SANIT) or Federal System a si lo; Unitary System (TA PYITAUNG SANIT) a si diam caah 1949 in kan unau Karen pawl nih hriam tlaih in dohnak an hung thok. Cu hnu ah Shan le Kachin hna nih an doh ve hna. Cu hnu cun Ralkap uknak a hung phan i a zual chinchin. 1947 Constitution tial lio ah Chinmi telh in Tlangcung Miphun cu Constitution kong le ram uknak lei ah experience kan rak ngei lo i Kawlmi nih fawi tein an rak kan hlen khawh tiah chim khawh a si.

Asinain, kum saupi chung Tlangmi le Kawlmi kar ah ral a tho i, Tlangmi nih kan doh ko lio ah 2008 Phunghrampi cu Tlangmi hna vialte Kawlmi nih ukmi ah an ser rih ṭhiamṭhiam asiloah an kan hlen khawh ṭhan. Kawl politician an si pek, ralbawi an si pek ah an ruahnak le an thinlung muru taktak ah cun atu “Union of Burma ramkawmh vialte hi Kawlmi nih kan rak ukpenmi ram a si, Tlangcung Miphun hna zong Kawlmi nih kan rak ukpen pengmi hna miphun an si” timi ruahnak an ngei.

Hlan lio piin unau bantukin hmunkhat ah kan rak um ṭi, ram (Myanmar ram) kan rak dirhṭi an timi khi phundang in chim ahcun, a hlan lio tein kan ukpenmi ram ah a um vemi nan si’ an ti duhnak a si. 1st, 2nd, 3rd Myanmar Kingdom kong an chim ah khin atu Myanmar rampi kha an huap termi a si. Kawlmi he sau nawn aa kawm balmi le thuk deuh in ramkhel kong Kawlmi he aa ceih balmi nih cun theih dihmi thil a si ko lai.

Tlangcung Miphun cungah nawlngeihnak an duh pengmi hi Kawl Ralkap AANASIN lawnglawng an si tiah ruah ahcun kan palh cikcek lai. Kawlmi cu anmah le anmah zeitluk in an i doh, an i soi hmanhah Tlangchung Miphun hna cungah Kawl nih ukpen ding timi ah cun an lung aa rual dih. Cu ruangah Kawlmi cu kan miphun kongkau ah zumh dih ding an si hrimhrim lo tiah chim le ṭial pengmi hi a si.

Daw Aung San Suu Kyi le NLD zong nih Democracy Federal System cu kan duh ve ko an ti ko nain, Federal cu a phunphun in a um. Central Cozah le State Cozah kar ah nawlngeihnak i cheuhning (power sharing) a phunphun a um. Residual Power zeizah State Cozah sinah an pek duh timi an chim bal lo. Kawlmi nih an duhmi Federal le Chinmi le Tlangmi nih kan duhmi Federal System hi aa lo hrimhrim lo. Chinmi le Tlangmi nih a lam kip in faak piin kan chim kan rel i kan deet khawh hna lawnglawng ah kan duhmi kan hmuh lai.

Federal System kan in pek lai an ti ko tiah Kawlmi sinah nawlngeihnak kan pek dih hna lai i, anmah nih kan duhmi an kan tuahpiak lai timi ruahnak cu Kawlmi nih sau tuk an kan hlen cang i an kan hlen thai khawh cang tinak a si. ASSK le NLD nih kan in pek hna lai an kan timi hi kanmah duhmi Federal System a si nakding caah kanmah hrimhrim tel in ser ding (upadi suaive ding) a si. Kan miphun sinah nawlngeihnak chiah loin Kawlmi sinah nawlngeihnak kan chiah ahcun an kan hlen ṭhiamṭhiam ko lai timi hi khuaruah kho mi poah nih ruah a herh.

Atu bantuk 21st Panglong ah bia raldoh lio le miphun kong ceih lio hrimhrim ah kanmah Miphun hrambunh Political Party kan i tel a herh i kan chim kan rel a herh tuk lio caan a si. Tlangcung hriamtlai phu hna nih kum 70 leng an doh caah a rak chuahmi cabuai cung bia raldonak ah Hriamtlai phu (EAO), teinak a hmu mi political party pawl, Acozah le Ralkap tiin cabuai cung bia raldo mi a si. Atu lio hi miphun party thawng aherh bik lio caan a si. Hriamtlai phu he kutsik in (hand in hand) hmunkhat te ah ttanti in kan miphun covo lak thankhawhnak lam a um lio te a si.

Chin mi a kan aiawhtu miphun party tel loin hriamtlai phu asi mi CNF lawng nih norhmi nakin hriamtlai he mipi nih thim mi party aiawhtu hna he ttanti in thazang chuah a herh tuk lio a si. Chin mi le tlangcung mi nih kan sungmi miphun covo lak thanding hi kan miphun pi ningin kan ttanti a herh. National struggle a si. Cu National struggle cu a lam kip kawl in lakthan dingin zuam ding a si.

National struggle tuah lio ah mah miphun party thawngter loin, miphun covo a kan chuttu Kawl party hna tha kan pek, kan thawngter mi cu mah le mah kehlengphelh bantuk a si. Mecheu nih Central Cozah a ser khotu NLD ah kan lut lai i a chunglei in kan miphun kong, Federal kong kan chim ve lai asiloah a chunglei in influence kan tuah ve lai a timi zong tampi kan um (NLD le UDSP a dirpi pawl).

NLD Party CEC ah Chinmi pakhat hmanh an telh lo. Chin Pyine le Myone NLD level NLD Upa hna nih Kawlram NLD BAHO nih a suaimi Policy kong chimnak nawl pakhat hmanh a um lo. Policy thlen khawh ding tiangtiang influence va tuah ding cu um rih seh, point out hmanh an tuah ngam lai lo. Zei ruangah ti ah cun, Rampi a hruaitu Party chungah Hierarchy timi aa changchang in nawlngeihnak hi a fek tuk/ aa thlau tuk.

Sporting Club (Tennis Club, Badminton Club tbk.), Chiatṭhat Bu asiloah Community Organization ti bantuk ah cun, an policy kongkau ah chimrel kan duh ve ahcun a chungah va luh in member va si ve ahcun kan duh lomi policy kong chimphuan (point out tuah asiloah criticise tuah) khawhnak nawl a um. Asinain, nawlngeihnak power tamtuk a ummi rampi i hruainak Political Party ah cun State le Myone level pawl sawhsawh nih zeitin hmanh chimrel khawhnak le critics tuah khawhnak a um lo. CEC ah a min men in Chinmi pakhat va telter hmanh ah amah lawng in zeihmanh a chim ngam lai lo asiloah a chim kho lai lo. Hihi ṭha tein hngalhfian ding a herh taktakmi a si. Catialtu: Pa Hmun, Australia

Be the first to comment

Leave a Reply

Your email address will not be published.


*